Mika 2 - Ala Wone Peenok Peebi Mbanak

Aap tebenogo piigwi nogo yoragagerak wone

¹ It aakumi maluk eeriyak koonogo pugwi, It nogo yogo menggam windak logonet, “Maluk ndogop eeko logowok o,” yinuk, koonggwi, Eeppunuk, O kilim nagake kagak, inayuk warak me, eebe aret eeko menggaarak ti iya me, inabuwa o.

² It nen aakumi ineyabu eerak uugwe mba'nuk kologwe, Inawi wurik uugwe mba'nuk tebenggologwe, Inawi wurik inom, inoreewi ineyate pugu inom, ndinggologwe, Eeko menggaarak.

³ Togop aret eeko menggaarak me, Aliku ALA nen ari logonet, “An nen it aakumi yi, maluk eerogo piyoorak koonogo pege me, inoba kwippiige neegak, kole mbaganggwi, Ne ti, maluk eerogo piyoorak eyom aret me, An iya! mbakak mbaganggwi, Eeriyak meek aret kaagun o.

⁴ Ne ti eyom paga it aakumi nen, Op togon eeppinagagi, yinuk, yorogo logogun o. Nineebe lek eerogo pinanege, ninanggween mbanogo wogorage, Ndinggolage nagagerik, it aap tebenogo pinanugwi nogo wogorage, eereegerak o, Yinuk, yogwe nogo inomaani mbanggo logonet, Kayik a! yinuk, le ndawi paga inanep pogo logogun o,” yinuk, Aliku ALA nen yegerak me, yokkiragi o.

⁵ Togop me, kit Aliku ALA apuri kinenggela'me it ambi nen yugum paga wakkanuk, nggween kuli mbanogo wokkiroorak lek aret kaamunggup o.

⁶ “Nit ninenggali eerogo pinaniyak lek me, Ndogop eerigin o, yinuk, it yoraga nen, Ala ndogop yegerak o, yinuk, yo'nirage, Ala nen, Ndogop eeppinagagin, yegerak o, yinuk, yo'nirage, Eeriyak mage o,” Yinuk, yogo menggaarak.

⁷ Yakup paga wiganak kit yi wae. “Aliku ALA iniki liippega'lek anini nen perak togon eeppiige, At togoti mendek eeppiige, eeke menggerak o,” yinuk, yuurak op mbakop? “Aap ambit ambi iniki abe koonak logonet, obeelom eerit nage nogo nen, Ala wone ti, obeelom aret o, yinuk, mbake menggerak.

⁸ Togop kwe, it inom wim mbanak nen eeko mengga kwak, an napuri inoweewi nogo mi'nogo logonet, Inawuri nen wim eeppunuk, iniki ugun ale'nggen paga iname wogwe me, inayum abe nggorek nogo nggorok togon eerogo kologwe,

⁹ It an napuri inakuwi inawi iniki kundugu wonogwe iigak kwe, piyanogo wumbiigwi, It inapuri mbuulogwe nale'nggen inoba piyoorak mbake neegak kwe, kologwe iyo, mondok-mondok non mbanogo piigwi, Eeko agaarik o.

¹⁰ It o yime it yonggonggologo logorak lek maluk eerogo pereegwaarak obeelom eerogo pigin lek pulunik aret me, mi'na'nuk nayok a!

¹¹ Aap pilit pugunogo inambokan lagangga ambi nen wage logomenggerik, ari logonet, An perak, anggur amburu inom, kumili aganaka amburu inom, ndonggok togon nonggo logorak yokkirage logogin o, yinuk, yoraga nogo mendek it inobam aret me, inenggela'me logonet yoragak yuurak op aret o,” yinuk, yegerak me, yokkiragi o.

Inagap ndariyak koonogo pereegerak wone

¹² “It Yakup mendek ti, an nen abet aret kuwak eerogo piige, Iterali mendek yumbunik nogo, abet aret ambit me piya wage, Eeke logominggirik, Ndomba kuwak eerogo anggenogona piigo mengga kwak piya wage, Ndomba kuwak aago inagari'ngga nenet nogo menggam wogoren nugu mengga kwak, wogoren nege, Eeriminggirak me, O time aakumi mban yebet aago logogun o.

¹³ Aap yugum pak langgungga nogo kwak a'nuk, naa'nduk tu pak langgunogo punuk, wundi nage, Inowe nendagembogut Naliku ALA naa'nduk a'nuk nage neegak, nawuri nambokan wogwe, Eerugun o,” yinuk, Aliku ALA nen aret yegerak me, yokkiragi o, yoragagirak.