Linggineegwaarak 36 - Ala Wone Peenok Peebi Mbanak

Telapekat apuri komologwe inogoba eyate koloorak wone

¹ At Yutup apuri wiganak mendek ambi at aput Manate aput Makit aput Nggileyat paga wiganak mendek inoweewi nen Muta inom, aap Iterali inoweewi inom, it Iterali ndarak lenorogon inarum menggaarak inom, wonogwe me inowagam nogo nogogwaarik,

² Muta yogo logonet, “Ninogoba wae. At Aliku ALA nen it aakumi Iterali mendek, O ngge koloorak kaamun? yinuk, iri'ngga mbanak waganggwi mugurok tumburirogo logorak yokkereegerak nogo ti, aap ninoreeluk Telapekat eyate nggween koloorak nogo ti, apuri komologwe unde aruwak nduk wogoraanu o, yinuk, yokkereegerak nogo yokkiri wogo o.

³ Togop kwe, it komologwe nogo Iterali inenggela'me time aap inanebunu alik ambi wogonakwi iinok, nggween inogoba eyate pugu nit ninanebunu mendek unde wonogwe nogo, it komologwe inogonggelomini aret unde arugun me, nggween nit ninore eyate nogo lek age,

⁴ ndi, tahun 50 inanggween unde kologwe nogo eyom panggoni wage paga, nggween at Telapekat eyate nogo apuri komologwe inogonggelomini aret unde arugun me, nggween nit ninanebunu mendek koloorak yugu nogo nit nineengge ndak-ndak age lek wobok ari, eerigin o.”

⁵ Yogo mbareegwa, at Aliku ALA nen, “Wone yi, aakumi Iterali mendek yoret o,” yinuk, yoge mbareegi, Muta nen aakumi Iterali wone lengganogo yorage logonet, “Wone aap Yutup ombowologwe wiganak mendek nen yogwe ti, abet aret yogwe me,

⁶ it komologwe Telapekat apurilogwe eeko logorak at Aliku ALA nen yegerak nogo yi aret. It inogonggelomini koloorak mbakwi kenok, koloorak op aret kwe, it inogobamini inom ndarak inanebunu ambit ti mendek kero kologo logowak o.

⁷ It Iterali mendek inanggween inogobamini ineyate ti, it inanebunu ti mendek mban aret kologo logorak me, inanebunu ambi nen inanebunu alik ambi wogoragak eeko logorak mondok mage o.

⁸ It aakumi Iterali inalitik-inalitak nggween inogobamini ineyate kologo logorak me, komologwe nen inogobamini ineyate kologo logorak mbakwi kenok, aap inogobamini inom ndarak mendek kenok mban inogonggelomini kologo logowak o.

⁹ Ndi, nggween inogobamini ineyate nogo ti, inanebunu ambi nen inanebunu alik ambi wogoragak eeko logorak mage me, it Iterali inanebunu ambit mendek mban inalitak unde logowak o,” yinuk, yoragagerak.

¹⁰ At Ala nen Muta yoreegerak nogo ndak-ndak it komologwe Telapekat apurilogwe

¹¹ Makala, Tirata, Kogala, Milaka, Nowa, it nogo nen inogoba inom ndarak inapurilogwe wiganak mendek aret inogonggelomini wogonabeegwaarak.

¹² It komologwe nogo nen wologwe inombo Yutup aput Manate paga wiganak mendek wogonabeegwaarak nogo paga nggween inogoba eyate nogo inanebunu alik mendek koloolik, it aret unde wonogogwaarak.

¹³ It aakumi Iterali mendek nogo o Yeriko enebagan wunggagak nggween Mowap niyo Yoraran aa'nggi paga time wonogwe iigak, at Aliku ALA nen, Yogop ee'nu ndogop ee'nu, wone yugu inom, eeko logorak wone koonak inom, it aakumi Iterali eeko logowak nduk, Muta yoreegerak nogo ti aret o.