Linggineegwaarak 19 - Ala Wone Peenok Peebi Mbanak

Inobari inoba aremenggerak kenok kooko logorak wone

¹ At Aliku ALA nen Muta Karun imbirak yorage logonet,

² “Naliku an ALA nen wone mondok eeko logowak nduk leenogo pereegirak it aakumi Iterali mendek yoroorak nogo yi aret. Tapi kooli ambi awinde-obaande eerak lek agabolo maa'ngga kunik yabu eeruwak nduk, eyo aaninggin mendek enggaanok me kwippugulik ndugum kenok, wonok kira woraawak nduk yoraamunggup o.

³ Kira wogwe iinok, aap an neebe unde Eleyatat wogorumunggup o. Wogogwi kiinok, tapi nogo aakumi inawooliya wurik oore'nggam nen wonok endekem wundi nogo logomenggaarik, aap an neebe unde nogo enggaanom paga taati waruwak o.

⁴ Wakwi iinok, aap an neebe unde Eleyatat nogo nen amiya eenggi abit paga labungge logomenggerik, Naliku ALA ninom lambungge minggim nawooliya wurik enaame pa'nggwe ne 7 kuli amiya nogo werenogo nappit nawak o.

⁵ Nappit nage logomenggerik, enegen wonage kagak, tapi warak nogo agabolo inom, enggaanggum inom, amiya inom, aanagale inom, yeregerak-peregerak abok aret kani kunuwak o.

⁶ Kunggwi iinok, aap an neebe unde nogo nen eyo nggabina inom, nggo'nggop engga inom, ndomba eeruwak laanak maa'ngga kunik inom, wagangge logomenggerik, tapi kani nengge me oolome nogome mbo mambuwak o.

⁷ Ti eeppunuk, aap an neebe unde nogo ayum kookkolage, eebe niyo paga ngguu'mo wakkolage, eeke logomenggerik, o aakumi inawooliya wurik oore'nggam time unggwi noorak op aret kwe, obari oba aremenggerak nogo nggaru yaga'lek wonage kagak, oonegen kilu yi nawak o.

⁸ Ndi, aap tapi kani kunemenggerak nogo kunduk, ayum kookkolage, eebe niyo paga ngguu'mo wakkolage, eeke logomenggerik, obari oba aremenggerak nogo nggaru yaga'lek wonage kagak, oonegen kilu yi nawak o.

⁹ Ndi, aap ambi obari oba lenggenak lek obeelom kenok, tapi kani kunik wun nogo ndoonogo yagat endekem nggwe togop kenok pegak yuurak nduk, alik leenak menggim time pemenggerak me, it aakumi Iterali mendek maluk ambi eeko logomenggaarik kenok, inomaluk inoba wonage nogo lek aruwak nduk, wun ti paga niyo inom kooko logorak ake aret logowak o.

¹⁰ Ndi, aap wun pi namenggerak nogo ayum kookkolage logomenggerik, obari oba lenggenak wonage nogo nggaru yaga'lek wonage kagak oonegen kilu yi nawak o. Wone yi, it aakumi Iterali mendek inom, it aap nggiru mendek inenggela'me wonogwe nogo inom, mondok-mondok eeko logorak lengganogo yoraamunggup nduk yokkiragi,” yinuk, yoragagerak.

Aap kambemenggerak mbaanggogwe iinok, eeko logorak wone

¹¹ Yorage nagagerik, ambinom yorage logonet, “Aap ambi kambemenggerak mbaanggage kenok, obari oba lenggenemenggerak maluk aremenggerak wonage kagak, nogo 7 aret yuurak me,

¹² nogo mbere yinuk, ko'lu niyo paga abin kookkolage, ti'nuk, nogo kenagan yinuk, ko'lu 7 paga niyo paga abin kookkolage, eeke kenok, oba maluk aremenggerak nogo lek aret arigin o. Togop eerigin lek kenok perak, oba maluk aremenggerak nogo lek arigin lek wonage aret logogin o.

¹³ Aap alik ambi nen aap ambi kambemenggerak mbaanggage logomenggerik, obari lenggenemenggerak oba maluk aremenggerak nogo lek aruwak nduk, niyo paga abin kooka'lek kenok, Naliku ALA nawooliya wurik paga maluk eerogo pukwak, aap ti, it Iterali inenggela'me nen enggaawak lek eerogo endekem wumbuwak o. Oba maluk aremenggerak nogo lek aruwak nduk, niyo oba werenogo pega'lek kenok, oba maluk aret aremenggerak me, lek aga'lek oba lenggenak aret logogin o.

¹⁴ Aap ambi awooliya wurik me nen kambemenggerak kenok, eeko logorak wone yugu nogo yi aret. Aap ambi awooliya wurik me aap ambi kangge kenok a, aap alik ambi nen aap kambemenggerak nogo pekka unggwage kenok a, obari inoba lenggenemenggerak ineebe maluk aremenggaarak wonogwe iigak, nogo 7 kuli yuwak o.

¹⁵ Ndi, yi togolowak ndi togolowak abit lenggenak lek ponggonak logomenggerak kenok, ti paga obari abok aret lenggennarigin o.

¹⁶ Aap wooluwak paga warak kambemenggerak a, we ugun kambemenggerak a, aap owak nenenak a, aap nggween taana'me a, aap ambi nen mbaanggage kenok, aap ti, obari oba lenggenemenggerak maluk aremenggaarak wonage kagak nogo 7 yuwak o.

¹⁷ Ndi, aap kambemenggerak obari oba lenggenemenggerak maluk aremenggerak oba wonage nogo lek aruwak nduk, tapi kani kunemenggaarak wun nogo ambi waganogo, niyoowa'na yonggoppunuk, niyo eneeri wungge mendek toologo amok mbanogo pege kenok,

¹⁸ aap ambi obari oba lenggenna'lek nogo nen nggo'nggop engga paga niyo toolak nogo tamombunuk, aap kambemenggerak nogo awooliya wurik paga werenogo pit nage, yi mendek ndi mendek time logomenggerak paga werenogo pit nage, aakumi time logomenggaarak ineebe paga inom, werenogo piinet nage, ndi, wooluwak paga warak kambemenggerak a, we ugun kambemenggerak a, aap owak nenenak a, aap nggween taana'me a, aap ambi nen mbaanggamenggerak nogo oba werenogo pege, eeruwak o.

¹⁹ Ndi, oba maluk aremenggerak nogo obeelom aruwak nduk, nogo mbere yinuk, ko'lu amok mbanak nogo oba werenogo pege, ti'nuk, nogo kenagan yinuk, ko'lu paga werenogo pege, eeke kenok, ne 7 ti paga eeriyak koonak nogo abu aret eerogo pigin me, aap nogo ayum kookkolage, niyo paga ngguu'mo wake, eeke logomenggerik, oonegen kilu yi nage kenok, aap nogo obeelom aret arigin o.

²⁰ Ndi, aap ambi obari oba lenggenemenggerak eebe maluk aremenggerak nogo obari aakumi inoba age kenok, lek aruwak nduk, niyo inabin kooko menggaarak nogo paga werenogo pega'lek kenok, oba maluk lenggenak awo wonage me, Naliku ALA nawooliya wurik o magame nogome maluk eerogo pukwak, aap ti, it aakumi wonogwe abok aret inenggela'me nen enggaawak lek eerogo endekem wumbogo logowak o.

^21-22 Ndi, aap niyo inabin koorinaka paga werenogo piige logomenggerak nogo kunduk, niyo paga ayum kookkolaawak o. Ndi, niyo inabin koorinaka nogo aap ambi nen mbaanggage kenok, oba maluk aremenggerak kagak, oonegen aret kilu yi nawak o. Aap ambi obari oba lenggenak wonage nogo nen yi mendek ndi mendek mbaanggage kenok, yi mendek ndi mendek nogo maluk aret age, ndi, yi mendek ndi mendek maluk aremenggerak nogo aap ambi mbaanggage kenok, at kunduk, oba maluk aret age, eeremenggerak me, maluk oba aremenggerak wonage kagak, oonegen aret kilu yi nawak o. Wone yi, it Iterali mondok-mondok eeko logowak, yegerak, yoret o,” yinuk, yoragagerak.