Linggineegwaarak 13 - Ala Wone Peenok Peebi Mbanak

O Kanan inigen yombooni nogogwaarak wone

¹ At Aliku ALA nen Muta yoge logonet,

² “It Iterali mendek inanebunu lombok inenggela'me nen inoweewi inarum menggaarak nogo ambit nggigik eerogo nggween an nen wogoraawam o Kanan nogome inigen yombooni nawak nduk nappiyet o.”

³ Yoge mbareegi, at Muta nen Aliku ALA yoreegerak nogo ndak-ndak Iterali inenggela'me nen inoweewi ambitak nggigik eerogo o Paran karume nen nappiyareegerak nogo

⁴ inendage yi aret. Inanebunu Uruben nen Takut aput Tiyamuwa,

⁵ Inanebunu Timeyon nen Kori aput Tapat,

⁶ Inanebunu Yekura nen Yepune aput Kalep,

⁷ Inanebunu Itakat nen Yutup aput Yigan,

⁸ Inanebunu Eparayim nen Nun aput Oteya,

⁹ Inanebunu Mbeniyamin nen Arapu aput Paliti,

¹⁰ Inanebunu Tebulon nen Tori aput Nggariyen,

¹¹ Inanebunu Yutup mogonak mendek Manate nen Tuti aput Nggari,

¹² Inanebunu Ndan nen Nggemali aput Amiyen,

¹³ Inanebunu Atet nen Mikayen aput Tetut,

¹⁴ Inanebunu Natali nen Wopiti aput Nakibi,

¹⁵ Inanebunu Nggat nen Maki aput Ngguwen.

¹⁶ At Muta nen it aap o inigen yombooni nawak nduk nappiyareegerak nogo inendage ti aret o. Ndi, Nun aput Oteya nogo at Muta nen endage peebi Yotuwa tooneegerak.

¹⁷ At Muta nen it nogo o Kanan inigen yombooni nawak nduk yorage logonet, “Kit yime nen o Kanan o ame pa'nggwe karume unggwagak puut nggelok-nggobok pa'nggwe time aret lagi nanu o.

¹⁸ Ndi, lagi nogo logomonggotik, it aakumi time ti, ineebe ambik wonogwe ilik, mbuuluk wonogwe a? Inomaawi ambik wonogwe ilik, lebenak wonogwe a?

¹⁹ Ndi, o ti nonggop o? O ti, abu obeelom wonage ilik, maluk wonage a? O taganak kota time ti nonggop o? Pak wurik wonage ilik, pak wurik lek wonage a?

²⁰ Ndi, nggween ti perak, nonggop wonage o? Amburu warak kaamunggup ilik, amburu lek kaamunggup a? Yabu pena obeelom kaamunggup ilik, lek a? kinigen yomboonit nugu logomonggotik, kiniki kwippunuk, anggen time mendek ambi kero, mbaninuk wa'nu o,” yinuk, yoragagerak. Anggur anggen mbaninuk wa'nu o, yoragagerak nogo ti, anggur anggen iyaalok mbanggwi eyom paga aret me, yoragagerak.

²¹ Nogo yorage mbareegi, nogo nogogwaarik, o Tin karume time nen inigen yomboonit, nok o Erekop nen tu Kamat nogo menggam time kuli nogo nogogwaarik,

^22-25 o Kanan o ame yime pa'nggwe karume unggwagak, nok o Keboron kuli aap Enak ombowologwe wiganak Akiman inom, Tetayi inom, Talamayi inom, wonogo menggam nogome unggwi nogogwaarik. Unggwi nogo nogogwaarik, inigen yomboonit o Etokon kobappaga nogome unggwi nanuk, anggur eno'mbak ambit paga anggen luurik-maarak yugu nogo mbanogo eewurogo waganggo logonet, eyo delima anggen inom, eyo wuli anggen inom, mbanogo inom wonok iniyokan wogogwaarak. O nogome inigen yomboonit nugwi iigak, nogo 40 yereegwaarak. O Etokon ti, aap Iterali nen eyo anggur anggen mbaneegwaarak me, o nogo endage, Etokon Kobappaga o, yinuk, yogo nogogwaarak. Ndi, nit ninoone paga ti, Anggen Luurik Yugu Me Mbaneegwam o. Ndi, o Keboron time wurik tahun 7 wonage kagak, o Metit nggween Towan taganak paga o wurik lek we aret wonagagerak.

Inigen kogogwaarak nogo yora wogogwaarak wone

²⁶ It aap o Kanan yombooni nogogwaarak nogo at Muta inom, Karun inom, it aakumi Iterali mendek abok aret inom, o Kareti Paran karume nogome wonogwe me, iya wogo nogogwaarik, it o inigen kogogwaarak nogo mbininogo yorogo logonet, anggen mbaneegwaarak nogo titik irogogwaarak.

²⁷ Titik irogo nogogwaarik, it nen wone mbininogo Muta yogo logonet, “O time kinigen pekka nanip o, yo'niragandak nogo abok aret ninigen yomboonggo nogoorik, nggween abu amburu warak me, nggiin amburu inom, yilak amburu inom, niyo eneeri negen kila-kila wungge menggim abu iya lombok kogoorak me, anggen yugu eebe kenegen kaanok nduk wonok wogoorak yi ket o.

²⁸ Togop aret kwe, o time nogo yi kota ndi kota mondok nggwok lombok wonogwe, ndi, it aakumi time wonogwe nogo ti, mondok inomaawi mban wonogwe, inawi pak kunduk yugum paga mban wurik me, it aap Enak ombowologwe wiganak nogo inom time aret wonogwe, eekwi iigoorak o.

²⁹ It aap Amalek mendek nogo o Kanan o ame yime pa'nggwe karume wonogwe, ndi, it Ket mendek inom, Yebut mendek inom, Amori mendek inom, o puut nggelok-nggobok me wonogwe, ndi, it aap Kanan mendek nogo niyo laut ambet paga inom, niyo Yoraran andirok time inom wonogwe, eekwi iigoorak o,” yinuk, mbininogo yoreegwaarak.

³⁰ Yogwi nogo it aakumi konenggo nogogwaarik, iniki piirik wonogwe nogo tayok yuwak nduk, at Kalep nen Muta enggaanom paga yorage logonet, “Nit nen it ndak aret tebenogo piinok, ninanggween unde eekkola unggugun aret me, nawok aret o.”

³¹ Yorage nogo it aap inom nogogwaarak nogo nen yogo logonet, “It aakumi time mendek inomaawi ambik wonogwe iigoorak me, nit ninom wim eeriyak ninobam lek o,” yorogo nogogwaarik,

³² wone it Iterali iniki a'nggan wo'naruwak nduk yoranet nogo logonet, “O time nogo nit abok aret ninigen yomboonit nogoorak kwe, it aakumi time nogo ineebe abu yerek-nggorek lombok me, it wundi wogo logonet, inambeme yonggo'ninaburak negen iigoorak o.

³³ Ndi, ti mban lek kwe, aap inanebunu Enak ombowologwe wiganak ti, ineebe abunuk yerek-nggorek aakumi wuriya wagak tawe iigo nogoorik, nit nen mbako logonet, Nit ti, yibila pogom aret mbakoorak. Ndi, it kunduk ndak-ndak aret ninombakwi iigoorak me, meek o,” yinuk, aakumi nogo yoranet nogo nogogwaarak.