Linggineegwaarak 8 - Ala Wone Peenok Peebi Mbanak

Ndi pugu logorak yoreegerak wone

¹ At Aliku ALA nen Muta yoge logonet,

² “Aap Karun nen ndi eno'mbak 7 nogo, wuninogo pegak ogobakkigirik irip paga kumbit nage kenok, eya enaame nggwe eerogo nappege logowak nduk, ena koonogo pit noorak yoru o.”

³ Yoreegerak nogo Muta nen Karun yoge mbareegi, Aliku ALA nen Muta wone lengganogo yoreegerak nogo ndak-ndak aret eeke logonet, ndi eno'mbak 7 wuninogo pegak ogobakkigirik irip paga kumbit nage logonet, eya enaame nggwe eerogo nappege logowak nduk, ena koonogo pereegerak.

⁴ At Aliku ALA nen, “Ndi ti, wuninogo pegak etenggen yogop aret ogobakkigiru o,” yinuk, at Muta titik ireegerak nogo abu ndak-ndak aret ndi wuninogo pegak iyok nen nok, agi irip me ten ambit-mbit warak kwak eerogo puurak yoreegerak nogo ti, mbuti emas aan libik-lebek eerogo ogobakkigirogo pereegerak.

Aap Lewi mendek leenogo piyareegwaarak wone

⁵ At Aliku ALA nen Muta yoge logonet,

⁶ “It aap Lewi mendek ti, Iterali mendek aret kwe, it inenggela'me nen leenogo piige logomenggendik, inabin koorogo piyet o.

⁷ Ti eerogo piyoorak nogo yi aret. Inabin koo'naruwak nduk, niyo waganogo inoba werenogo piinok, ineeruwak inom, inomoori inom, inagabolo paga wonage abok aret mbanggologwe, inayum kookkologwe, eeruwak nduk, yoramenggendak eekwi iinok, inabin abu koorak aret arugun o.

⁸ Ti eeppunuk, tapi awooluk ngguunok warogo gandum yigirik abu abe tayitun amburu inom nenggelak-kenggelak eerogo punuk, ake puurak waganggwi, inomaluk lek eerogo piyoorak ake tapi ngguunok awooluk alik ambi waganggwi, eeruwak nduk, yoramenggendak ee'nuk, wonok wogwe iinok,

⁹ it aap Lewi mendek ti, an ninom lambungge minggim nawooliya wurik me tu unggwogo menggam time piya wa'nuk, it Iterali mendek abok aret time kuwak eeri woraawak nduk, yoraamunggun o.

¹⁰ Yoramenggendak time kuwak eeri wogwe iinok, it aap Lewi mendek Naliku ALA nenggaanom paga wonogwe iigak, it aakumi Iterali nen ineenggi it inanobak tebembiyaawak nduk, yoraamunggun o.

¹¹ Inanobak tebembiinok, at Karun nen, Kaliku ALA kake eeko logowak o, yinuk, it Iterali mendek nen leenogo piyamenggaarak nogo yi aret o, yinuk, titik niremenggerak ti paga Naliku ALA nake eeko logowak nduk, eerogo piyaagin o.

¹² Ti eeke kenok, it aap Lewi mendek nen tapi ngguunok imbirak inanobak paga ineenggi tebenogo piinok, ambi warogo inomaluk lek eerogo piyoorak ake pugwi, ambi warogo it Lewi mendek Naliku ALA ninom lambunik logorak ake pugwi, eeruwak o.

¹³ Ti eekwi iinok, it Lewi mendek nogo Karun apuri inom inowagam mippiinok, It aap yi, Kaliku ALA kake eeko logorak nogo yi aret o, yinuk, an titi'nirumunggun o.

¹⁴ Ti eeremenggendak paga it Lewi mendek ti, Iterali mendek aret kwe, Iterali inenggela'me nen leenogo piyamenggendak nake eeko logorak napuri aret logogun o.

¹⁵ Kat nen it Lewi mendek ti, inabin abu aret koorogo piige, It aap yi, Kaliku ALA kake o, yinuk, titi'nege, eeke keenok, ninom lambungge minggim nawooliya wurik me unggunuk, ineyabu unde eeppiyamenggendak nogo aret eeko logowak o.

¹⁶ It Lewi ti, Iterali mendek aret kwe, Iterali inenggela'me nen ineebe ambi yiluk ari kenok puk aga'lek mbelek togon nake eeko logorak it aret. It kumi Iterali inalitik-inalitak inaagalogwe aap manggu ndarak inobaane'me it Lewi mendek ti aret wogonabeegirak o.

¹⁷ O Metit mendek inapuri manggu ndarak inooke ne ti eyom paga Iterali inapuri manggu ndarak nake logowak nduk, leenogo piyareegirak me, it Iterali inapuri manggu ndarak inom, inaanggumi iyaalok ndarak inom, abok aret ti, an unde aret o.

¹⁸ Ndi, Iterali inapuri manggu ndarak abok aret inobaane'me aap Lewi mendek wogonabeegirak o.

¹⁹ An ninom lambungge minggim nawooliya wurik me akem time it Iterali mendek inake eekwi, it Iterali mendek o mage menggim nogome panggo yi wogwe iinok, kugilengga inoba age kero, Iterali nogo inomaluk lek eerogo punuk, ninom lambunik logokit nen koonogo piigwi, eeko logowak nduk, it Lewi mendek nen aap Karun apuri inom yeenggwaarogwe iinok, inale'nggen mbaruwak nduk, leenogo piyareegirak o,” yinuk, yoreegerak.

²⁰ Yoge mbareegi, at Muta inom, Karun inom, Iterali wonogwe abok aret inom, nen, Lewi mendek eeppiigo logorak Aliku ALA nen Muta yoreegerak nogo ndak-ndak, it Lewi mendek togop aret eeppiyareegwaarak.

²¹ Eeppiigwi iigak, inalitak lombok inabin kookkologwe, inayum kookkologwe, eeko mbareegwa, aap Karun nen, “Aap yi, Kaliku ALA kake leenak aret o,” yinuk, Aliku ALA titik ege nagagerik, inomaluk lek eerogo punuk, Ala inom lambunik logowak nduk, inabin koorogo piyareegerak.

²² Ti abu aret eeke mbareegi, it aap Lewi mendek ti, yabu eeko logowok nduk, Ala inom lambungge menggim awooliya wurik me unggwogo mbareegwa, eeko logorak Aliku ALA nen Muta yoreegerak ndak-ndak, it Karun apuri inom inarum wonogo logonet, yorogwe iinok, eeko nogogwaarak.

²³ At Aliku ALA nen Muta yoge logonet,

²⁴ “It aap Lewi mendek eeko logorak yoroorak nogo yi aret. Aap ndarak iigak tahun 25 eerak kuli nen nok, aginggwe ari noorak ti, ninom lambungge minggim nawooliya wurik me yabu eeko logowak o.

²⁵ Ndi, it tahun 50 age kenok perak, it yabu eekwi ti, ambinom eeko logorak mage me, we logowak nduk, teppiyet o.

²⁶ An ninom lambungge minggim nawooliya wurik me inoreewi ineyabu eekwi me, it yeenggwaarogo logorak op aret kwe, ineyabu ambi unde a'nuk eeko logorak ti perak, mage o. Aap Lewi mendek nen eeko logorak unde eeppiyoorak yoroorak nogo ti, togop aret o,” yinuk, yoreegerak o.