Iberani 2 - Ala Wone Peenok Peebi Mbanak

Ninagap ndariyak wone ti mondok iya lombok aret

¹ Togop me, nit Ala wone ninaruk konembunuk waganeegurak nogo, mbo punuk nomo agan nogwe niyo, ambinom nggirik-nggerok agago porogo logowok o.

² Ala nen, “Yogop ee'nu, ndogop ee'nu,” yereegerak wone nogo, it malayikat nen ninombomini we inaruk konembunuk, mbo puwak nduk, yoroolik. Ata, mondok eeko logowak nduk, lengganogo yorogwe iigak, taganogo punuk, maluk eeko mbareegwa, Ala nen onggo mondok ndak-ndak eeppiyareegerak me,

³ nit ninagap ndariyak wone mondok iya kooneegerak nogo, kobak eerogo punuk wonogwe niinok, nit teppinanigin mbakop? Mondok lek o. Wone ti, aa'nduk ninowe nen aret paganogo yorage mbareegi, it koneneegwaarak nogo nen iniki yungguppegak yo'niroolik inoone mondok abet aret yo'nirogwe iigak,

⁴ “Wone yi abet aret o,” yinuk, waawok nduk, Ala nen ninagabiti warak mendek eeke, tam warak negen eeke, eerubok mendek eeke, eerit nage logonet, ninalitak lombok eeko logowok nduk, at Ala iniki mbareegerak nogo ndak-ndak Aberiniki nen tumbu'niragagerak kwe, mbo pugwi niinok, teppinanigin mbakop? Mondok lek aret o.

Ninagap ndarogo wo'niren noorak tu yareegerak wone

⁵ “Mbogut-nggween yi lek age logonet, obaane'me ngget mendek ambi ari woraagin o,” yogo monggoorak nogo ti, at Ala nen, “Malayikat unde logowak,” mba'nuk, yuulik.

⁶ Ata, aap ambi Ala wone liiru mbanak paga nen ari logonet, “Nit aakumi yi, taani me nduk, abe'ninake, Ndi, aap inapuri nit yi, taani me nduk, liippinanege, Eeke menggendak o?

^7-8 We yogondak luululuk, it malayikat tiyanak wonogwe iigak, nit aakumi tebenak logowok nduk, ogobakkigirogo pinanege, Ninendagembogut abu tiyanak ninayuk warak logowok nduk, koonogo pinanege, Eeke nagagindik, Yi mendek ndi mendek abok aret nit mban ninabu'me logowak nduk pereegindak o,” yinuk, yereegerak nogo ti, yi mendek ndi mendek nit aakumi ninabu'me pege logonet, ambiriluk ambi ninabu'me logorak lek ti mbarulik. Ata, abok aret ninabu'me logowak nduk kooneegerak nogo, liiru mbaneegerak kwe, yogondak yi paga ninabu'me wonage kaga'lek ogoorik o.

⁹ At Yetut perak, tiyanak mondok ayuk warak wonage kogo ogoorik o. At Ala iniki kunik en eeppinanege menggerak me, malayikat tiyanak iigak, aput ninalitak lombok ninake kambuwak nduk, ne ambit luulu at tebeppege mbareegi, nggween paga wambi wage nagagerik, ninake kangge logonet, andi-pandi kagak waganeegerak ti paga, aap ambi amindik-amendek li'luk eeppogo mengga kwak, Ala nen at aput togop aret ayuk wurogo tiyappereegerak wonage agaarik o.

¹⁰ At yi mendek ndi mendek abok aret wakkage nagagerik, unde menggerak Ala nogo nen, “Napuri apit ninom ndak-ndak tiyanak logowok o,” yinuk, ninagap ndaruwak nduk, ninowe nen wo'niren noorak nogo, abut mbangga'lek kagak wo'niren noorak meek me, at kunduk iniki kole aruwak nduk, “Aa'nduk abut mbanikit o,” yinuk, andi-pandi eerogo at oba puurak kooneegerak nogo ti, op aret kooneegerak o.

¹¹ At Yetut nen ninomaluk lek eerogo punuk Ala ake leenogo pinanege menggerak nit inom, at leenogo pinanega inom, ninogoba Ala ambit aret me, ninowe Yetut nen, “Nawuri o,” yinuk, yo'niroorak agabiti mbaka'lek logonet,

¹² “Kendage wiganogo noreewi wonogwe me yoranet nage, Kapuri kuwak aago inenggela'me kendage tiyappege, Eerigin o,” yinuk, yoge,

¹³ ndi, ambi ari logonet, “An niniki at paga panggonak wonage agarik o,” yinuk, yoge, ndi, ambi ari logonet, “Ala nen wo'nereegerak napuri ninom yime aret ogoorik o,” yinuk, yoge, eeke menggerak o.

^14-15 At Yetut ti, aap a'nuk kambemenggerak paga, at kanggwi alom unde menggerak Tile nogo omaawi lek eerogo punuk, it kambuurak inagabiti nen, “Nabelan-kabelan aruwok lak piriguru agan wagagerak yi, ao,” yinuk, iniki mondok aaninggin ndugu agan koonit nugu logonet, iniki wakko'net nugwi nogo, teeluk eerogo piyaakit nduk, nit at apuri nineebe nggween paga kanggo monggoorak mendek ndak-ndak aret eekkolagagerak.

¹⁶ At eereegerak nogo ti, it malayikat mendek yeenggwaaraakit nduk eerulik o. Ata, at Abarakam ombowologwe yeenggwaaraakit nduk, eereegerak me,

¹⁷ nit aakumi maluk eekwi niinok, Ala anini ninombake nogo, iniki yanggo yuwak nduk, Ala unde inowe nggwok logonet, ninabuwa nen puk aga'lek ko'lu-kii'me ninake eeke logowak nen, nit ee'ninake menggerak nogo, abok aret at ndak-ndak eeriyak age mbareegi, aa'nduk at awuri nit pogom aret eekkolagagerak.

¹⁸ At iniki nggagangge kagak, iniki lek agagerak kwe kagak, ogogumbuk nu'lek logorak mamunggolagagerak me, yogondak nit niniki nggagani wage kenok, ninake eeke logonet, yeenggwa nirage wonage agaarik o.