Linggineegwaarak 15 - Ala Wone Peenok Peebi Mbanak

Aliku ALA ake pi wogo logorak wone

¹ At Aliku ALA nen Muta yoge logonet,

² “It aakumi Iterali wone yoroorak nogo yi aret. An nen o wogoraawam time it unggwi nogo logomenggaarik, wonogo logonet,

³ Naliku ALA nake warogo kani kunggwi, Aliku ALA wogorikit o, yinuk, kumbuk mbanggo logonet pugwi, onggo lek we aret wo'nugwi, laago lariyak koonak nogo paga inale'nggen nen lariyak nduk pugwi, togop eeriyak nduk, nake pi woroorak kenok, obari obeelom kage logonet, niniki ale'nggen mbarikit nduk, lembu-tapi ilik, kambin-ndomba a, pi wogo logonet,

⁴ gandum anggen abu abe yigirogo 2 liter negen waganogo tayitun amburu 1 liter negen nenggelak-kenggelak aago inom wonok Naliku ALA nake pi wogo logowak o.

⁵ Ndi, ndomba ambiret paga nake warogo kani kunggwi ilik, inale'nggen paga warogo nake pi wogwe a, eeko logonet, nonggo menggaarak anggur amburu nake kilirogo puurak nogo mendek 1 liter inom wonok pi wogwe,

^6-7 ndomba ngguunok paga nake warogo wo'nogo logonet, gandum anggen abu abe yigirogo 5 liter negen waganogo tayitun amburu 1 liter irimbaga negen inom nenggelak-kenggelak eerogo punuk, nonggo menggaarak anggur amburu nake kilirogo pegak pi woroorak nogo mendek 1 liter irimbaga negen inom wonok, Naliku an ALA obari abe kage logonet, niniki ale'nggen kaakit nduk, nake pi wogwe,

⁸ ndi, Aliku ALA wogorikit o, yinuk, kumbuk mbanemenggaarak nogo ndak-ndak Naliku ALA nake pi wogwe ilik, ninom lambunik logokit nduk, Naliku ALA nake warogo wo'nugwi a, eeko logonet, tapi ngguunok ambi nake warogo kani kunggwi nogo mendek kani kuni wogwe ilik, we inale'nggen paga warogo nake pi wogwe nogo mendek pi wogwe a, eekwi kenok,

⁹ tapi ngguunok nogo wonok wogo logonet, gandum anggen abu abe yigirik 5 liter irimbaga negen waganogo tayitun amburu 2 liter negen inom nenggelak-kenggelak eerogo punuk,

¹⁰ Naliku an ALA obari abe kage logonet, niniki ale'nggen kaakit nduk, nonggo menggaarak anggur amburu nake kilirogo puurak nogo mendek 2 liter negen inom an nake pi wogwe, eeko logowak o.

¹¹ Tapi ngguunok ilik, ndomba ngguunok a, kambin ilik, ndomba a, an nake warogo wo'niriyak mbakwi kenok yagarak ti ndak-ndak aret eeko logowak o.

¹² Inaanggumi mande negen nake warogo wo'nogo logonet, inaanggo ambiret nogo paga togop mban eeko logowak o.

¹³ Ndi, Naliku an ALA it aakumi Iterali inaworak inalitik-inalitak abok nen nake warogo kani kunggo logonet kenok, obari obeelom kage logonet, niniki ale'nggen kaakit nduk, togop mban aret eeko logowak o.

¹⁴ It aap nggiru mendek a, aakumi alik mendek ambi a, it Iterali inenggela'me time inom wonogwe nogo nen Naliku an ALA obari obeelom kage logonet, nale'nggen kaakit nduk nake warogo kani kunggwi iinok ti, it Iterali eekwi ti ndak-ndak aret eeko logowak o. It Iterali inapuri nda'narit nogo logogun inenggela'me logonet kunduk, ndak-ndak aret eeko logowak o.

^15-16 Ti eeko logorak ti, it Iterali kuwak aago inom, it aap nggiru mendek inenggela'me wonogwe ti inom, Naliku an ALA nen ndak-ndak aret iige me, wone, Yogop ee'nu ndogop ee'nu, yorage yi inom, wone lengganogo yorage inom, it Iterali inaworak inom, aap nggiru mendek inenggela'me wonogwe inom, wone ambit yi mban aret eeko logowak o. Wone yi ti, inapuri nda'narit nogo logogun nogo kunduk mondok-mondok ndak-ndak aret eeko logowak, yegerak, yoret o,” yinuk, yoreegerak.

¹⁷ Yoge nagagerik, at Aliku ALA nen Muta ambinom yoge logonet,

¹⁸ “It aakumi Iterali yoroorak nogo yi aret. An nen it o wogoren piya nawam nogome unggwi nogo logomenggaarik,

¹⁹ yabu eeppunuk, anggen mbanogo nawok nduk, eeko logonet, ando Naliku ALA nake puurak aret me,

²⁰ gandum anggen yigiko logonet, aa'nduk yigirik an nake pogo mengga kwak, yabu eeremenggaarak anggen aa'nduk yugu mendek yigirogo oroti ligilogom agago worarogo punuk, an nake pi wogo logowak o.

²¹ It inom, inapuri-inombowologwe nda'narit wundi nogo logogun nogo inom, gandum anggen aa'nduk yigirik mendek Naliku ALA nake mondok-mondok pi wogo logowak o,” yinuk, yoreegerak.

At oone yugu ineenggo'lek logonet maluk eeppunuk, eeko logorak wone

^22-23 Yoge nagagerik, wone ambi yoraawak nduk, yoge logonet, “At Aliku ALA nen wone, Yogop ee'nu ndogop ee'nu, yinuk, Muta yoge kagak, yoragagerak paga nen nugwa inapuri-inombowologwe peebi nda'narit nogo logogun kuli abok aret it ambi nen, Wone yi taganogo pigin, mbaka'lek kagak eekwi iinok, eeko logorak yi aret.

²⁴ Aakumi Iterali mendek ugun iigak, it ambi nen an noone yugu ineenggo'lek logonet, maluk eekwi kenok, Naliku an ALA obari obeelom kage logonet, nale'nggen kaakit nduk, it Iterali mendek abok aret nake warogo kani kuniyak tapi ngguunok ambi waganggwi, gandum anggen yigirik inom, amburu nonggo menggerak mendek inom, nake kilirogo puurak koonak nogo waganggwi, ndi, inomaluk lek eerogo puwak nduk, nake warogo wo'niriyak kambin ngguunok ambi waganggwi, eerogo nake pi wogwe iinok,

²⁵ iniki mbarulik kagak perak togon maluk eeremenggaarak nogo, lek eerogo piyaakit nduk, an nake warogo kani kunggwi nogo mendek inom, inomaluk lek eerogo pikit nduk, an nake wo'niriyak mendek inom, wonok woramenggaarak nogo it an neebe unde nen ninom lambuniyak nduk, nggami aanggo wakwi kwak, warogo wo'nugwi kenok, inomaluk ti, lek eerogo mbo pigin aret o.

²⁶ At ambi an noone yugu nogo eenggo'lek logonet, maluk eeremenggerak nogo paga it aakumi Iterali mendek inom, it aap nggiru inenggela'me wonogwe nogo inom, inom abok aret maluk inoba aremenggaarak me, inomaluk lek eerogo piyaakit nduk, nake pi wogwe iinok, it abok aret inomaluk lek eerogo mbo pigin aret o.

²⁷ Ndi, aap ambi nen an noone yugu nogo eenggo'lek logonet maluk eeke kenok perak, omaluk lek eerogo pikit nduk, kambin kooli tahun ambit eerak kero, Naliku ALA nake pi woraawak o.

²⁸ Pi wage kenok, at eenggo'lek logonet maluk eeremenggerak nogo, omaluk lek eerogo punuk nimbirak lambunik logokit nduk, ndomba wonok woramenggerak nogo aap an neebe unde nen nggami aanggo wakwi kwak, Naliku ALA nenggaanom paga nake warogo pege kenok, omaluk lek eerogo pigin o.

²⁹ Wone eeko logorak nogo ti, it aap Iterali mendek inaworak inom, it aap nggiru Iterali inenggela'me wonogwe nogo inom, an noone yugu ineenggo'lek logonet, maluk eekwi iinok, eeko logorak wone yugu ti, elu-ando lek ambit ti aret eeko logowak o.

³⁰ Ndi, it aakumi Iterali mendek inaworak inom, it nggiru inenggela'me wonogwe inom, Maluk eerikit aret o, yinuk, iniki koombunuk eekwi iinok perak, Aliku ALA ti, meek aret mba'nuk, maluk eeremenggaarak me, it inowe-inawot inenggela'me nen inenggaawak mondok lek eerogo piigo logowak o.

³¹ It aap ti, Naliku an ALA meek nombako logonet, Yogop ee'nu ndogop ee'nu, noone yugu taganogo pemenggaarak me, maluk eeremenggaarak onggo it inobaalombok aret inenggaawak lek eerogo patugun, yegerak, yoret o,” yinuk, yoreegerak.

Yonggonggologwe paga eekwi iinok, eeko logorak wone

³² It Iterali mendek karume wonogo logonet, nogo 6 yinuk, ko'lu yonggonggologwe paga aap ambi kani wurit nage kwaakkogo nogogwaarik,

³³ aakumi apit kuwak aago inom, Muta Karun inom, inowagam wonok wogogwaarak.

³⁴ Wonok wa'nuk, aaninggin nano mendek oba puurak nogo wone awo mbangga'lek logonet, eebe keele maarogo punuk wonogwe me,

³⁵ at Aliku ALA nen Muta yoge, “Aap ti, ooliya wurik me nen wonok endekem wundi nanuk, kambuwak nduk, it aakumi Iterali mendek abok aret nen yugum paga toguurit waruwak o.”

³⁶ Yoge mbareegi, at Aliku ALA nen Muta yoreegerak nogo ndak-ndak it aakumi kuwak aago nogo abok nen ooliya wurik me nen wonok wundi nogo nogogwaarik, kambuwak nduk, yugum paga toguurit warogo pereegwaarak.

Inayum paga pugu'ndalek eeko logorak wone

³⁷ At Aliku ALA nen Muta yoge logonet,

³⁸ “It aakumi Iterali mendek wone yoroorak yi aret. It inom, inapuri-inombowologwe nda'narit nogo logogun inom, ligi kibu-kibu mendek inayum paga pugu'ndalek eerogo wurabit nogo logowak o.

³⁹ Ligi kibu-kibu inayum irip paga pugunik nogo ti, Naliku an ALA nen, Yogop ee'nu ndogop ee'nu, wone yugu nogo taganogo punuk, aap ambi akwe mbo punuk, ugun eerit nage menggi kwak, it Iterali mendek iniki nengge kenok, mugurok nogwe, inigen kogwe kenok, eerit nogwe, eeko logokwak aberak logowak nduk pugunik aret me, inigen pekkagak eeko logowak o.

⁴⁰ Inigen pekkagak eeko logonet, an nen, Yogop ee'nu ndogop ee'nu, wone yugu nogo aberogo liirogon eerit nogwe iinok, inogoba Ala an nake mondok alik leenak aret logogun o.

⁴¹ An nen it inogoba Ala logokit nduk, o Metit nen wogoren wundi wagagirak Naliku inogoba Ala an aret me, Naliku inogoba Ala an nen aret yagi o, yinuk, yegerak, yoret o,” yoreegerak.