Linggineegwaarak 29 - Ala Wone Peenok Peebi Mbanak

Tahun ambi unggwi wage paga eeko logorak wone

¹ Yoge nagagerik, ambi yoge logonet, “Tut 7 penenak tanggal 1 ari wage kenok, yabu nggwok eeka'lek kuwak eeppunuk, nalut eeko logowak o. Ne ti paga oone nggwok eeka trompet nogo oone pu eeko logowak o.

² Ne ti paga mban obari abe kage logonet, Naliku ALA nale'nggen kaakit nduk, nake kani kunggo logorak tapi ngguunok awooluk ambiret inom, ndomba ngguunok ambiret inom, ndomba ngguunok awoologwe ineebe 7 ndarak iigak tahun ambiret eerak inom, inawinde-inobaande eerak lek kenok mban wonok pi wogo logowak o.

³ Tapi ngguunok nake pi wogo logonet, gandum yigirik abu abe nake puurak 6 liter negen wakkagak toolak waganogo, tayitun amburu inom amok mbanogo punuk, pi wogwe, ndomba ngguunok nake pi wogo logonet, gandum yigirik abu abe nake puurak 4 liter negen wakkagak toolak waganogo, tayitun amburu inom amok mbanogo punuk, pi wogwe,

⁴ ndi, ndomba awoologwe ineebe 7 nogo, ambitak mban nake pi wogo logonet, ineengge ndak-ndak gandum yigirik abu abe nake puurak 2 liter negen wakkagak toolak waganogo, tayitun amburu inom amok mbanogo punuk, pi wogwe, eeko logowak o.

⁵ Eeko logonet, inomaluk lek eerogo punuk, ninom lambunik logorak ake kambin ngguunok ambi pi wogo logowak o.

⁶ Alitik-alitak pi wogo logorak nogo ti, tut ngget penengge, o weege, eeke kenok, nake warogo kani kunggo logonet, gandum yigirik nake pugwi, amburu nake kilirogo pugwi, eeko logorak wone koonak ndak-ndak eeko logorak nogo ti, mbo puurak lek inom aret eeko logowak o. Nake warogo kani kunggo logorak nogo ti, obari abe kage logonet, Naliku ALA nale'nggen kage minggirak nogo mendek aret me, eeko logowak, yegerak, yoret o,” yinuk, yoreegerak.

Inomaluk lek eerogo piige kenok, Ala ninom lambumbunuk eeko logorak wone

⁷ Ambi yoge logonet, “Tut 7 penenak tanggal 10 tut ti paga yabu eeka'lek mbi mbo punuk, inambe nage negen logonet, kuwak eeppunuk, nalut eeko logowak o.

⁸ Ne ti paga obari abe kage logonet, Naliku ALA nale'nggen kaakit nduk, nake kani kunggo logorak tapi ngguunok awooluk ambiret inom, ndomba ngguunok ambiret inom, ndomba ngguunok awoologwe ineebe 7 ndarak iigak tahun ambiret eerak inom, inawinde-inobaande eerak lek kenok mban wonok pi wogo logowak o.

⁹ Tapi ngguunok nake pi wogo logonet, gandum yigirik abu abe nake puurak 6 liter negen wakkagak toolak waganogo, tayitun amburu inom amok mbanogo punuk, pi wogwe, ndomba ngguunok nake pi wogo logonet, gandum yigirik abu abe nake puurak 4 liter negen wakkagak toolak waganogo, tayitun amburu inom amok mbanogo punuk, pi wogwe,

¹⁰ ndi, ndomba awoologwe ineebe 7 nogo ambitak mban nake pi wogo logonet, ineengge ndak-ndak gandum yigirik abu abe nake puurak 2 liter negen wakkagak toolak waganogo, tayitun amburu inom amok mbanogo punuk, pi wogwe, eeko logowak o.

¹¹ Ti eeko logonet, inomaluk lek eerogo puurak ake kambin ngguunok ambi pi wogo logowak o. Inomaluk lek eerogo punuk, an ninom lambunik logorak nogo ake pi wogwe, nake warogo kani kunggo logonet, gandum yigirik nake puurak inom, amburu kilirogo nake puurak inom, pi wogo logorak nogo ti, mbo puurak lek, inom aret pi wogo logowak, yegerak, yoret o,” yinuk, yoreegerak.

Inawooliya wurit wogogwaarak aberogo laago lako logorak wone

¹² Ambi yoge logonet, “Tut 7 penenak tanggal 15 tut ti paga yabu nggwok eeka'lek kuwak eeppunuk, Naliku ALA nalut eeko logowak o. Eeko logonet, inale'nggen nen nelaago lakwi iigak, ne 7 ari nawak o.

¹³ Ne ti paga obari abe kage logonet, Naliku ALA nale'nggen kaakit nduk, nake kani kunggo logorak tapi ngguunok awoologwe ineebe 13 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, ti apit aret inawinde-inobaande eerak lek mban pi wogo logowak o.

¹⁴ Tapi ngguunok ineebe 13 nogo pi wogo logonet, ineengge ndak-ndak gandum yigirik abu abe 6 liter negen wakkagak toolak waganogo, tayitun amburu inom amok mbanogo punuk, nake pi wogwe, ndomba ngguunok mbere nogo pi wogo logonet, ineengge ndak-ndak gandum yigirik abu abe 4 liter negen wakkagak toolak waganogo, tayitun amburu inom amok mbanogo punuk, nake pi wogwe,

¹⁵ ndomba awoologwe ineebe 14 pi wogo logonet, ineengge ndak-ndak gandum yigirik abu abe 2 liter wakkagak toolak waganogo, tayitun amburu inom amok mbanogo punuk, nake pi wogwe, eeko logowak o.

¹⁶ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu kilirogo nake puurak inom, pi wogo logorak nogo ti, mbo pega'lek inom aret pi wogo logowak o.

¹⁷ Nogo ambi yinuk, ko'lu lariyak ake ti, tapi ngguunok awoologwe ineebe 12 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, ti abok aret inawinde-inobaande eerak lek kenok mban pi wogo logowak o.

¹⁸ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

¹⁹ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

²⁰ Nogo mbere yinuk, ko'lu lariyak ake ti, tapi ngguunok ineebe 11 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, it abok aret inawinde-inobaande eerak lek kenok mban pi wogo logowak o.

²¹ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

²² Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo menggaarak nogo ti, mbo pega'lek inom aret pi wogo logowak o.

²³ Nogo kenagan yinuk, ko'lu lariyak ake ti, tapi ngguunok ineebe 10 inom, ndomba ngguunok mbere inom, ndomba awoologwe ineebe 14 ndarak iigak tahun ambiret eerak inom, ti abok aret inawinde-inobaande eerak lek kenok mban pi wogo logowak o.

²⁴ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

²⁵ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

²⁶ Nogo 4 yippunuk, ko'lu lariyak ake ti, tapi ngguunok ineebe 9 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, ti abok aret inawinde-inobaande eerak lek kenok mban pi wogo logowak o.

²⁷ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

²⁸ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

²⁹ Nogo 5 yippunuk, ko'lu lariyak nogo ake ti, tapi ngguunok ineebe 8 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, ti abok aret inawinde-inobaande eerak lek kenok mban pi wogo logowak o.

³⁰ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

³¹ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

³² Nogo 6 yippunuk, ko'lu lariyak nogo ake ti, tapi ngguunok ineebe 7 inom, ndomba ngguunok mbere inom, ndomba ngguunok awoologwe ineebe 14 ndarak iigak tahun ambiret eerak inom, ti abok aret inawinde-inobaande eerak lek kenok mban pi wogo logowak o.

³³ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

³⁴ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

³⁵ Nogo 7 yinuk, ko'lu yabu nggwok eeka'lek inale'nggen nen kuwak eeko logowak o.

³⁶ Kuwak eeppunuk, nake warogo kani kunggwi obari kage logonet, Naliku ALA nale'nggen kaakit nduk, nake warogo kani kunggo logorak tapi ngguunok ambiret inom, ndomba ngguunok ambiret inom, ndomba ngguunok awoologwe ineebe 7 ndarak iigak tahun ambiret eerak inom, it abok aret inawinde-inobaande eerak lek kenok mban nake pi wogo logowak o.

³⁷ Tapi ngguunok inom, ndomba ngguunok inom, ndomba awoologwe inom, pi woroorak koonak nogo ndak-ndak pi wogo logonet, ineengge ndak-ndak gandum yigirik nake puurak inom, amburu nake kilirogo puurak inom, pi wogo logowak o.

³⁸ Pi wogo logonet, inomaluk lek eerogo piyoorak ake kambin ngguunok ambiret inom pi wogo logowak o. Ti pi wogo logorak nogo ti, nake warogo kani kunggo logonet, gandum yigirik nake puurak inom, amburu nake kilirogo puurak inom, pi wogo logorak nogo ti, mbo pega'lek inom aret pi wogo logowak o.

³⁹ Ndogop wokkirigin o, yinuk, nake nggomoorogo pugwi, onggo lek we iniki ale'nggen paga wo'nugwi, eeko logonet, laago larit nogo logorak wone koonak nogo paga Naliku an ALA nake pogo logorak nogo ti, nake warogo kani kunggwi, gandum yigirik nake pugwi, amburu nake kilirogo pugwi, ninom lambunik logowak nduk, nake pugwi, eeko logorak ti aret, yegerak, yoret o,” yinuk, Muta yoreegerak.

⁴⁰ Yoge mbareegi, Aliku ALA nen at Muta yoreegerak nogo ndak-ndak aret it aakumi Iterali mendek yoragagerak o.