Iberani 8 - Ala Wone Peenok Peebi Mbanak

Yetut ti, Ala unde ninowe nggwok aret o

¹ Nit wone yogwe yi nogo, alom liirogon yi aret yokkira o. Ala unde ninowe nggwok ti, togop aret wonage o. At ninogoba mondok tiyanak menggerak mbogut paga wone lengganogo yorage menggim eenggi abe'nggan paga kwi'nari laganeegerak logonet,

² it aakumi nen ooliya negen wureegwam nogome eeke lek o. At ooliya abe Ala nen wureegim Mage Lombok Menggim time aret ninake eeke agaarik o.

³ At Ala unde inowe nggwok nogo ti, yi mendek ndi mendek Ala ake pege, at ake warogo wogoge, eeke logowak nduk, leenogo mippogo menggaarak nogo ndak-ndak, Ala unde nit ninowe nggwok yi nogo kunduk, ninake eeke logonet, at we eeke logorak meek o. At togon amendek ambi Ala ake puurak aret o.

⁴ Ala unde ninowe nggwok yi nogo ti, nggween paga yime ninom logonetak en, at Muta nen, “Ala ndogop wogogo logonip o,” yinuk, lengganogo yoragagerak nogo ndak-ndak, wogogo logowak nduk, Ala unde ineebe muk mippiyareegerak wonogwe me, Ala unde ninowe nggwok logonetak lek o.

⁵ At Muta nen it aap Ala unde logonet, eeko logowam ooliya negen wuriyak nduk eeke me, Ala nen, “Puut irimbaga nen wakkagak, Yogop aret ogobakkigirumunggup o, yinuk, yokkigi yi, ndak-ndak aret eeko logowak, yegerak, yoret o,” yinuk, yoreegerak me, o eebe mbogut paga wurik wonage kagak, it Ala unde inoweewi nogo ti, we ogut wakkagak ooliya wurik paga eeko menggaarak kogo ogoorik o.

⁶ Ndi, yogondak eerogo pinaniyak kooneegerak wone nogo ti, mondok iya lombok me, wone maan yugu eeko logonet, eerogo pinaniyak meek kenok, Yetut nen Ala ninom lambunninabuwak nduk, wone maan yugu ti, eerulik. Ata, wone alik ngget mendek koonogo pinanege nagagerik, yogondak ninowe nggwok logonet, mondok alik negen ninake eeke agaarik o.

⁷ Wone aa'nduk Ala nen koonogo yo'niragagerak nogo, obeelom eeppiigo logonetak en, peebi eerogo piyoorak wone ti, koonogo yoraanetak lek kwe,

⁸ Ala nen wone yugu kagak at apuri alik eekwi iige nagagerik, inaruk wake logonet, “It Iterali paga wiganak inom, it Yekura paga wiganak inom, It ninom wone ngget mendek koonogo puurak eyom panggoni woraagin o.

⁹ It inombomini o Metit nen wogoren wundi woraakit nduk, neenggi pigiren wundi wage logonet, Wone ninom koonogo yoragagirak nogo, it liippunuk, eerit naga'lek mbareegwa, An inogoba Ala nen aret mbo piyareegirak me, Wone ti mendek an ambinom ninom koonogo pigin lek o. Ata, wone alik ngget mendek ninom koonogo pigin o, yinuk, an Ala nen aret yagi o.

¹⁰ Ti eyom abu aret age kenok, it Iterali paga wiganak wone ngget mendek ninom koonogo puurak nogo yi aret. Eeko logorak wone yoragagirak nogo, inikime nabenogo piige, It inikime liiru negen mbanogo piige, Eerigin me, An it inogoba age, ndi, it an napuri ogwe, eerugun o.

¹¹ It inendage abu tiyanak inom, inendage abu tebenak inom, abok aret neebe ineenu arugun me, Aap ambi at imbirak menggerak nen, Ala ndogop o, yinuk, mamunege, Aap ambi oreeluk yoge logonet, Ala eebe keenu aru o, yinuk, yoge, Eerugun lek aret o.

¹² It inobaabut maluk lombok logonet eekwi nogo, an lek eerogo pege, Ndi, it maluk eekwi nogo, an nen aberak logogin lek, nami eerogo pege, Eerigin o, Yinuk, an Ala nen aret yagi o,” yereegerak nogo ti,

¹³ “Wone alik ngget mendek koonogo pigin o,” yereegerak ti paga wone aa'nduk yugu nogo meek negen agagerak me, yi mendek ndi mendek maan mendek etenggen maluk agaatak kenok, mbo pogo menggaarak nogo kokwak aret mbo pereegerak o.