Linggineegwaarak 23 - Ala Wone Peenok Peebi Mbanak

At Mbileyam nen peebi eeriyak wone yoreegerak wone

¹ At Mbileyam nen Mbalak yoge, “Kat warogo kani kunggak an nake 7 kuli o yime ogobakkigirogo punuk, tapi ngguunok 7 punogo pege, ndi, ndomba ngguunok 7 punogo pege, eeru o.”

² Yoge mbareegi, Mbalak nen Mbileyam yoreegerak nogo ndak-ndak eeke logonet, tapi ngguunok ambi wagangge, ndomba ngguunok ambi wagangge, eeppunuk, warogo kani kunggo logowam 1 nen 7 kuli ogobakkigirik nogo paga pit nagagerak.

³ Pit nage mbareegi, at Mbileyam nen Mbalak yoge, “Aliku ALA nen wone ambi yo'niriyak kagak eerukwak, an tayorogon nage logominggirik, at Aliku ALA nimbirak lambumbunuk, wone yo'nege kenok, yokkiri woraakit nduk, warogo kani kunik me ya'i mi'ndak logot o.” Yo'nuk, puut eerilek paga time ari nanuk wonage me,

⁴ Ala ka wage mbareegi, at Mbileyam nen wone yoge logonet, “An nen warogo kani kunggo logowam 7 kuli ogobakkigirogo punuk, tapi ngguunok ambi wagangge, ndomba ngguunok ambi wagangge, eeppunuk, warogo kani kunggak 1 nen 7 kuli ogobakkigirik nogo paga pit nagarak o.”

⁵ Yoge mbareegi, at Aliku ALA nen wone Mbileyam inikime pege nagagerik, yoge logonet, “An wone yokkigirak ti, at Mbalak mbininogo yori nak o.”

⁶ Yoge mbareegi, at Mbileyam nogo iyokan wage nagagerik, at Mbalak nogo inom, it aap Mowap mendek inoweewi nagawan inom, at ake warogo kani kunik me taati mi'ndak wonogwe me, iya wagagerak.

⁷ Iya wage nagagerik, at Mbileyam nen ore warak negen peebi eeriyak wone nogo yoge logonet, “An puut nggelok-nggobok oonegen lagi wage menggim o Aram pa'nggwe time wonage me, Aap Mowap mendek inowe endagembogut Mbalak nogo nen, An woraawak nduk nayonggo pege logonet, Yakup pulunogo pege, it Iterali yi, pulunogo piige, Eeri mok o! Yo'negerak kwe,

⁸ At Aliku ALA nen pulunogo piiga'lek kagak, an nen pulunogo piige, At Ala nen aaninggin mendek inoba piiga'lek kagak, an nen aaninggin mendek inoba piige, Eeriyak op mbakop? Abu meek aret o.

⁹ It aakumi ti, aakumi alik ambi inom nabenak lek an puut kirin paga nen nenegen nagiige, Nit aakumi ndi mendek lek o, yinuk, inalik leenak aret wonogwe, An puut teberogon paga nen iige, Eekirak me,

¹⁰ Yakup ombowologwe mbini kale'ngga pogom wonogwe me, Ta nen eenggi linggingge, It aakumi Iterali ineebe ambik me, ta nen mbaaniige, Eeriyak mbakop? An nen it aap iniki koonak mendek kanggo mengga kwak, an togop aret kangge, It ineenik age yobok ari wage pogom, an togop aret ari wage, Eerikit lak, ao.”

¹¹ Ari mbareegi, at Mbalak nen Mbileyam yoge, “It aakumi ninom ogoorak yi, an nake pulunogo piyaanok nduk, kayonggo pigirak kwe, melak togon kale'nggen aret it inoba piige ti, nano eeppaniyak nduk kayonggo pagagirak?”

¹² Yoge mbareegi, at Mbileyam nen onggo yoge, “At Aliku ALA nen wone ninikime pege kenok, yokkiriyak lek nombake agandik ya?” yinuk, yoreegerak

Mbileyam nen peebi eeriyak ne ambi yoreegerak wone

¹³ Yoge mbareegi, Mbalak nen Mbileyam yoge logonet, “Kat nimbirak o alik ambime nogo logomonggoorik, time nen it aakumi nogo ineebe apit aago iigak, eegu mban kenegen iige logomenggendik, taati nen aret an nake pulunogo piyaanok nduk, nawok o.”

¹⁴ Yoge nagagerik, at Mbalak nen Mbileyam nogo wonok, puut Pitaka paga inigen yomboonggo menggam time lagi nogo nogogwaarik, time nen warogo kani kunggak 7 kuli ogobakkigirogo punuk, tapi ngguunok ambi wagangge, ndomba ngguunok ambi wagangge, eeppunuk, warogo kani kunggak ogobakkigirik 1 nen 7 kuli nogo paga pit nagagerak.

¹⁵ Pit nage mbareegi, at Mbileyam nogo nen Mbalak yoge logonet, “Aliku ALA nimbirak lambunikit nduk, tayorogon time nage me, kat kake warogo kani kunik me ya'i mi'ndak logot o.”

¹⁶ Yo'nuk, nage nagagerik, wonage me, Aliku ALA ka woraanuk, wone Mbileyam inikime pege nagagerik, yoge logonet, “Wone yokkigirak ti, wonok at Mbalak mbininogo yori nak o.”

¹⁷ Yoge mbareegi, at Mbileyam nogo iyokan wage nagagerik, at Mbalak nogo it aap Mowap mendek inoweewi nagawan nogo inom, at ake warogo kani kunik me taa'nogo aret wonogwe me iya wage mbareegi, at Mbalak nen Mbileyam yoge, “At Aliku ALA nen wone ngge yokkegerak o?”

¹⁸ Yoge mbareegi, at Mbileyam nen ore warak negen peebi eeriyak wone Mbalak yoge logonet, “Tipot aput Mbalak wae. An nen wone yokkege yi, karuk konengge, Liirogon wagangge, Eeke logot o.

¹⁹ At Ala ti, aakumi kwak lek me, at oone pilit ari, At aakumi inaput lek me, iniki alik koongge, Eekeelik o. At nen, An yogop eerikit, yegetak ti, a'me aret eeke, At wone mbanggetak ti, a'me aret nggelok ari, Eekeelik mbaken?

²⁰ Ala nen, An nale'nggen aakumi inoba piyet o, yo'nege kenok, inoba piige, Ndi, inoba piige nogo an nen lek eerogo piige, Eeriyak meek o.

²¹ At Aliku inogoba Ala nen it inenggela'me wonage, It inowe endagembogut inenggela'me wonage kenok iniki ale'nggen nen keekok yogwe, Eeko menggaarak me, At Yakup ombowologwe wiganak paga aaninggin mendek inoba age, Iterali nogo nen, Nonggop eekkolaawi, yinuk, yogwe, Eekwi iyoolik o.

²² It aakumi yi, Ala o Metit nen wogoren wage logonet, Tapi nggwiya eyak pogom yirippiigerak wonogwe me,

²³ It Yakup ombowologwe magagirak paga inookwi, Kugi pulunogo piigwi, Eeriyak meek kenok, It aakumi alik nen yogo logonet, Ala nen Yakup paga inom, Iterali paga inom, eerubok mendek eeppiige yi kinigen kaanip o.

²⁴ Singa kooli kokwak mi'nogwe, Singa ngguunok mi'na'nuk, wam nggwiya warogo punuk, Enggaanggum nengge, amiya nengge, Eeka'lek kagak winnageelik menggi kwak, It aakumi alik yi, togop aret wonogwe, Eeko agaarik o.”

²⁵ Ari mbareegi, at Mbalak nen Mbileyam yoge, “Kat nen, It aakumi ti, pulunogo piyoorak neebi, mbake logonet kenok, kale'nggen inoba piyoorak ti mage o.”

²⁶ Yoreegerak kwe, at Mbileyam nen Mbalak yoge, “Aliku ALA nen an yo'nege kenok mban yokkirigin o, yinuk, yokkigirak nogo lek a?” yinuk, yoreegerak.

At Mbileyam peebi eeriyak wone ne ambi yoreegerak wone

²⁷ Yoge mbareegi, at Mbalak nen Mbileyam yoge logonet, “At Ala nen, Aakumi ti, pulunogo piyet o, yokkiriyak kagak eerukwak, pulunogo piyaanok nduk, nimbirak o ambime nawok o.”

²⁸ Yoge nagagerik, at Mbalak nen Mbileyam karume time nakkaawak nduk, puut kirin Peyot paga wonok laganeegerak.

²⁹ Lagangge nagagerik, at Mbileyam nen Mbalak yoge, “Kat nen an nake warogo kani kunggak 7 kuli ogobakkigippunuk, tapi ngguunok 7 punogo pege, ndomba ngguunok 7 punogo pege, eeru o.”

³⁰ Yoge mbareegi, at Mbalak nogo nen Mbileyam yoreegerak nogo ndak-ndak eeke logonet, tapi ngguunok ambi wagangge, ndomba ngguunok ambi wagangge, eeppunuk, warogo at ake kani kunggak ogobakkigirik 1 nen 7 kuli nogo paga pit nagagerak.