Linggineegwaarak 3 - Ala Wone Peenok Peebi Mbanak

It aap Lewi mendek wone

¹ At Muta karume puut Tinayi paga wonage me, at Aliku ALA nen Muta Karun imbirak it mendek wiganak paga eeko logorak yoreegerak nogo yi aret o.

² At Karun apuri ndaganabeegerak nogo inendage ti, manggu Narap. Narap ambo'me Abiku, Abiku ambo'me Eleyatat, ndi, Eleyatat ambo'me Itamat.

³ At Karun apuri yi nen Ala unde logonet, eeko logowak nduk, amburu kilirogo piinok, inanobak tebeneegerak.

⁴ Togop aret kwe, it Narap Abiku imbirak nogo nen karume puut Tinayi paga time Aliku ALA ake kani kunggo logonet, Ala aga'ni nogo paga lek kani kunik alik mendek waganogo kunggo mbareegwa, at Aliku ALA enggaanom paga imbirak taati aret kambeegwaarak. Ndi, it imbirak inapuri ndaganabulik inayome lek aret me, inogoba Karun nogo awo kangga'lek eenik kagak, at apuri Eleyatat Itamat imbirak mban Ala unde wonogo logonet, yabu eeko nogogwaarak.

Aap Lewi mendek Aliku ALA unde logowak nduk, leenogo piyareegerak wone

⁵ At Aliku ALA nen Muta yoge logonet,

⁶ “It aap inanebunu Lewi mendek nen an neebe unde Karun yeenggwaago logowak nduk, owagam woraawak nen yoret o.

⁷ It nen Karun yeenggwaagwi, an nawooliya wurik me ninom lambungge minggim time it aakumi Iterali mendek abok aret inake eekwi, eeko logowak nduk, mippiigwi iinok, it ineyabu ti aret eeko logowak o.

⁸ An ninom lambungge minggim nawooliya wurik me, yi mendek ndi mendek eeko menggaarak unde wonogwe, ndi, aakumi Iterali inake eekwi, eeko logonet, nawooliya wurik me eeko logowak nduk, mippiyamenggaarak nogo aret eeko logowak o.

⁹ Karun apuri inom yeenggwaarogo logowak nduk, it inanebunu Lewi mendek mban Iterali inenggela'me nen leenogo Karun wogoru o.

¹⁰ Ndi, at Karun apuri inom mban an neebe unde logonet, ineyabu eeko logowak nduk, unde eeppiyet o. Unde eeppiyamenggendak eekwi me, aakumi we ugun mendek nen wogwe iinok, ineebe mondok inoorogo piige logomunggun o,” yinuk, yoreegerak.

¹¹ Yoge nagagerik, at Aliku ALA nen Muta ambinom yoge logonet,

^12-13 “Manggu nda'nogwe iinok ti, an unde aret me, kumi Iterali mendek inaagalogwe manggu aap ndarak eerukwak inobaane'me it Lewi mendek nen an nake eeko logowak nduk, it Iterali inenggela'me nen leenogo piigirak me, inanebunu Lewi mendek ti, an unde aret o. An nen it Metit mendek inapuri manggu ndarak inooke logonet, it Iterali inapuri manggu ndarak inom, inaanggumi aa'nduk ndarak inom, inoorulik, inili eerogo nake leenogo pateegirak me, inapuri manggu ndarak inom, inaanggumi iyaalok ndarak inom, ti an unde aret logowak o, yinuk, Naliku an ALA nen aret yagi o,” yinuk, yoreegerak.

Lewi mendek inendage liiru mbaneegwaarak wone

¹⁴ Yoge nagagerik, Muta nogo karume puut Tinayi paga wonage me, Aliku ALA nen at yoge logonet,

¹⁵ “It aap inanebunu Lewi mendek mogonak nogo inom, ineebe ndarak lenorogon inom, ndarak iigak, tut ambit penenggerak kuli nen nugwa agi penenit noorak kuli abok aret aap mban inendage liiru mbanu o.”

¹⁶ Yoge mbareegi, at Muta nogo at Aliku ALA nen yoreegerak nogo ndak-ndak aret inendage liiru mbaneegerak.

¹⁷ At Lewi apuri ndaganabeegerak inendage ti, Nggeroton, Kekat, Merari aret.

¹⁸ Ndi, at Nggeroton nen apuri Libini Timeyi imbirak ndaganake,

¹⁹ at Kekat nen apuri Amaram, Yitakat, Keboron, Utiyen ndaganake,

²⁰ ndi, at Merari nen apuri Makili Muti imbirak ndaganake, eerit wundi wogo logonet, anebunu Lewi mendek ambik wigannogogwaarak nogo ndarak ndegek lombok inendage ti aret o.

²¹ At Nggeroton paga nen aap Libini mendek wiganogo piige, aap Timeyi mendek wiganogo piige, eereegerak me, aap Nggeroton paga wiganak it ti aret.

²² It ndarak iigak, tut ambit penenak kuli nen nok, aginggwe penenit nagagerak kuli abok aret aap mban ineebe ineenggi lingginik ti, tujuh ribu lima ratus aret.

²³ It aap Nggeroton paga wiganak ti, punogo piyareegerak ndak-ndak, Ala awooliya wurik ambokan oonegen kilu yi nage menggim pa'nggwe inawooliya wuppatinuk, logonuk, wogo nogogwaarak.

²⁴ Ndi, it aap Nggeroton paga wiganak inowe ti, aap Layen aput Eliyatap aret.

²⁵ It Nggeroton mendek nen Ala inom lambungge menggim awooliya wurik ndegenggo logorak unde eeppiyareegwaarak ti, ooliya wurik inom, oo'ngget lumba-lumba agabolo mbiganogo maaka nogo inom, Ala inom lambungge menggim awooliya wurik tu unggwogo menggam yum tabak tugungga inom,

²⁶ oore'nggam yengget-wangget yum tugunit naga inom, awooliya wurik oore'nggam tu unggwogo menggam yum tugungga inom, Ala ake warogo wogogo menggam inom, keele abok aret inom, Ala inom lambungge menggim awooliya wurik me eeko menggaarak yi mendek ndi mendek abok aret unde wonogogwaarak.

²⁷ At Kekat nen aap Amaram mendek inom, aap Yitakat mendek inom, aap Keboron mendek inom, aap Utiyen mendek inom, wiganogo piyareegerak me, Kekat paga wiganak nogo, it ti aret.

²⁸ It ndarak iigak tut ambit penenak kuli nen nok, agi penenit nagagerak kuli abok aret aap mban ineebe lingginik ti, delapan ribu enam ratus aret. It aap Kekat paga wiganak ti, ooliya wurik ko mage menggim ndegenggo logorak unde eeppiyareegwaarak.

²⁹ Aap Kekat mendek paga wiganak ti, punogo piyareegerak ndak-ndak Ala awooliya wurik o ame pa'nggwe inawooliya wuppatinuk, logonuk, wogo nogogwaarak.

³⁰ Ndi, it aap Kekat paga wiganak inowe ti, aap Utiyen aput Elatapan aret.

³¹ It ndegenggo logorak unde eeppiyareegwaarak nogo ti, Ala aloobut mbanak inom, oroti pegak eyo ndoonak inom, ndi wuninogo pegak inom, Ala ake warogo wogogak inom, mage menggim aakumi inake eeko logonet, eekak yi mendek ndi mendek inom, yum oolo tugungga inom, mage menggim logonet, eekak yi mendek ndi mendek apit aret it unde wonogogwaarak.

³² Ndi, aap Lewi mendek inarum logorak inowe tiyanak lombok nogo ti, aap Ala unde Karun aput endage Eleyatat aret me, it mage menggim ndegenggo logorak unde nogo, “Op eekwi ilik, lek a?” yinuk, liippiige nagagerak.

³³ At Merari nen aap Makili mendek wiganogo piige, aap Muti mendek wiganogo piige, eereegerak me, aap Merari paga wiganak nogo, it ti aret.

³⁴ It ndarak iigak, tut ambit penenak kuli nen nok, agi penenit nagagerak kuli abok aret aap mban ineebe lingginik ti, enam ribu dua ratus aret.

³⁵ It aap Merari paga wiganak mendek inowe ti, aap Abikayin aput Turiyen aret. Ndi, punogo piyareegerak ndak-ndak Ala awooliya wurik o omarip paga pa'nggwe inawooliya wuppatinuk, logunuk, wogo nogogwaarak.

³⁶ It Merari mendek nen Ala awooliya wuko logonet, eekak unde eeppiyareegwaarak nogo ti, kobat inom, eyo karo-karo nappegak inom, owak mippegak inom, owak mippegak iyok inom, ooliya wuko logonet eeko menggaarak abok aret unde wonogwe,

³⁷ ndi, owa'nagat yendok-wandok wurit nogo logonet, owak mippegak inom, owak mippegak iyok inom, keele puguni nagak yinggak eyo inom, keele inom, abok aret unde wonogwe, eeko nogogwaarak.

³⁸ Ala inom lambungge menggim awooliya wurik enaame oonegen lagi wage menggim pa'nggwe time punogo piyareegerak ndak-ndak Muta Karun inapuri inom nen inawooliya wuppatinuk, logonuk, wogo nogogwaarak. It nen Iterali inake eekwi o mage menggim time eeko logorak unde eeppiyareegwaarak me, aakumi ugun mendek nen o mage menggim time panggo yi nogwe iinok, inoorogo piyoorak yogo nogogwaarak.

³⁹ Aliku ALA nen Muta Karun imbirak yoragagerak ndak-ndak it aap Lewi mendek ndarak iigak, tut ambiret penenak kuli nen nok, agi penenit nagagerak kuli abok aret inanebunu mugurok aap mban ineebe lingginogo piyareegwaarak nogo ti, dua puluh dua ribu aret.

⁴⁰ Aliku ALA nen Muta yoge logonet, “Aakumi Iterali mendek aap manggu ndarak iigak tut ambit penenak kuli nen nok, agi penenit nagagerak kuli abok aret ineebe lingginogo piinok, inendage liiru mbanogo piyet o.

⁴¹ Ndi, an ti, Naliku ALA aret me, it Iterali mendek inapuri aap manggu ndarak inobaane'me it aap Lewi mendek wogonake, ndi, it aap Iterali mendek inaanggumi iyaalok ndarak obaane'me it aap Lewi inaanggumi wagangge, eeru o,” yinuk, yoreegerak.

⁴² Yoge mbareegi, Aliku ALA nen yoreegerak nogo ndak-ndak at Muta nen aap Iterali mendek manggu ndarak abok aret inendage liiru mbanogo pereegerak me,

⁴³ aap manggu ndarak iigak tut ambit penenak kuli nen nok, agi penenit nagagerak kuli abok aret aap mban inendage liiru mbanogo pereegerak ineebe lambunik ti, dua puluh dua ribu dua ratus tujuh puluh tiga aret.

⁴⁴ Aliku ALA nen Muta yoge logonet,

⁴⁵ “It Iterali mendek aap manggu ndarak abok aret inobaane'me it aap Lewi mendek wogonake, it Iterali mendek inaanggumi iyaalok ndarak inobaane'me it Lewi mendek inaanggumi wagangge, eeru o. Ndi, an ti, Naliku ALA aret me, it aap Lewi mendek ti, an napuri nake eeka aret o.

⁴⁶ It Lewi mendek inom, it Iterali mendek aap manggu ndarak inom, ineebe ineenggi lingginogo wakkogo logonet, it Lewi mendek ndak-ndak arulik Iterali mendek ineebe ambik dua ratus tujuh puluh tiga agaarak me,

⁴⁷ Ala awooliya wurik me syikal ambiret onggo puurak wone yugu ndak-ndak aaninggin wakkogo logonet, wu 20 gera aret me, ineebe dua ratus tujuh puluh tiga ambik agaarak obaane'me inalitak wu syikal 5 aret wagangge logot o.

⁴⁸ Wagangge logomenggendik, it Iterali aap manggu ndarak ineebe ambik arit nogwe iinok, inobaane'me wu ti aret pogo logorak me, pugu nogo aap Karun apuri inom wogoraamunggun o,” yinuk, yoreegerak.

⁴⁹ Yoge mbareegi, it aakumi Lewi mendek inobaane'me Iterali mendek aap manggu ndarak ineebe ambik agagerak inobaane'me wu pugu nogo, at Muta nen aret waganeegerak.

⁵⁰ Ala awooliya wurik me syikal ambit onggo puurak wone yugu mugurok Iterali manggu ndarak inobaane'me inawu pereegwaarak ti, wu mbuti perak aaninggin 15 aret agagerak.

⁵¹ At Aliku ALA nen Muta yoreegerak nogo ndak-ndak Muta nen aakumi inobaane'me wu waganeegerak nogo, at Karun apuri inom wogoragagerak.