Iberani 7 - Ala Wone Peenok Peebi Mbanak

Keritut Meliketerek imbirak eereegwaarak wone

¹ Aap Meliketerek nogo ti, aakumi o Talem mendek inowe endagembogut inarum logonet, at tiyanak lombok menggerak Ala nogo, inom unde wonagagerak. Ne ambi paga aap inendagembogut ineebe ambik nen o Torom-Nggomora inawi oonda mbambunuk, inamendek kugun wonok nogwe me, Abarakam awuri inom muguren nage nagagerik, tebenogo piinok, kugun waganeegwaarak nogo ndininuk, iyokan ame wage me, aap Meliketerek nogo ka wungge nagagerik, ale'nggen Abarakam oba pereegerak.

² Ale'nggen oba pege mbareegi, Abarakam nen ndininuk wagagerak nogo, “Kinamendek 10 wonage kenok ambi yendenogo an nake panu o,” yinuk, Ala nen yereegerak nogo ndak-ndak yendenogo Ala ake aap Meliketerek nogo wogoreegerak. Aap Meliketerek endage toonak nogo ti, alom mbere wonage. Ambi ti, “Iniki Abe Koonak Logonet Eeka Endagembogut o,” yinuk, yogwe, ndi, ambi, at o Talem endagembogut wonagagerak me, endage ambi, “Aakumi Iniki Ugun Inale'nggen Mbakwi Inogoba Endagembogut o,” yinuk, yogwe, eeko nogogwaarak.

³ At aap Meliketerek nogo ti, agalo-ogoba inom, ndarak alom inom, ne nda'nagagerak inom, ne kambeegerak inom, mbininogo liiru mbanak lek ti paga at Ala aput kwak Ala unde mondok-mondok itok menggerak kogo o.

⁴ At Abarakam ti, nit apit ninombo aap nggwok aret wonagagerak kwe, at awim tebenogo piinok, wage nagagerik, kugun wogo ndininuk wagagerak nogo obeelom kenok, yendenogo Ala ake aap Meliketerek wogoreegerak ti paga, at Meliketerek nogo ti, aap mondok nggwok aret kogo o.

⁵ Ala nen wone, “Yogop ee'nu, ndogop ee'nu,” yinuk, aakumi Iterali mendek yorage logonet, “Kinamindik-kinamendek 10 wonage kenok, ambi yendenogo an nake panugwi kiinok, it an neebe unde Lewi mendek nen mban waganggo logowak o,” yinuk, yoragagerak liiru mbanak nogo ti, it Abarakam ombowologwe nen Ala ake pugwi nogo, inoreewi it mendek nen pugwi kwe kagak aret it Lewi ombowologwe nogo nen waganggo logowak nduk, yoragagerak kwe,

⁶ aap Meliketerek perak, Lewi mendek ndarak lek kwe, Abarakam nen Ala ake pugu yendenogo wogoge mbareegi, “Ala nen abok yoreegerak nogo porogo menggerak nogoba aap nggwok yi aret me, nagabiti o,” yinuk, yuurak kwe kagak, wagangge nagagerik, ale'nggen oba pereegerak.

⁷ It aap inoweewi inendage warak nogo nen, inawuri inendage lek tebenak mendek inale'nggen inoba piigo menggaarak nogo lek a? Togop eeko menggaarak me,

⁸ it aap Lewi ombowologwe Ala ake pugu waganggo menggaarak nogo ti, it aap ambi kangge kagak, obaane'me ambi mippegak eeko menggaarak mendek nen, Ala ake pugu waganggo menggaarak kwe, at ambi eereegerak nogo ti perak, “Ndi eyom paga kambeegerak,” liiru mbanak lek me, at mondok-mondok eenik logonet, wagangge menggerak nogo mendek negen aret kogo ogoorik o.

^9-10 Ndi, aap Meliketerek nogo nen Abarakam ka wungge mbareegi, Abarakam nogo nen at ombooluk Lewi nogo nda'naga'lek awo inikime kagak Ala ake pugu wogoreegerak me, it Lewi mendek Ala ake pugu waganggo menggaarak nogo nen Ala ake pugu aap Meliketerek wogoreegwaarak yuurak ti, op aret o.

¹¹ It aap Lewi ombowologwe nogo, Ala unde logonet eeko logowak nduk, Ala nen mippiige mbareegi, it nen aakumi inake eeko logonet obeelom eeppiyaawak nduk, “Yogop ee'nu, ndogop ee'nu,” wone yugu inom yoragagerak nogo, eeko logonet kwe, it eekwi paga aakumi obeelom aganaburak op logonetak en, peebi it aap Ala unde Karun ombowologwe mendek nogo mbo piinok, aap alik Meliketerek mendek ambi mippiyoorak koonenetak lek o.

¹² Ndi, it Ala unde logonet eeko menggaarak nogo, lek eerogo punuk obaane'me alik ngget mendek ambi eeko logowak nduk, mippiige kenok, it eeko logorak wone ngget mendek inom yorage menggerak.

¹³ At Meliketerek mendek mippuurak an yokkiragarak nogo ti, at ninowe Yetut nen eeke logorak me nduk, yokkiragi o. At anebunu Lewi mendek lek anebunu alik mendek me, at anebunu mendek ambi nen aakumi inake warogo kani kunggo menggam nogome Ala unde logonet, eeko menggaarak nogo, eeka'lek aret agaarik o.

¹⁴ At ninowe ti, anebunu Yekura mendek nit abok nineenu o. Ndi, Muta nen, “Peebi aap Yekura mendek ambi Ala unde logogin o,” yinuk, ti yuulik kwe,

¹⁵ aap anebunu alik ambi Meliketerek kokwak, Ala unde logowak nduk kin agagerak ti paga, Ala nen inanebunu Lewi mendek nogo mbo piinok, aap anebunu alik mendek mippuurak kooneegerak kogo ogoorik o.

Aap ambi Meliketerek kwak Ala unde logorak wone

¹⁶ Aap alik Meliketerek kokwak Ala unde logowak nduk, mippereegerak alom nogo ti, aakumi nen, “Aap ti mendek ndarak kenok ambi Ala unde logorak o,” yinuk, wone lengganak nogo paga mippulik o. Ata, at lek eerogo puurak lek mondok itok eenik menggerak ti paga Ala nen aret mippereegerak.

¹⁷ Ala nen at mippege kenok eeke logorak wone yoge logonet, “Aap Meliketerek eeke nagagerak nogo kokwak, kat an neebe unde logonet, mondok-mondok nake eeke logomunggun o,” yinuk, yoreegerak liiru mbanak nogo ndak-ndak aret mippereegerak.

^18-19 Ti eereegerak paga Muta wone lengganogo yoreegerak nogo, mugurok nogo logonet, obeelom eekkolaawok nduk, eekwi iigak kwe, obeelom eerogo piiga'lek we aanom warogo eeko nogogwaarak me, “Yogop ee'nu, ndogop ee'nu,” wone aa'nduk lengganak nogo, lek eerogo punuk, wone alik ngget mendek kin eeppereegerak me, “Wone yi, mugurok nogwe paga obeelom eeppinaniyak abet aret kogo,” yinuk, niniki lunik logonet, Ala owagam nagak eeko ogoorik o.

²⁰ It aa'nduk Ala unde logonet, eeko logowak nduk, mippiigo logonet, pilit mbakwi iyo, Ala endage kunogo mippiigo logolik kwe,

²¹ Ala nen at Yetut mippege logonet perak, “Kat an neebe unde logonet, mondok-mondok nake eeke logomunggun o, yinuk, At endage kunogo kumbuk mbaneegerak me, Oone alik arigin abu lek o,” yinuk, yoreegerak nogo ti, at endage inom kunogo mippereegerak ti paga at Yetut ninake eeke logowak nduk koonogo mippereegerak nogo,

²² eeke logonet, aa'nduk eekwi yobok ari nagagi kwak, yobok yigin lek o. Ata, yogondak mondok lik togon aret eerigin mbako logowok o.

²³ Ndi, ambi, it aa'nduk Ala unde logonet eeko nogogwaarak nogo, mondok-mondok eeko logolik. Ata, ambi kangge kagak obaane'me ambi mippegak eeko nogogwaarak me, ineebe ambik nen aret eeko nogogwaarak kwe,

²⁴ Yetut perak, mondok itok menggerak me, ambi obaane'me mi'na'nuk eeke logogin abu lek o. At alik nen mondok-mondok eeke logogin o.

²⁵ Togop me, nit aakumi niniki at oba panggombunuk, Ala owagam nogwe niinok, at ninake Ala yoriyak nduk mondok eenik mi'ndak menggerak me, ninagap ndarogo mondok obeelom agago pinaniyak op aret o.

²⁶ Ala unde ninowe nggwok ninake eeke logonet, obeelom eerogo pinanuwak nduk mippuurak agagerak nogo ti, Keritut aret o. It aakumi maluk eekwi inenggela'me nege nagagerak kwe, at maluk ambi eeke, ndi, aakumi inoone at oba pugwi, eeka'lek mbareegi, mbogut ta'mban-mban aago kagak, irimbaga tiyarogon kwippi laganeegerak. Kwippi lagangge mbareegi, at maluk eeka'lek mondok obeelom ake leenak aret me, nit aakumi ninabuwa nen ninake eeke wonage o.

²⁷ Ninake eeke logonet, it aap Lewi mendek Ala unde inoweewi nggwok nogo nen ko'lu-kii'me aakumi inake warogo Ala wogogo logonet, aa'nduk it maluk eekaatak nogo lek aruwak nduk, Ala wogogwi, ti'nuk, peebi aakumi ugun maluk eekaatak nogo lek aruwak nduk inake wogogwi, eeko mengga kwak, at togop eekeelik o. At Keritut perak, “It maluk eekwi nogo, lek eerogo piyaakit nduk inake kambikit o,” yinuk, Ala ake warogo wogogo nogogwa kwak, nit ninomaluk lek eerogo pinanikit nduk, at ne ambit mondok nggaruk togon ninake kambeegerak.

²⁸ Wone Muta yoreegerak ndak-ndak eeko logonet, it aap nggween paga mendek kagak Ala unde inowe nggwok logowak nduk, mippiigo menggaarak kwe, Ala nen at aput mippege logonet, endage kunogo yoreegerak nogo ti, wone Muta yoreegerak nogo aa'nduk kagak peebi yoreegerak me, at aput iniki mondok koleewak Ala unde ninowe nggwok ninake eeke logowak nduk, mippereegerak.