Matiyut 17 - Ala Wone Peenok Peebi Mbanak

Puut paga Yetut enete alik agagerak wone

¹ Yorage nagagerik, ti'nuk, nogo 6 yippunuk, ko'lu at Yetut nen Peterut inom, Yakobut inom, ndi, Yakobut awot Yaya inom, wogoret puurom ambi nggorek paga lagi nage nagagerik, inalik time wonogwe me,

² inenggaanom paga at eebe alik negen age logonet, enete oonegen pogom pindanggage, ndi, ayum o eya pogom laambu lombok age, eeke kagak,

³ it Muta Eliya imbirak Yetut inom wone mbanggwi mban inigen iyareegwaarak.

⁴ Wone mbanggwi iigo nogogwaarik, at Peterut nen Yetut yoge logonet, “Nogoba wae. Nit yime wonogwe ti, obeelom aret me, kit logobagip nduk, an nen ooliya kenagan ambi kat, ambi Muta, ndi, ambi Eliya, wurogo pinagarak op aret mbaken ilik, lek a?”

⁵ Wone awo yoge kagak, ameraakot abinak mendek nobappiya wage kagak, enggela'me nen oone ambi yorage logonet, “An naput niniki kunik nale'nggen ee'nake nogo yi aret me, at oone kinaruk liirogon konenggo logonip o.”

⁶ Yorage nogo it Yetut oone waganggwi inaruk konenggo nogogwaarik, inagabiti ambik ogo logonet, inete wanduk nggween paga wambeegwaarak.

⁷ Wanggo nogogwaarik, wonogwe me, at Yetut wage nagagerik, ineebe eenggi piginake logonet, “Kinagabiti lek aret mi'na'nip o.”

⁸ Yorage mbareegi, inuut pila yogo nogogwaarik, it nogo inom lek at Yetut alik mban wonage inigen kogogwaarak.

⁹ Puurom paga nen wambi wogo logonet, Yetut nen, “An aap aret nda'nagagirak yi, kambunuk nogo menggam nen awo mippanega'lek kagak, eeke kinigen neegotak nogo aakumi abu yoraagup o,” yinuk, inaruk wareegerak.

¹⁰ Inaruk wake mbareegi, at oone waganggwi nogo nen Yetut kin wokkogo logonet, “Ti kenok, it Ala wone liiru mbanak unde nogo nen, At Eliya aa'nduk woraagin o, yinuk, yogo menggaarak nogo ti, nonggop nduk yogo menggaarak?”

¹¹ Yinuk, kin wokkogo mbareegwa, at nen, “Eliya aa'nduk wage logomenggerik, yi eekwi ndi eekwi ndegeni woraagin o, yogwe nogo ti, abet aret yogwe kwe,

¹² Eliya nogo muk wage mbareegi, it aakumi at yelok kaga'lek logonet, iniki mba'nuk aret eeppereegwaarak nogo ndak-ndak, an aap aret nda'nagagirak nogo noba aaninggin-paaninggin agago panugun o, yinuk, yokkiragi o.”

¹³ Yorage mbareegi, at oone waganggwi nogo nen, “Yetut nen wone yo'nirage yi, aap Yiime Wuppiiga Yaya aret nduk, yo'nirage o,” yinuk, iniki liippereegwaarak.

Kugi wulaga inikime nen wumbereegerak wone

¹⁴ Liippogo nogogwaarik, aakumi kuwak aago inowagam wambi wogo mbareegwa, aap ambi Yetut owagam nage nagagerik, abu'me tebe yinuk, yoge logonet,

^15-16 “Nogoba wae. An napuluk kugi andi nggwok eeke nagagerik, eenggi-iyok puk-puk ege logonet, kulinik-kalinik kani kunik me mambege, kulinik-kalinik yiime mambege, eeke menggerak me, an nen wonok it kat koone waganggwi inowagam wagarak kwe, it nen obeelom eeriyak abu meek iigirak me, kat nen nabuwa mbake logonet, naput yi obeelom eeru o.”

¹⁷ Yoge mbareegi, at Yetut nen, “Wologwe! Kit aakumi yogondak wonogwe kiniki noba panggombunuk, abet nombaka'lek lambek nugu monggotak yi, an ne mande ninom logonuk name nagin kwe? Ne mande niniki yanggo yinuk, kit ninom logogin kwe? Wulaga ti, wonok wa'nip o.”

¹⁸ Yinuk, yoragagerak wonok wogo mbareegwa, at Yetut nen kugi nogo mberege mbareegi, kugi nogo wulaga inikime nen wundi nage kagak, wulaga nogo ti eyom obeelom aret agagerak.

¹⁹ Obeelom age mbareegi, Yetut alik wonage me at oone waganggwi nogo at owagam wogo nogogwaarik, “Nit nonggop nduk kugi nggiginogo wumbuurak meek wonogoorak?”

²⁰ Yogo mbareegwa, at nen, “Kiniki liirogon abet nombaka'lek nogo paga eeriyak meek aret wonogotak o. Kit kiniki abet nombakwi nogo kulok anggen pogom logonetak en, puurom yi yogo logonet, Yime nen tayo yi nage keyaagin o, yogwi kiinok, tayo yi nage kaanetak o. Kiniki mondok abet nombakwi kiinok, kit eeriyak mbakwi nogo ambi eeriyak meek ti lek abok aret eeko logomunggup o. (

²¹ Kugi togop ti, we nggiginogo wumbiigulik o. Ata, kinambe mage negen logonet, tamban mban eekwi kiinok ti, nggiginogo wumbiyoorak op aret me, nduk yokkiragi o,” yinuk, yoragagerak.)

“Noorugun o,” yinuk, ne ambinom yoragagerak wone

²² O Nggalileya time kuwak eeko nogogwaarik, Yetut nen at oone waganggwi nogo yorage logonet, “An aap aret nda'nagagirak yi, it aakumi nen nooruwak nduk, an neebe pigogo wogorage kenok,

²³ nooko mbaremengga, nogo mbere yippunuk, ko'lu Ala nen neenik agago mippanigin o.” Yorage mbareegi, at oone waganggwi nogo iniki abu maluk ogogwaarak.

Yetut nen Ala awi wurik ake wu pereegerak wone

²⁴ Ti'nuk, at Yetut inom, at oone waganggwi inom, o Kaperenawum wogo mbareegwa, it Ala awi wurik ake wu kuwak eeko menggaarak nogo, at Peterut owagam wogo nogogwaarik, at yogo logonet, “At mamunggirage menggerak nogo nen Ala awi wurik ake wu pege menggerak ilik, lek a?”

²⁵ Yogo mbareegwa, Peterut nen, “Lek o. Pege menggerak aret o.” Yorage nagagerik, oome unggwage mbareegi, at Yetut nen Peterut aa'nduk yoge logonet, “Timon wae. It aap inendagembogut o nggween paga yime menggaarak nogo it unde menggam unggwi wogwe iinok, Onggo pinip o, yorogwe nogo ti, it inapuri yorogwe a, aap inambik yorogwe a, nonggop mbaken o?”

²⁶ Yoge mbareegi, Peterut nen, “Aap inambik aret yorogo menggaarak o.”

²⁷ Yoge mbareegi, Yetut nen, “Ti kenok, inapuri ti pugulik we aret menggaarak kwe, nit pega'lek niinok ineebi ninombakwi iyo, kat yi yenggenak me nage logomenggendik, ikan keele mbo mambunuk, ikan ambi aa'nduk wa'nage kenok, ambe paganogo punuk, wu ambe me wonage nogo wagangge logomenggendik, peenok an nake pege, ndi, peenok kat kake pege, eeri woraamunggun o,” yinuk, yoreegerak.