Leendawi 4 - Ala Wone Peenok Peebi Mbanak

O Tiyon aaninggin iya lombok oba pereegerak wone

¹ Mbuti emas abinak pindan-pindan eeke nogo lek age, Mbuti emas at mendek mban wonage nogo abinak lek arit wangge, Yi yugum ndi yugum onggo nggwok Ala awi wurik me menggerak nogo, tu paga ugun mbo pit nogogwaarak wonage, Eereegerak yi, ao!

² Mbuti emas at mendek mban eerak kenok, onggo ambik menggi kwak, “O Tiyon aagalogwe ti, niniki kundugu o,” yogo nogogwaarak nogo, “Yogondak aap nggween nggabok paga ogobakkigika nen niyoowak nggween paga ogobakkigikerak kwak aga o,” yinuk, yogwe me, ao!

³ Mba'ngge nen inaagalogwe inelak kuninako menggaarak kwe, An nanebunu mendek perak, ndiimbu o karume logonet, inaagalogwe inabuwa mbaka'lek mbo piinet nugu mengga kwak Togop aret eerit nugu agaarik o.

⁴ Elege ngget ndarak elak abu nen inamili lobok ari, Elege-aabologwe mbi nggino yorogwe kwe, wogoraga'lek aret wonogwe, Eerak aret agaarik o.

⁵ It aa'nduk nen mbi-mbiingga ombat abe mban nunggo nogogwaarak nogo, yogondak inambi abu nen tu paga kambit nogwe, It maan nen nogo yum abe laambu paga nogo yogo nogogwaarak nogo yogondak nen aakumi inambeebuk pugu logonak paga nogo yugwi, Eeko agaarik o.

⁶ O Torom mendek eekwi onggo aaninggin inoba piyareegerak nogo ti, it ambi nen yeenggwaaraga'lek iigak, Ala nen aret ne ambit liingge nippiigak-wuppiigak eerogo inooreegerak nogo ti, iya negen kwe, An nanebunu mendek inoba piyareegerak nogo ti, mondok iya!

⁷ It inoweewi nagawan-nagawan ti, ndugu-ndugu abinak kwak lek, ineebe abu abe kikak naka'lek wonogwe, Inagabolo ti, yanggwi lan ari menggi kwak lek, abu alik lombok wonogwe, Ineebe ti, anen pera aago wonogwe, Ndi, yugum abinak lan ari menggi kwak inete togop aret wonogwe, Eerak wonogogwaarak kwe,

⁸ Yogondak nen it inagabolo paga ka'luk nen wande'ndak mili ku agago pege menggi kwak eerogo piige, Inagabolo amironggok eerogo piige, Eyo mbuk kwak inowak wono eerogo piige, Eerak tu paga nugwi kwe, Aakumi nen, “Yi nugu agaarik,” mbaka'lek aret agaarik o.

⁹ It mbi abu nen kanggwi ti, Ineyabu yarak lek kenok, mbi abu nen yagan wako logonet, ineebe mbuuluk eerogo piige menggerak me, Wooluwak paga inoorak kanggwi ti, op aret kwe, mbi abu nen kanggwi ti perak, mondok aaninggin aret o!

¹⁰ Togop me, it an nanebunu mendek inoorogo piinet nogogwaarak ti eyom paga Kumi iniki yanggonak mendek nen it inaagalogwe lombok aret kagak inambi negen inoorogo lakkologo nogogwaarak.

¹¹ Aliku ALA anini tayoppega'lek tek eerogo nappege, Anini kani kunik negen aakumi inoba kilirogo piinet nage, Eeke nagagerik, O Tiyon paga kani negen wuninogo pereegerak pup eerogo nenet nage logonet, nggween mban teppereegerak.

¹² Aap inendagembogut o nggween paga wonogwe inom, aakumi yi awi ndi awi wonogwe abok aret inom, nen “It o Tiyon inom wim mbanak kunduk, inom ogoorak kunduk, o Yerutalem tu unggwogo menggam ungguurak abu meek,” Mbako nogogwaarak kwe, kagak aret unggwogogwaarak o.

¹³ Ti unggwogogwaarak nogo ti, it Ala yorage kagak yoraga nen maluk eekwi, Ndi, it aap iniki abe koonak kagak inamiya kilirogo piyareegwaarak Ala unde nen kunduk maluk eerit nugwi, Eereegwaarak kenok unggwogogwaarak o.

¹⁴ It aap maluk eeko nogogwaarak nogo ti, aap inigen mbuk ineenggi nduk nugu mengga kwak, tu paga nugu agaarik o. Inayum irip paga aakumi inamiya lengge eerak wonage me, “Inayum mbaanggoorak inogole,” yogwe,

¹⁵ “Kit kinogole warak lombok me, nanip o,” yorogwe, “Nit mbaanniyokwak kineebe tayo yinip. Tayo yinip,” yorogwe, eekwi iinok, It mbaganit yi aap ndi aap wonogwe me ya yembanggak nda yembanggak nugwi iinok, It aakumi ti nen, “Ninom yime elaambirik logorak mage o,” yinuk, yorogo menggaarak.

¹⁶ Aliku ALA nen aret it ineebe mugogo-magago nappiyareegerak me, enegen wogonaka'lek aret wonage agaarik o. Togop me, aakumi nen it at eebe unde nogo inayuk wukwi, It aap inanggok inabuwa mbakwi, Eeka'lek aret menggaarak o.

¹⁷ “Nit yeenggwa niraawak lak, ao,” mba'nuk, ninigen na'nagak mban eereegurak kwe, We aanom warogo aret ninigen andi mban ee'ninabeegerak. Aakumi inanebunu ambi nen yeenggwa nira woraagun nduk, o nggayo logorak wurik paga nen toriigo nogogurak kwe, Yeenggwa nira woroolik aret o.

¹⁸ Tu nugwi niinok, ninom ogoorak nen inigen wo'niren nugu nogogwaarak me, Ninawoore'nggam nen wundi naga'lek puk aret wonogogurak o. Nit nda'nogogurak eyom abu aret lek arit nage, Nineenik logorak kuli abu aret ari nage, Ndi, nit kambuurak eyom panggoni wage, Eereegerak me,

¹⁹ Towe nggindooni o oolo ya'i nggare agan nege ti, iya negen kwe, It nit mu'niren-ma'niren nugwi inogowa perak, iya lombok wonogwe me, Puut-puut paga mu'niren nugwi, o karume paga wangge'ninakwi, Eeko nogogwaarak o.

²⁰ Nit nineenik logorak unde wo'ninaka Aliku ALA nen at amburu eerogo mippuurak leenogo pereegerak nogo, labu pugume wangge me pigaganggwi, Yi aakumi ndi aakumi inenggela'me logonet, at abu'me op logorak mbareegurak kwe, pigaganggwi, Eereegwaarak o.

²¹ O Erom Aagalukwe o Uyut paga wonage menggendak kat yi wae. I'ndok kangge, kale'nggen mbake, eeriyak mbake kenok ari logot o. Kat kunduk amburu toolak wokkeremenggerak nengge keenok, kumili kumbunuk wonage keegak, Kayum nggoorogo kagabolo kin eerogo pagagun o.

²² O Tiyon Aagalukwe kat yi wae. Eereegindak onggo aaninggin koba pagagwi ti, lek aret age, Wokkeren mbo pagi nagagerak elaambirik logorak lek kuli pugume aret ari nage, Eerigin kwe, O Erom Aagalukwe kat perak, Aliku ALA nen maluk eekendak onggo eeppagage, Komaluk kin eerogo pagage, Eerigin o.