Linggineegwaarak 1 - Ala Wone Peenok Peebi Mbanak

LINGGINEEGWAARAK WONE

Iterali aa'nduk ineenggi linggininabeegwaarak wone

¹ It aakumi Iterali mendek o Metit nen wundi wogo nogogwaarik, karume puut Tinayi paga wonogwe iigak, tahun mbere eeppunuk, tut ambi penembunuk, ambi penengge tanggal 1 paga at Muta nogo Ala inom lambungge menggim awooliya wurik me wonage me, at Aliku ALA nen at yoge logonet,

² “It aakumi Iterali mendek abok aret inanebunu ndarak lenok lombok aap mban apit aret keenggi linggimbunuk, inendage liiru mbaniyak me,

³ it ndarak iigak, tahun 20 nen aginggwe eerit nagaarak wim namburiyak inobam iinok mban, inanebunu ndegek inalitak lombok Karun kimbirak nen inendage liiru mbaninip o.

⁴ Inendage mbanggwi ti paga yeenggwa kirogo logonet, it inanebunu ndegek lombok ndegeninako logowak nduk, Iterali inanebunu ndegek lombok wonogwe me inenggela'me nen aap ambit nggigik eerogo mippiyaanip o.

⁵ Yeenggwa kirogo logorak leenogo mippiyoorak nogo inendage yi o. Anebunu Uruben mendek ti, aap Tiyereyut aput Elitut mippugwi,

⁶ Anebunu Timeyon mendek ti, aap Turitiyarayi aput Telumiyen mippugwi,

⁷ Anebunu Yekura mendek ti, aap Aminarap aput Nakaton mippugwi,

⁸ Anebunu Itakat mendek ti, aap Tuwat aput Netanen mippugwi,

⁹ Anebunu Tebulon mendek ti, aap Kelon aput Eliyap mippugwi,

¹⁰ At Yutup apuri wiganak anebunu Eparayim mendek ti, aap Amikut aput Elitama mippugwi, Ndi, anebunu Manate mendek ti, aap Peratut aput Nggamaliyen mippugwi,

¹¹ Anebunu Mbeniyamin mendek ti, aap Nggireyoni aput Abiran mippugwi,

¹² Anebunu Ndan mendek ti, aap Amitiyarayi aput Akiyetet mippugwi,

¹³ Anebunu Atet mendek ti, aap Okaran aput Pagiyen mippugwi,

¹⁴ Anebunu Nggat mendek ti, aap Erekuwen aput Eliyatap mippugwi,

¹⁵ Anebunu Natali mendek ti, aap Enan aput Akira mippugwi, eerumunggup o,” yinuk, yoreegerak.

¹⁶ Yoge mbareegi, it aakumi Iterali inenggela'me nen inanebunu ndegek lombok inoweewi leeninabeegwaarak ti, inombomini ndarak mugurok mban aakumi Iterali ndegeninako logowak nduk leenogo mippiyareegwaarak nogo ti aret o.

¹⁷ Mippiigo mbareegwa, Muta Karun imbirak nen inoweewi leenogo mippiyareegwaarak nogo wiirogo nogogwaarik, wogo mbareegwa, yorogo logonet,

¹⁸ “Tut ambi penembunuk, ambi penenak tanggal 1 ti paga aakumi Iterali mendek abok aret kuwak eeppiinok, inanebunu tigitogon ndarak lenok lombok aap ndarak iigak tahun 20 nen aginggwe eerit nagaarak kero, inendage liiru mbaninip o,” yinuk, yorogo mbareegwa, it aap leeninabeegwaarak nogo nen Iterali mendek abok aret kuwak eeppiigo nogogwaarik, aap mban ndarak iigak tahun 20 nen aginggwe eerit nagaarak kero, inalitik-inalitak inendage liiru mbaneegwaarak.

¹⁹ At Aliku ALA nen yoreegerak nogo ndak-ndak, at Muta o karume Tinayi time wonage logonet, it yorage kagak ineenggi lingginogo inendage liiru mbaneegwaarak nogo yi aret.

^20-21 Aap Iterali aput manggu ndarak Uruben aret me, at anebunu Uruben mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ambit nggigik eerogo ineebe empat puluh enam ribu lima ratus aret inendage liiru mbanggwi,

^22-23 Anebunu Timeyon mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ambitak nggigik eerogo ineebe lima puluh sembilan ribu tiga ratus aret inendage liiru mbanggwi,

^24-25 Anebunu Nggat mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe empat puluh lima ribu enam ratus lima puluh aret inendage liiru mbanggwi,

^26-27 Anebunu Yekura mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe tujuh puluh empat ribu enam ratus aret inendage liiru mbanggwi,

^28-29 Anebunu Itakat mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe lima puluh empat ribu empat ratus aret inendage liiru mbanggwi,

^30-31 Anebunu Tebulon mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe lima puluh tujuh ribu empat ratus aret inendage liiru mbanggwi,

^32-33 At Yutup aput Eparayim inanebunu mendek ti, ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe empat puluh ribu lima ratus aret inendage liiru mbanggwi,

^34-35 Ndi, at Yutup aput Manate inanebunu mendek ti, ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe tiga puluh dua ribu dua ratus aret inendage liiru mbanggwi,

^36-37 Anebunu Mbeniyamin mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe tiga puluh lima ribu empat ratus aret inendage liiru mbanggwi,

^38-39 Anebunu Ndan mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe enam puluh dua ribu tujuh ratus aret inendage liiru mbanggwi,

^40-41 Anebunu Atet mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe empat puluh satu ribu lima ratus aret inendage liiru mbanggwi,

^42-43 Anebunu Natali mendek ti, inanebunu ndarak ndegek lombok ndarak iigak tahun 20 nen aginggwe eerit nagaarak wim namburiyak inobam kero, ineebe lima puluh tiga ribu empat ratus aret inendage liiru mbanggwi, eereegwaarak.

⁴⁴ Muta Karun inom, it aap ineebe 12 inanebunu ndegek lombok ndegeninako logowak nduk mippiyareegwaarak nogo inom, nen aap ineenggi lingginogo inendage liiru mbaneegwaarak nogo ti aret o.

⁴⁵ Ndi, it aap Iterali mendek inanebunu ndarak ndegek lombok wim namburiyak inobam kero, ndarak iigak tahun 20 nen aginggwe eerit nagaarak kenok mban inendage liiru mbaneegwaarak nogo

⁴⁶ ineebe lambunik lingginik ti, enam ratus tiga ribu lima ratus lima puluh aret o.

⁴⁷ Ndi, it inanebunu ndegek inendage liiru mbaneegwaarak kwe, anebunu Lewi mendek perak, inendage liiru mbanulik.

⁴⁸ Inendage mbanulik ti, at Aliku ALA nen,

⁴⁹ “It aakumi Iterali mendek keenggi linggimbiinok, inendage liiru mbangge logonet, aap anebunu Lewi mendek kenok inom inendage liiru mbangge, keenggi linggininake, eeriyak mage o.

⁵⁰ Ata, it unde eeppiigirak ti, an nawooliya wurik inom, wone yugu naloobut mbanak me yonggolak wonage nogo inom, nawooliya wurik me eeko menggaarak wonage nogo inom, arum logonet, nawooliya wuriyak yi mendek ndi mendek inom, wurik me eeko menggaarak inom, inuum paga piyaninuk nugwi, wuriyak ena koonggwi, inawooliya yendok-wandok wukko'net nogwe,

⁵¹ ambime nogwe kenok minogo waganggwi, ari nanuk wukwi, eeko logowak nduk, ineyabu ti aret unde eeppiyet o. Ti eekwi me, aap we lek inowagam koorok panggo yi wogwe iinok, mondok inoorogo piigo logomunggup o.

⁵² Ineenu agak eyo paga yinik mugurok mban it aakumi Iterali mendek an nawooliya wurik me yendok-wandok tayorogon inanebunu ndegek lombok mban inawooliya wukkologo logowak o.

⁵³ Ndi, it aakumi Iterali mendek panggorogon wogwe iinok, nanini inoba piyookwak, it aap Lewi mendek mban wone yugu naloobut mbanak me yonggolak nawooliya wurik me yendok-wandok koorok panggorogon inawooliya wukko'net nogo logowak o. It aap Lewi mendek nen mban wone yugu naloobut mbanak me yonggolak nawooliya wurik me wonage nogo arum logonet, liirogon aret ndegenggo logowak o,” yinuk, Muta yoreegerak paga it Lewi mendek inendage liiru mbanulik o.

⁵⁴ Ndi, Aliku ALA nen Muta lengganogo yoreegerak nogo abok aret it aakumi Iterali mendek nen ndak-ndak aret eerit nogo nogogwaarak.