Marakut 16 - Ala Wone Peenok Peebi Mbanak

Yetut eenik a'nuk mi'nagagerak wone

¹ It Yakuri tamban eeppunuk, o kiip age mbareegi, kwe Mariya awi Magaralena mendek nogo inom, Yakobut agalo Mariya inom, kwe Talome inom, it nogo nen eyoonggen obari obeelom mendek Yetut oba mbeenogo puwok nduk, onggo pi nogogwaarak.

² Onggo pi nogo nogogwaarik, nogo yinuk, Hari Minggu paga kuubondendok oonegen awo wundi wage kagak, yugum ndoome nogome nogogwaarak.

³ Nogo logonet, “Yugum narak nogo ta nen laganogo pinanigin o?” yinuk agan wogo nogogwaarak.

⁴ Togop aret agan nogogwaarak kwe, ina nakkogo nogogwaarik, yugum nggwok tu narak nogo loguk togon nagagerak inigen kogogwaarak.

⁵ Kogo nogogwaarik, ndo nenaarak nogome unggwi nanuk irunggwe ineenggi abe'nggan pa'nggwe wulaga ambi mbogoyum yanggwi lan aago yirik kwi'ndak wonage inigen kogo nogogwaarik, iniki lek age mbareegi,

⁶ at nogo nen, “Kiniki ma'narugup o. Yetut awi Nataret mendek eyo paga nabenogo pegaarak nogo, kit kinigen kaawok nduk wogotak kwe, eebe yime lek o. At muk eenik a'nuk, mi'nagaarak o. Eebe warak pegam a'lip mban yi kaanip o.

⁷ An naa'nduk Nggalileya time naminggirak me, neya namunggup o, yinuk, wone yokkiragaarak nogo ndak-ndak aret eekerak me, at oone waganggwi ando inom, Peterut inom, yora nanip o.”

⁸ Yorage mbareegi, “Ia!” yinuk, inaganak nuk iranet ndoome nen wundi wogo nogogwaarik, kole mbaganggo logonet, inagabiti nen aakumi ambi yoroolik aret wogogwaarak.

Mariya awi Magaralena mendek nikkagagerak wone

⁹ Tamban eekak yuurak ne iyaalok warennagagerak Hari Minggu paga kuubondendok at Yetut nogo eenik a'nuk, mi'nage nagagerik, at kwe Mariya awi Magaralena mendek kugi 7 inikime lik yereegerak nggiginogo wumbiyareegerak nogo, aa'nduk lombok nikkagagerak. Nikkage mbareegi,

¹⁰ it Yetut inom nugu nogogwaarak nogo nen le yi-yi wo-wo yogwe me, at kwe nogo nen yonggo nage nagagerik, yorage logonet,

¹¹ “Lek o. At Yetut nogo, eenik a'nuk, mi'nagaarak kage nagarik, yokkira wagi o,” yinuk, yorage nogo koneneegwaarak kwe, it iniki abet mbaka'lek aret wonogogwaarak.

Oreewi mbere inigen kaawak nduk nigiyareegerak wone

¹² Ti'nuk, at oreewi mendek mbere o kota nen wundi nogo nogogwaarik, tu paga nogwe me, at Yetut etenggen alik a'nuk, nigiige mbareegi,

¹³ iniyok paga wogo nogogwaarik, inoreewi ando yorogogwaarak mendek, it nogo kunduk, abet mbarulik mban wonogogwaarak.

Oreewi 11 kaawak nduk nigiyareegerak wone

¹⁴ Ti'nuk, peebi nen at oone waganggwi 11 nogo mbi nunggwi me, “Neyaawak o,” yinuk, nigiya wagagerak. Nigiya wage nagagerik, at eenik a'nuk mi'nagagerak inigen kenok, yora wogogwaarak kwe, inogogumbuk logonet, iniki abet mbaka'lek iinok, mberiragagerak.

¹⁵ Mberirage nagagerik, yorage logonet, “Kit yi awi ndi awi o nggween paga yime abok aret nogo logomonggotik, it yi aakumi ndi aakumi wone obeelom wone yoranet nugu logonu o.

¹⁶ Wone obeelom wone yora namonggotak iniki abet mba'nuk, yiime wanggwi iinok, inagap ndarigin o. Ndi, wone ti, iniki abet mba'nuk wagangga'lek iinok perak, maluk agago aret piyaagin o.

¹⁷ It obeelom wone iniki abet mba'nuk waganggwi nogo nen wone obeelom wone yoranet nugu logonet, inagabiti warak ineenu ariyak mendek inigen kogo logogun yi aret. Kugi inikime lik yemenggerak nogo an nendage paga nggiginogo wumbiigwi, aakumi inoone ineenggo'lek lalin negen woppunuk yorogwe,

¹⁸ waalo muuru ineenggi pigaganggwi, magagirak labunik namenggaarak kwe, kangga'lek aret wonogwe, kugi andi iinok, inanobak ineenggi pippiinok obeelom eeginakwi, eerit nugu logogun o,” yinuk, yoragagerak.

Yetut mbogut paga wonok laganeegerak wone

¹⁹ Ninowe Yetut nogo wone ti yorage mbareegi, Ala nen wonok, mbogut paga pi laganeegerak. Pi lagangge mbareegi, at eenggi abe paga kwi'nagagerak.

²⁰ Ndi, it at oone waganggwi nogo yi awi ndi awi abok aret wone yoranet nugwi iigak, ninowe Yetut nen yeenggwaaranet nege nagagerak me, inagabiti warak ineenu ariyak mendek eerit nugwi paga it aakumi apit nogo nen, “Wone yi abet aret kogo o,” yinuk, waganggo nogogwaarak.