Linggineegwaarak 12 - Ala Wone Peenok Peebi Mbanak

Miriyam Karun imbirak Muta abok mbaneegwaarak wone

¹ At Muta nogo kwe anebunu Kuti mendek waganeegerak paga it Karun Miriyam imbirak nen Muta abok nggarik-nggarek eerogo pogo logonet,

² “At Aliku ALA nen Muta alik yoge kagak, nit yo'nirage menggerak mbakop? Lek o. Nit kunduk Aliku ALA nen yo'nirage kagak yorogo monggoorak nogo lek a?” yinuk, at Muta abok mbanggwi nogo Aliku ALA aruk koneneegerak.

³ Aakumi nggween paga menggaarak abok aret inenggela'me nen aap iniki yanggonak lombok wonagagerak ti, at Muta alik aret o.

⁴ It yogwe nogo at Aliku ALA konengge nagagerik, abera'lek me Muta yoge logonet, “Kat inom, Karun inom, Miriyam inom, kit kineebe kenagan an ninom lambungge minggim nawooliya wurik me time nanip o,” yorage mbareegi, it ineebe kenagan nogo time aret nogo mbareegwa,

⁵ at Aliku ALA nogo ndugwi logonak enggela'me nen wambi wage nagagerik, ooliya wurik tungga paga taa'nogo mi'ndak logonet, “Kit Karun Miriyam kimbirak yime panggo yi woraanip o,” yorage mbareegi, imbirak panggo yi nogo mbareegwa,

⁶ at Aliku ALA nen it yorage logonet, “An wone yokkirage yi, kinaruk logonip o. Aap ambi Naliku ALA noone yoge neegak yorage menggerak kinenggela'me wonage nogo, An nen abinggaanggo paga neebe nikkage, abi paga yoge, Eeke minggirak o.

⁷ Togop eeke minggirak kwe, an nayeloman Muta perak, Nimbirak togop eeka'lek minggirak o. At Muta ti, an napuri abok wonogwe iigak, Alik mban noone abu liirogon woppunuk eeke menggerak me,

⁸ Wone eegu elaarogo paga yogeelik o. Ata, at nimbirak nengga kunna'nuk, wone mbangge logonet, Kin paga aret yoge minggirak o. At nen Naliku ALA neebe neege menggerak kagak, Kit nonggop nduk kinagabiti mbaka'lek nayeloman Muta nogo Abok nggarik-nggarek yogo ogotik?”

⁹ Yorage nagagerik, it ineebe mbere nogo eereegwaarak paga at Aliku ALA anini alik negen age nagagerik, mbo piinok, nagagerak.

^10-11 Nage kagak, ndugwi nogo Ala inom lambungge menggim awooliya wurik me irimbaga wonage nogo lagangge kagak, at Miriyam nogo agabolo awin maaluget kunik yanggwi negen lan ari mbareegi, at Karun nogo ena logorogon Miriyam pekkage nagagerik, awin maaluget agagerak mbareegi, Muta yoge logonet, “Ai, nogoba! Nit wi negen aret yogoorak nogo ti, maluk aret yogoorak me, ninomaluk onggo aaninggin ninoba pinaniyak ti mage o.

¹² Elege agalo inikime nen kambak obari agaatak nda'nage menggi kwak, at togop teppuurak ti mage ubi!”

¹³ Yoge mbareegi, Muta nen at Aliku ALA yoge logonet, “Ala wae! At eebe obeelom eerogo pu o, nogoba.”

¹⁴ Yoge mbareegi, at Aliku ALA nen Muta yoge logonet, “At ogoba nen etenggen paga owoori lenggek togon nappege kenok enggali nen nogo 7 kuli yigin nogo lek a? Togop aret me, aakumi inawooliya wurik me nen endekem wumbemenggendak wonage kagak nogo 7 kuli yege kenok, ti'nuk, iyokan waganogo mambi wa'nu o.”

¹⁵ Yoge mbareegi, at Miriyam nogo inawooliya wurik me nen endekem wumbereegerak wonage kagak, nogo 7 kuli aret wonagagerak. Ndi, at Miriyam nogo eebe awo waganogo mambi waga'lek kagak, it aakumi Iterali nogo naga'lek time aret puk wonogogwaarak.

¹⁶ Ndi, mambi wa'nuk, it aakumi Iterali nogo o Katerot mbo punuk, o Paran karume time nogo nogogwaarik, inawooliya wuppatinuk wonogogwaarak.