Linggineegwaarak 25 - Ala Wone Peenok Peebi Mbanak

Iterali nen o Peyot unde menggerak kugi Mba'an alut eereegwaarak wone

¹ It aakumi Iterali mendek nogo o Titim kobappaga time ari nanuk wonogo logonet, kumi Mowap mendek ugun aret wuginabit nogo nogogwaarak.

² Nogo mbareegwa, it kumi Mowap mendek nen inagugi aanggo warogo lako logonet, “Ninom laruwi o,” yinuk, it aap Iterali mendek yorogwe iinok, inom aret inagugi alut eekwi, kugi aanggo warak larak nogo nunggwi, eeko nogogwaarak.

³ It aakumi Iterali mendek nogo aakumi Mowap mendek inagugi Mba'an o Peyot unde menggerak nogo inom aret alut eeko mbareegwa, ti eekwi paga at Aliku ALA anini ka'luk aagi negen inikime mi'nagagerak.

⁴ Anini mi'nage nagagerik, Muta yoge logonet, “It aakumi Iterali eeppiyookwak, Naliku ALA nanini ka'luk aagi negen ninikime mi'nagaarak nogo lek aruwak nduk, it aakumi yi, inoweewi wone lengganinaka abok aret ineebe pippiinok, Naliku ALA nenggaanom paga tena'me aret inoorogo piyet o.”

⁵ Yoge mbareegi, at Muta nen it aap Iterali mendek inowak loonggo menggaarak nogo yorage logonet, “Kit kinalitak kinawuri lombok o Peyot unde menggerak kugi Mba'an alut eerit nogogwaarak nogo abok aret inoorogo piinet nanip o,” yoragagerak.

⁶ Ndi, at Muta inom, it aakumi Iterali abok aret inom, Ala inom lambungge menggim awooliya wurik me tungga paga taati nen leenggu maakwi inigen iigak, aap Iterali mendek ambi nen kwe Miriyan mendek ambokan luwok togon ee'nuk ooliya wurik me wonok unggwi nage

⁷ at Ala unde Karun ombooluk Eleyatat apuluk Pinekat nogo nen enegen kage nagagerik, aakumi kuwak aago wonogwe nogo inenggela'me nen wooluwak ambi kambok togon wonok,

⁸ aap Iterali mendek kwe nogo imbirak muguren ooliya wurik me akem time unggunuk, wooluwak paga aap Iterali nogo inom, kwe nogo inom, imbirak inaanogum peenok polok togon inoorogo piyareegerak. Ti inoorogo piyareegerak paga at Aliku ALA nen Iterali mendek andi inoba piyareegerak nogo lek aret agagerak.

⁹ Ndi, eegu inooreegerak kambeegwaarak nogo ti, ineebe lambunik dua puluh empat ribu aret o.

¹⁰ Ti'nuk, at Aliku ALA nen Muta yoge logonet,

¹¹ “An neebi nen it aakumi Iterali lek eerogo piyookwak, an mban nayuk warak logokit nduk, naana'le mbanggolage minggi kwak, aap an neebe unde Karun ombooluk Eleyatat apuluk Pinekat ti nen, It aakumi Iterali yi, Aliku ALA alik mban ayuk wuko logowak o, yinuk, mondok mi'nage nagaarik, naana'le mbangge logonet, eekerak paga nanini nen aakumi Iterali eeppiyoorak mbakirak nogo, lek eerogo punuk, niniki yanggonogo panegerak me,

¹² at Pinekat nimbirak lambunik logonet, eeke logokit nduk, wone abuk nggaruk togon yoriyak nogo yi aret.

¹³ At ogoba Ala an nayuk warak logokit nduk, mondok mi'nage logonet, naana'le mbangge, it aakumi Iterali mendek inooke neyo, inagap ndarogo maluk mbet-mbet aret nggarengge, eekerak ti paga at inom, apuri-ombowologwe wigannarit nogo logogun paga inom, an neebe mondok-mondok unde logowak o, yinuk, wone abuk nggaruk togon yegerak, yorumunggun o,” yinuk, yoreegerak.

¹⁴ Aap Iterali kwe Miriyan mendek imbirak wonage me, wareegerak nogo ti, anebunu Timeyon mendek inowe aap Talu apuluk endage Timiri aret o.

¹⁵ Ndi, kwe Miriyan mendek wareegerak nogo ti, aakumi Miriyan mendek inowe aap Tut aput kwe endage Kotibi aret o.

¹⁶ Ti'nuk, at Aliku ALA nen Muta yoge logonet,

^17-18 “It aakumi Miriyan mendek nen, Ninom wim mbanak aret o, kinombako logonet, kinambokan laganogo, O Peyot unde menggerak kugi Mba'an ninom alut eeruwok o, yorogo mbareegwa, Iterali eereegwaarak paga andi nggwok inoba wigak ari mbareegi, aap Miriyan mendek inowe apuluk kwe Kotibi wareegerak me, It aap Miriyan mendek ninom wim mbanak o, yinuk, ineebe mondok inoorogo piyaanip o,” yinuk, yoreegerak.