Linggineegwaarak 30 - Ala Wone Peenok Peebi Mbanak

Kumbuk mbambunuk eeko logorak wone

¹ At Muta nen it Iterali inanebunu lombok inoweewi yorage logonet, “Aliku ALA nen wone lengganogo pegerak nogo yi aret o.

² Aap ambit ambi nen, An ndogop eeke logokit o, yinuk, kumbuk mbanogo Aliku ALA yoge ilik, Abet aret eerigin o, yinuk, wone abuk nggaruk togon koonogo pege a, eeremenggerak nogo taganogo puurak mage o. Ata, koonogo pemenggerak nogo ndak-ndak aret eeke logowak o.

³ Kolaga tawe ambi ogoba ame awo wonage logonet, An ndogop eerikit o, yinuk, kumbuk mbanogo Aliku ALA yoge ilik, Abet aret eerigin o, yinuk, wone abuk nggaruk togon koonogo pege a, eeke nogo

⁴ at kumbuk mbanemenggerak ilik, wone abuk nggaruk togon koonogo patemenggerak a, nogo ogoba aruk konengge logomenggerik, Togop eeriyak mage o, yinuk, yoga'lek, Op aret koonggerak, mbake kenok, at kumbuk mbambunuk yoge, wone abuk nggaruk togon koonogo pege, eerogo pemenggerak nogo, lek arigin lek me, at mondok eeke logowak aret o.

⁵ Ndi, at kumbuk mbangge, wone abuk nggaruk togon koonogo pege, eeremenggerak nogo, ogoba aruk konembunuk, Kat togop eeriyak mage o, yinuk, yoge kenok perak, at kumbuk mbangge, wone abuk nggaruk togon koonogo pege, eeremenggerak nogo, ogoba nen, Eerugun o, yinuk, yoremenggerak paga Aliku ALA nen kwe ti maluk yorigin lek teppigin o.

⁶ Ndi, Ndogop eerigin o, yinuk, kumbuk mbangge ilik, perak togon, Abet aret eerigin o, yinuk, wone abuk nggaruk togon koonogo pege a, eeppunuk, ogonggelo kolage logomenggerik,

⁷ kolaga'lek kagak yemenggerak nogo, ogonggelo aruk konembunuk, Togop eeriyak lek me eekendak o, yinuk, akwe yoga'lek puk age kenok, at kumbuk mbangge a, wone abuk nggaruk togon koonogo pege a, ti lek arigin lek me, eeke logowak aret o.

⁸ Ndi, kolaga'lek kagak yemenggerak nogo ogonggelo konembunuk, Togop eeriyak mage kagak eekendak o, yinuk, at kumbuk mbanemenggerak a, perak togon wone abuk nggaruk togon koonogo pemenggerak a, lek eerogo pege kenok, Aliku ALA nen kwe ti, maluk yorigin lek, teppigin aret o.

⁹ Kwe nanu pugu ilik, kwe mbo pugu a, nen, Ndogop eerikit o, yinuk, kumbuk mbangge ilik, Abet aret eerigin o, yinuk, wone abuk nggaruk togon koonogo pege a, eeko logomenggaarik kenok ti, lek ariyak lek me, wone ti, eeko logowak aret o.

¹⁰ Kwe ambi ogonggelo imbirak wonogo logonet, Ndogop aret eeke logokit o, yinuk, kumbuk mbangge ilik, Abet aret eerikit o, yinuk, wone abuk nggaruk togon koonogo pege a, eeremenggerak nogo

¹¹ ogonggelo aruk konengge logomenggerik, Togop eeriyak mage o, yinuk, yoga'lek puk mban wonage me, kwe nogo nen kumbuk mbangge ilik, wone abuk nggaruk togon koonogo pege a, eeremenggerak nogo ti, lek arigin lek eeke logowak aret o.

¹² Togop eeriyak kwe, ogonggelo nen akwe yemenggerak nogo aruk konengge logomenggerik, Nakwe togop eerigin lek o, yinuk, ari kenok, akwe nen kumbuk mbangge ilik? wone abuk nggaruk togon koonogo pege a? eeremenggerak nogo, eeka'lek mbo puurak op aret o. At ogonggelo nen lek eerogo pemenggerak me, Aliku ALA nen akwe ti, maluk yorigin lek, teppigin o.

¹³ Akwe nen, Ndogop eerigin o, yinuk, kumbuk mbangge a, Niniki tiyanak neyoorak neebi o, yinuk, wone abuk nggaruk togon koonogo pege a, eeremenggerak nogo, Eeriyak op aret, yoge a, Eeriyak lek, yoge a, ti, ogonggelo nen mban koonogo yoge logowak o.

¹⁴ Togop yoriyak kwe, ogonggelo nen ko'lu-kii'me yoga'lek puk mban wonage ti paga akwe nen kumbuk mbangge a, wone abuk nggaruk togon koonogo pege a, eeke logowak nduk, wone ti omaawi eerogo pege menggerak. Yemenggerak aruk konenemenggerak kwe, Eeriyak, ilik, Eeriyak mage, a, yoga'lek ti paga akwe ti, eeruwak nduk wone omaawi eerogo pege menggerak.

¹⁵ Ndi, yemenggerak aruk konembunuk, Eeriyak, ilik, Eeriyak mage, a, yinuk, akwe mbet-mbet yoga'lek ti paga akwe wone koonogo pemenggerak eeka'lek kenok maluk oba ariyak nogo, akwe oba arigin lek at ogonggelo oba lombok aret oba arigin, yegerak me, yokkiragi o,” yinuk, yoragagerak.

¹⁶ Aap akwe imbirak eeko logorak wone inom, aap ambi apuluk kolaga awo tawe ogoba imbirak logonet, eeko logorak wone inom, Aliku ALA nen Muta lengganogo yoge mbareegi, yoragagerak nogo ti aret.