Linggineegwaarak 7 - Ala Wone Peenok Peebi Mbanak

Ala awooliya wurik leenogo pogo logonet eereegwaarak wone

¹ At Muta nogo Ala awooliya abu aret wuke nagagirik, ooliya wurik inom, yi mendek ndi mendek inikime akem time inom, Ala ake warogo kani kunggo logowam inom, yi mendek ndi mendek eekak yuurak ti paga inom, abok aret alik leenak logowak nduk, amburu werenogo pit nagagerak.

^2-3 Werenogo pit nage mbareegi, aakumi Iterali inoweewi inanebunu lenorogon ndegeninaka inawuri ineenggi linggininako nogogwaarak nogo nen Ala ake puwak nduk aap inowe ambit ake tapi eebe ambit punogo pugwi, ndi, aap inoweewi mbere inake nggweendo ambit punogo pugwi, eeppogo nogogwaarik, tapi ineebe 12 waganggwi, ndi, nggweendo 6 waganggwi, eeppunuk, wonok at Aliku ALA enggaanom paga awooliya wurik enaame taati Ala ake pi wogogwaarak.

⁴ Pi wogo mbareegwa, Aliku ALA nen Muta yoge logonet,

⁵ “An nake pi wagaarak ti, abok aret wamen o. Wagangge logomenggendik, it aap Lewi mendek an ninom lambungge minggim nawooliya wurik me nen yabu eeko logonet, it inalitak lombok eeriyak mbakwi kenok eeko logowak nduk, wogoret o.”

⁶ Yoge mbareegi, at Muta nen nggweendo inom, tapi inom, wagangge nagagerik, it Lewi mendek nogo wogorage logonet,

⁷ nggweendo mbere inom, tapi 4 inom, it inanebunu Nggeroton mendek eeriyak mbakwi nogo ndak-ndak eeruwak nduk wogorage,

⁸ nggweendo 4 inom, tapi 8 inom, it inanebunu Merari mendek aap Karun Aliku ALA unde aput Itamat nen inowe a'nuk inarum logonet, eeriyak mbakwi nogo ndak-ndak aret eeko logowak nduk, wogorage, eereegerak kwe,

⁹ it aap inanebunu Kekat mendek perak, yi mendek ndi mendek alik leenak Ala awooliya wurik me logorak unde eeppiyareegerak nogo inuum paga piyaninuk nugu logorak me, it ambi wogoroolik teppiyareegerak.

^10-11 At Aliku ALA nen Muta yoge logonet, “It aap Iterali inoweewi nogo nen an Ala nake warogo kani kunggo logowam alik leenogo amburu kilirogo puurak kenok, ne ambi paga at ambi wonok wage, ne ambi paga at ambi wonok wage, eeko logowak o,” yinuk, yoreegerak nogo yorage mbareegi, Ala ake warogo kani kunggo logowam alik leenogo amburu kilirogo puwak nduk, yi mendek ndi mendek wonok kani kunggo logowam enaame time Ala ake pi wogogwaarak nogo inendage yi o.

^12-83 Ala ake aa'nduk pi wagagerak nogo yi o, aap anebunu Yekura mendek endage Aminarap aput Nakaton nen aret pi wage, Nogo yinuk, ko'lu aap anebunu Itakat mendek inowe Tuwat aput Netanen nen aret pi wage, Nogo yinuk, ko'lu aap anebunu Tebulon mendek inowe Kelon aput Eliyap nen aret pi wage, Nogo yinuk, ko'lu aap anebunu Uruben mendek inowe Tiyereyut aput Elitut nen aret pi wage, Nogo yinuk, ko'lu aap anebunu Timeyon mendek inowe Turitiyarayi aput Telumiyen nen aret pi wage, Nogo yinuk, ko'lu aap anebunu Nggat mendek inowe Erekuwen aput Eliyatap nen aret pi wage, Nogo yinuk, ko'lu aap anebunu Eparayim mendek inowe Amikut aput Elitama nen aret pi wage, Nogo yinuk, ko'lu aap anebunu Manate mendek inowe Peratut aput Nggamaliyen nen aret pi wage, Nogo yinuk, ko'lu aap anebunu Mbeniyamin mendek inowe Nggireyoni aput Abiran nen aret pi wage, Nogo yinuk, ko'lu aap anebunu Ndan mendek inowe Amitiyarayi aput Akiyetet nen aret pi wage, Nogo yinuk, ko'lu aap anebunu Atet mendek inowe Okaran aput Pagiyen nen aret pi wage, Ndi, age yobok pi wagagerak nogo ti, aap anebunu Natali mendek inowe Enan aput Akira nen aret pi wage, eereegwaarak. Yi mendek ndi mendek inalitik-inalitak ambo'me-ambo'me wonok pi wogogwaarak nogo yi o. Ala ooliya wurik me onggo koonak wonage nogo ndak-ndak wakkagak tenggap mbuti perak paga ogobakkigirik aaninggin nogo ti, ambit eeppunuk, ambi oolo ari nage nogo inom, Niyo tookak togolowak mbuti perak paga ogobakkigirik aaninggin nogo ti, ambit negen inom, imbirak waganogo Gandum anggen abu obeelom yigirik amburu inom nenggelak-kenggelak aago yonggolak Ala ake titik eerogo pugwi nogo mendek inom, Niyo kombet waka mbuti emas mendek paga ogobakkigirik me obari abe kaga yonggolak nogo aaninggin abu mbuuluk, seratus sepuluh gram inom, Ala ake warogo kani kuniyak nduk tapi ngguunok ambi inom, Ndomba ngguunok ambi inom, ndomba ngguunok ndarak kagak tahun ambit eerak ambi inom, Ndi, inomaluk lek eerogo piyoorak nduk, Ala ake warogo puurak kambin ngguunok ambi inom, Ala inom lambunik logowak nduk warogo Aliku ALA ake wogoriyak tapi mbere inom, Ndomba ngguunok 5 inom, kambin ngguunok 5 inom, ndomba ngguunok ndarak kagak tahun ambit eerak 5 inom, inalitik-inalitak pi wogogwaarak nogo ti aret.

⁸⁴ At Aliku ALA ake warogo kani kunggo logowam alik leenogo amburu kilirogo puwak nduk, it aakumi Iterali inoweewi nen yi mendek ndi mendek wonok Ala ake pi wogogwaarak nogo ti, tenggap mbuti perak paga ogobakkigirik 12 inom, niyo toologo werenggak mbuti perak paga ogobakkigirik 12 inom, niyo kombet waka mbuti emas paga ogobakkigirik 12 inom, wonok pi wogogwaarak.

⁸⁵ Ndi, tenggap ambit aaninggin nogo ti, ambit eeppunuk, ambi oolo negen, ndi, niyo tookak ambit aaninggin nogo ti, oolo negen aret me, tenggap inom, niyo tookak inom, mbuti perak paga ogobakkigirik nogo apit lambunik aaninggin wakkogo logorak Ala awooliya wurik o magame koonak wonage nogo ndak-ndak aret wakkogo logonet, aaninggin 28 age,

⁸⁶ ndi, niyo kombet waka emas paga ogobakkigirik obari abe kaga toolak ambit aaninggin wakkogo logorak Ala awooliya wurik o magame koonak wonage nogo ndak-ndak aret wakkogo logonet, aaninggin mbuuluk, seratus sepuluh gram aret me, lambunik nogo ti, aaninggin ambit eeppunuk ambi oolo negen age, eereegerak.

⁸⁷ Ndi, Ala ake warogo kani kuniyak nduk, tapi ngguunok 12 inom, ndomba ngguunok 12 inom, ndomba ngguunok ndarak kagak tahun ambit eerak 12 inom, inomaluk lek eerogo piyoorak nduk Ala ake warogo wogoriyak kambin 12 inom, wonok wogo logonet, gandum anggen yigirik Ala ake wogoriyak inom aret pi wogogwaarak.

⁸⁸ It aakumi Ala inom lambunik logowak nduk, warogo wogoriyak lambunik ti, tapi ngguunok 24 inom, ndomba ngguunok 60 inom, kambin ngguunok 60 inom, ndomba ngguunok ndarak kagak tahun ambit eerak 60 inom, ti abok aret Ala ake warogo kani kunggo logowam alik leenogo amburu kilirogo pogo logonet, Ala ake warogo wogoreegwaarak nogo ti aret.

⁸⁹ Abu aret eeko mbareegwa, at Muta nogo at Aliku ALA imbirak wone mbaniyak nduk, Ala inom lambungge menggim ooliya wurik me time unggwi nanuk wonage kenok, Ala wone yugu aloobut mbanak me yonggolak abiringga narak irimbaga Ala inom lambungge menggim malayikat pogom kerub mbere aru-ogwe wonogwe iigak, Aliku ALA nogo oolo taati wambi wage nagaatik, wone Muta yoge nogo at Muta konengge nagagerak.