Linggineegwaarak 6 - Ala Wone Peenok Peebi Mbanak

Ala ake leenak logowak nduk ineeruwak mbangga'lek teppogo nogogwaarak wone

¹ At Aliku ALA nen Muta yoge logonet,

² “It aakumi Iterali wone yoroorak nogo yi aret. Aap ambi nen, An Aliku ALA ake aret leenak logokit o, yinuk, kumbuk mbangge menggi kwak, aakumi Iterali mendek aap a, kumi a, ineenik logonet, An Aliku ALA ake leenak aret logokit o, yinuk, kumbuk mbangge kenok,

^3-4 anggur amburu inom, amburu kumili kunggo menggaarak mendek inom, ti mendek paga amburu alik aago inom, anggur anggen mbanogo aambiranogo punuk toolak inom, anggur anggen obeelom mendek inom, anggur anggen woloonak mendek inom, yi mendek ndi mendek eyo anggur eebe paga inom, anggen paga inom, ti paga ogobakkigirik abok aret at kumbuk mbanemenggerak ti kuli nen nok, kuli pi namenggerak nogo paga nengge logorak mondok mage o.

⁵ Ndi, at nen, An Aliku ALA ake leenak aret logokit o, yinuk, kumbuk mbanemenggerak kuli nen nok kuli pi namenggerak nogo paga eeruwak mbangge, amboro mbangge, eeriyak mondok mage o. Ata, An Aliku ALA ake leenak logokit, yemenggerak kuli ari naga'lek kagak, Naliku ALA nake leenak logonet, eeruwak inom, amboro inom, mbangga'lek aret logowak o.

⁶ At nen, An Aliku ALA ake leenak logokit o, yinuk, kumbuk mbanemenggerak kuli nen nok pi namenggerak kuli paga nen at aakumi kambemenggaarak wonogwe me koorok panggorogon noorak mondok mage o.

⁷ At eeruwak ti, an Ala nake leenak wonage yelok kogo logowak nduk eerak wonage me, at agalo kambemenggerak a, ogoba kambemenggerak a, ata, oreeluk kwe a, aap a, ambi kambemenggerak a, mbaanggage kenok, lu kologo mengga kwak eebe maluk eekkolookwak, enegen pekka noorak mondok mage o.

⁸ Ala ake leenak logorak kumbuk mbanemenggerak nogo kuli ari naga'lek kagak Naliku ALA nake aret leenak logowak o.

⁹ Ndi, aap ambi nen, An neebe ti, Ala ake leenak me, neeruwak mbanigin lek o, yinuk, kumbuk mbanemenggerak nogo wonage kagak, enggaanom paga aap alik ambi yinip-panip kangge logonet, obari aap nogo eeruwak paga ninggiremenggerak wonage kagak nogo 6 yippunuk, obeelom nege logowak nduk, ko'lu paga eeruwak inom, amboro inom, mbanogo nappuwak o.

¹⁰ Ndi, nogo 7 yippunuk, ko'lu paga towe puume mbere a, towe kurona mbere a, wonok an ninom lambungge minggim nawooliya wurik me aap an neebe unde wonogwe me pi woraawak o.

¹¹ Pi wage kenok, it an neebe unde nogo nen towe ambi nogo wappunuk aap nogo omaluk lek eerogo pikit nduk, wo'nege, ndi, towe ambi nogo aap kambemenggerak obari eeruwak paga ninggiremenggerak nogo maluk aret aremenggerak me, lek eerogo punuk, ninom lambuniyak nduk, nggami aanggo wakwi kwak, warogo kani kungge, eeppunuk, ne ti eyom paga aret eeruwak nogo obaane'me obeelom wunduwak nduk, an nake leenogo pege logowak o.

¹² Ndi, at nen, An Aliku ALA ake leenak neegak ne ti kuli aret ari nawak o, yinuk, kumbuk mbanemenggerak nogo paga ndak-ndak ari naga'lek kagak maluk eeremenggerak nogo aberak mban wonage kenok, lek eerogo pikit nduk, ndomba aagaluk ndarak kagak tahun ambit eerak kenok, wonok an nake warogo kani kumbunuk, ne ambinom eebe Naliku ALA nake leenogo patuwak o.

¹³ Aap ambi nen, An Aliku ALA ake mondok leenak logokit o, yinuk, kumbuk mbanemenggerak nogo kuli paga abu aret ari nage kenok, at eeke logorak wone lengganogo yoriyak nogo yi aret. At kumbuk mbanemenggerak kuli abu ari nage kenok, at aap ti, wonok an ninom lambungge minggim nawooliya wurik tungga paga pi woraawak o.

¹⁴ Pi wogwe iinok, at aap nogo nen ndomba ngguunok ndarak kagak tahun ambit eerak awinde-obaande eerak lek obeelom kenok warogo kani kuniyak nduk wagangge, ndomba kooli ndarak kagak tahun ambit eerak awinde-obaande aago lek obeelom kenok, omaluk lek eerogo pikit nduk wagangge, ndi, ndomba ngguunok ambi ndarak kagak tahun ambit eerak awinde-obaande aago lek obeelom kenok, ninom lambunik logowak nduk, wagangge,

¹⁵ oroti ragi pugu lek, gandum abe yigirik amburu inom nenggelak-kenggelak aago ligilogom eeppunuk worarak inom, kuwe ragi pugu lek tabak amburu obaga labunogo punuk worarak inom, muun yarak me yonggolak wonage nogo wagangge, yi mendek ndi mendek anggen yigirogo nake kani kunggwi nogo mendek wagangge, amburu nake kilirogo puurak nogo wagangge, eeke logomenggerik, apit aret lambunogo Naliku ALA nake puwak nduk, aap an neebe unde nogo wogoruwak o.

¹⁶ Ndi, wogoge kenok, at aap an neebe unde nogo nen wonok nowagam wage logomenggerik, Naliku ALA nenggaanom paga aap nogo omaluk lek eerogo pikit nduk, ndomba kooli nogo nake pege, ndi, ndomba ngguunok nogo warogo nake kani kungge, eeruwak o.

¹⁷ Ti eeppunuk, ndomba ngguunok an ninom lambuniyak nduk kani kunggwi nogo mendek warogo Naliku ALA nake kani kungge logonet, oroti ragi pugu lek worarak muun yarak me wonage nogo, Yi Kaliku ALA kake o, yinuk, nake pege, gandum anggen yigirogo nake pege, amburu nonggo menggaarak nake kilirogo pege, eeruwak o.

¹⁸ An Aliku ALA ake leenak logokit o, yinuk, yemenggerak yelok kaawak nduk, eeruwak mbangga'lek teppemenggerak nogo ninom lambungge minggim nawooliya wurik tungga paga taati nen eeruwak mbanogo punuk, nimbirak lambunik logokit nduk, nake warak kani nengge me, time mambuwak o.

¹⁹ Naliku ALA nake leenak yelok kaawak nduk, eeruwak mbangga'lek logomenggerak nogo nen eeruwak mbanogo mambege kenok, aap an neebe unde nen ndomba obaak kinik larak wagangge, oroti ligilogom eerak inom, kuwe tabak inom, oroti ragi pugu lek worarak muun yarak me yonggolak wonage nogo ambitak wagangge, eeke logomenggerik, aap eeruwak mbanemenggerak nogo eenggi paga punuk,

²⁰ Yi Ala ake o, yinuk, titik eerogo wo'nugwi nogo mendek, Yi Kaliku ALA kake o, yinuk, titik eerogo wo'nege logomenggerik, aawi inom, ape uruwak inom, titik eerogo wo'nugwi nogo mendek obaak ti inom alik leenak aap an neebe unde inake aret me, wogorogo logowak o. Ti abu eekwi iinok, aap, An Aliku ALA ake leenak logokit o, yinuk, kumbuk mbanemenggerak nogo, anggur amburu nengge logorak op aret o.

²¹ Aap ambi, An Aliku ALA ake leenak ndogop logokit o, yinuk, kumbuk mbanemenggerak nogo, awo ari naga'lek kagak, maluk eekkolamenggerak onggo an Ala nen yereegirak kagak ambi inom oba lunogo pi woroorak mbake kenok, ti op aret kwe, Naliku ALA yagarak onggo pi wage logonet, eeke logorak wone yugu nogo ti aret. At kumbuk mbangge logonet, Ndogop eeke logokit o, yinuk, yemenggerak nogo ndak-ndak aret eeke logowak, yegerak, yoret o,” yinuk, yoreegerak.

Ala ale'nggen inoba piigo logorak wone

^22-23 At Aliku ALA nen Muta yoge logonet, “At Karun apurilogwe inom nen an nale'nggen aakumi Iterali inoba piigo logonet, wone yoroorak nogo yi aret.

²⁴ Aliku ALA ale'nggen kinoba pinagage, Liirogon aret ndegengginake,

²⁵ Aliku ALA pekkiige logonet, eya eerogo pinagage, Kinabuwa nen onggo lek we aret wokkirage,

²⁶ Aliku ALA ena koonogo pekkiige, Kiniki ambit lambunik nu'lek logomunggup nduk, eeppinagage, Eeke logogin o, yinuk,

²⁷ an nendage kunogo it aakumi Iterali togop yorogwe iinok, an nale'nggen mondok-mondok it inoba piige logogin o,” yinuk, yoreegerak.