Marakut 11 - Ala Wone Peenok Peebi Mbanak

“Ninowe endagembogut yi aret,” agan wogogwaarak wone

¹ At Yetut inom wogogwaarak nogo, o Yerutalem unggwi woraawok nduk puut Tayitun eegwa'me o tini Mbetapage inom, Mbetaniya inom, panggo yi wogo nogogwaarik, at oone waganggwi mendek mbere nappiyaakit nduk

² yorage logonet, “O yaga'lelo irukuna time nanip o. Time awo mbo unggwi nogo logonet, keledai awooluk aakumi amborowak paga kwi'naga'lek keele mbarenak aret kinigen kaamunggup o. Kogo logomonggotik, ti aret piinogo wonok wa'nu o.

³ Wonok wogwe me, aap ambi time nen, Kit nonggop nduk keledai ti, piinggo ogotik o? yokkirage kenok, kit nen at yogo logonet, Ninogoba keledai lek kenok, Wa nanip o, yo'niragaarak me, wonok nogo logomonggoorik, obaane'me pi woraagun o, yinuk, yo'nu o.”

⁴ Yorage mbareegi, it nogo, nogo nogogwaarik, keledai awooluk tu nggwok unggwogo menggam taati keeleluwi mbarenak inigen kogo nogogwaarik, piinggo mbareegwa,

⁵ it aakumi weelek time wonogwe nogo nen, “Kit keledai awooluk mbarenak ti, nonggop eeriyak nduk piinggo ogotik o?”

⁶ Yorogo mbareegwa, it nogo nen, “At Yetut nen togop yoranu o,” yoragagerak nogo aret yorogo mbareegwa, it nen, “E o. Wonok nanip o,” yorogo mbareegwa, wonok wogogwaarak.

⁷ Keledai nogo wonok Yetut owagam wogo nogogwaarik, inayum nggoorogo keledai amborowak paga lenggembogo mbareegwa, at Yetut nogo ti paga kwi'nagagerak.

⁸ Kwi'nage mbareegi, it aakumi ambik inayum mbiganogo tu nggwok paga ndoonit wogwe, it ando nen eyoongga yabu penaame nen kalenogo ndoonit wogwe, eeppunuk,

⁹ at nogo wage kagak, it ando inaa'nduk wogwe, ando ambokan wogwe, eerit wogo logonet, “Otana o! At ninogoba Ala endage paga wage yi, wogoppuwok o.

¹⁰ Ninombo Ndawut abu'me pinanikit nduk wage me, wogoppuwok o. It mbogut irimbaga menggaarak kunduk, Otana, yuwak o,” yinuk, ina'mit agan wogogwaarak.

¹¹ Ina'mit agan wogwe iigak, Yetut o Yerutalem unggwi wage nagagerik, Ala awi wurik me unggwagagerak. Unggwi nanuk, yi mendek ndi mendek enegen yomboonit nege nagagerik, o kiip arikit nduk eeke kagak, at oone waganggwi aap 12 nogo inom o Mbetaniya nogogwaarak.

Eyo wuli pulunogo pereegerak wone

¹² Nogo yippunuk, ko'lu o Mbetaniya nen tu paga wogo logonet, Yetut mbi abu eereegerak.

¹³ Mbi abu eeke mbareegi, at Yetut nogo nda nen eyo wuli ambi engga mili lubu ari enegen nakkage nagagerik, “Eyo nogo anggen yugu ilik, lek a?” yinuk, alome panggorogon pekka nage nagagerik, anggen yuurak eyom awo ari waga'lek me, engga mban enegen kagagerak.

¹⁴ Engga mban enegen kage nagagerik, eyo eebe nogo yoge logonet, “Kat kanggen aakumi ambi nonggo logogun mondok lek o,” yoreegerak. Ndi, yoge nogo, at oone waganggwi inaruk koneneegwaarak.

Ala awi wurik me ndegeneegerak wone

¹⁵ At Yetut oone waganggwi inom o Yerutalem ari wogo nogogwaarik, at Yetut nogo Ala awi wurik me unggwage nagagerik, it aakumi Ala awi wurik me nogome yi mendek ndi mendek onggo mbanggwi, onggo kologwe, eekwi nogo mugogo wumbiige logonet, it wu onggo-onggo eeko menggaarak inageyo ndoonak inom, it towe puume onggo inoba pogo menggaarak inageyo kwi'ndak menggaarak nogo inom, a'nggan nggininogo wuppereegerak.

¹⁶ Wuppege nagagerik, it yorage logonet, “Kit Ala awi wurik oore'nggam yime yi mendek ndi mendek wonok yinggwi-unggwogwe eerugup o,”

¹⁷ yorage nagagerik, wone mamunirage logonet, “At Ala nen, An nawi wurik ti, yi aakumi ndi aakumi inanebunu lombok nen tamban eeko menggam yi aret, yogo logowak o, yinuk, yereegerak liiru mbaneegerak nogo lek a? Liiru mbaneegerak aret kwe, kit perak, o yi, aap yogoot woppunuk kiraa'nari nogo menggam eerogo pugwi kiigi o,” yinuk, yoragagerak.

¹⁸ Yorage mbareegi, it Ala unde inoweewi inom, it Ala wone liiru mbanak unde inom, nogo nen wone yoragagerak nogo inaruk konenggo nogogwaarik, “Nonggop eerogo waruwok o?” yinuk, abok mbaneegwaarak kwe, it aakumi abok kuwak aago nogo, wone mamunirage paga pi wako mbareegwa, at pigoorak inagabiti nen puk ogogwaarak.

¹⁹ Ndi, o kiip age mbareegi, Yetut at oone waganggwi inom o kota time nen wundi nogogwaarak.

Eyo wuli mbuk agagerak wone

²⁰ Wundi nogo nogogwaarik, taati nogo yinuk, ko'lu kuuben tu paga nogo logonet, eyo wuli nogo omanggen inom abok aret mbuk agagerak kogogwaarak.

²¹ Kogo nogogwaarik, Peterut nen eyo yoge kagagerak nogo abe'nage mbareegi, Yetut yoge logonet, “Ngguru wae. Eyo wuli pulunogo pegendak nogo muk mbuk agaarak yi, ket o.”

²² Yoge mbareegi, at Yetut nen, “Kiniki Ala oba panggombunuk abet mbake logot o.

²³ Kiniki yungguppegak eeka'lek kinoone yogwe, Ndak-ndak arigin, mbako logonet, Puut nggwok yi, Aan wogonogo yi yenggenak me lebengge keyaagin o, yogwi kiinok, togop aret eeke kaamunggup o, yinuk, abet aret yokkiragi o.

²⁴ Togop me, kit tamban eeko logonet, yi mendek ndi mendek nggino yorumonggotak nogo, Muk kologoorak o, yinuk, abet mbakwi ti paga wokkirage kaamunggup o.

²⁵ Ndi, kit mi'na'nuk, tamban eeko logonet, aap ambi kinom ogoorak wonage kenok, kinogoba mbogut paga wonage nogo nen kit kinomaluk lek eerogo pinagawak nduk, at omaluk nogo kinami eeppunuk logonip o,” yinuk, yoragagerak. (

²⁶ Kit nen aap ambi omaluk kinami eerogo pugwi lek kiinok, kinogoba mbogut paga wonage nogo nen kit kinomaluk lek eerogo pinagagin lek aret o.)

“Ta oone paga eeke menggendak?” wone

²⁷ Yetut at oone waganggwi inom iniyok paga kota Yerutalem wogogwaarak. Wogo nogogwaarik, at Yetut nogo Ala awi wurik oore'nggam unggwage nagagerik, nege kagak, it Ala unde inoweewi inom, Ala wone liiru mbanak unde inom, it aap inanggok inom, at owagam wogo nogogwaarik, yogo logonet,

²⁸ “Kat yi eekak ndi eekak eeke yi abok aret ta oone paga eeke menggendak? Ta nen yokkereegerak paga eeke menggendak o?”

²⁹ Yogo mbareegwa, at Yetut nen, “An wone ambi kin wokkiya o. Onggo yo'nugwi kiinok, an eerit nage yi, ta oone paga eeke minggirak nogo ti, paganogo yokkiraagin o.

³⁰ At Yaya yiime wuppiige nagagerak nogo ti, mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Kit yo'ninip nda!” yoragagerak.

³¹ Yorage mbareegi, it-it wone mbanggo logonet, “Nit nen, Mbogut paga nen yoreegerak paga yiime wuppiige nagagerak o, yogwi niinok, at nen, Ndi, ti kenok, kit nonggop nduk kiniki at abet mbaka'lek wonogotak? yo'niraagin.

³² Ndi, nit nen, Aakumi nen yoreegwaarak paga yiime wuppiige nagagerak o, yogwi niinok, Ia! It aakumi abok aret, at Yaya ti, Ala nen yoge kagak yoraga mendek aret, mbakwi me,” yinuk, aakumi inagabiti nen

³³ Yetut yogo logonet, “Nit nineenggo'lek o,” yoreegwaarak. Yogo mbareegwa, “Ndi, ti kenok, an kunduk, An eeke yi, ta nen yo'nireegerak paga eeke minggirak ti, yokkiraagin lek o,” yinuk, yoragagerak.