Iberani 13 - Ala Wone Peenok Peebi Mbanak

Ala inikilom ninombaruwak nduk, eeko logorak wone

¹ Kit Ala apuri aret wonogwe me, niniki-kiniki kunik eekwi nogo, lek age kero, liirogon aret eeko logonip o.

² It aakumi nen malayikat mendek kagak, “Yi aakumi aret o,” yinuk, kobak logonet inabugo lako nogogwaarak me, it aakumi nggiru kiya wogwe iinok, keyage warogo kiniki ale'nggen paga wogonako logonip o.

³ It aakumi keele maarak wonogwe nogo, “An ninom keele maarak negen wonage kagi,” yinuk, yeenggwaarogwe, ndi, aakumi nen yawi paga inookwi iinok, andi kogwe nogo, “An kunduk, togop aret noo'netak en, andi kaanetak o,” yinuk, iniki eyak wappiigwi, eeko logonip o.

⁴ It aap kumi kundugume wurinabit nugwi, komologwe tawe ugun wurinabit nugwi, eekwi iinok, Ala nen inowak loonogo maluk onggo wogoraagin me, aap ambi akwe koloorak nduk, lambumbiigwi nogo ti, abu obeelom aret me, tiyappuurak aret o. Ndi, kolage logomenggerik, imbirak nogo yuurak ti kunduk, abu obeelom mban aret me, nogo yugu menggam maluk age kero, arum liirogon logowak o.

^5-6 At Ala nen ari logonet, “An teppinagage, eraanggi mbo pinagage, eerigin lek o,” yinuk, yereegerak me, wu mban uugwe-uugwe mbarit nugwi paga wu ti, ayeloman eekkinabukwak, liippogo logonip o. Kinamendek nano mendek ambi wonage kenok, “Yi abu aret wonage o,” yinuk, kiniki tayenak logonet, ale'nggen paga nugu logomunggup o. Ala nen, “An mbo pinagagin lek o,” yinuk, yereegerak wone ti paga niniki panggombunuk, “Ninogoba nen yeenggwaanirage menggerak me, aakumi nen an eeppanugwi nogo, an nagabiti mbarigin lek o,” yinuk, yogo logorak ti op aret o.

⁷ It aa'nduk togon Ala wone yokkirogo nogogwaarak kinogobamini nogo, inoba abeko logonet, it abet mba'nuk obeelom eerit nugu nogogwaarik, kambit nogogwaarak nogo, liippunuk, kit togop ndak-ndak abet mba'nuk eerit nogo logonip o.

⁸ Maan inom, yogondak inom, peebi inom, at Yetut Keritut alik ageelik mondok itok aret menggerak o.

⁹ Yi wone ndi wone alik agan wogwe nogo konembunuk, kiniki nomonggiren nogwe iyo, liippogo logonip o. It ando nen, “Yi mendek ndi mendek nonggo logonet, Yogop ee'nu, ndogop ee'nu,” yinuk, wone lengganak nogo eekwi paga iniki kole eekkolaga'lek we aanom warogo eerit nogwe me, kit nen yogo logonet, “Wone ti paga niniki kole ee'ninaburak lek o. Ata, Ala iniki kunik en eeppinanege kagak niniki kole ariyak ti, op aret o,” yinuk, mbako logonip.

¹⁰ It ooliya wuppunuk, Ala unde logonet, aakumi inake eeko menggaarak nogo nen nit Ala ake warogo wogogo monggom ndomba ninake warak yi, it na woroorak mondok lek o.

¹¹ At Ala unde inowe nggwok nogo nen aakumi inomaluk lek aruwak nduk, Ala ake ndomba wappunuk, amiya wonok Mage Lombok Menggim pi unggwage kagak, eebe yagat endekem kani kunggo nogogwaarak nogo ndak-ndak,

¹² Yetut kunduk, at amiya paga nit aakumi ninomaluk lek eerogo punuk, Ala ake leenogo pinanikit nduk, yagan warogo o kota endekem aret kambeegerak.

¹³ Togop me, at o kota endekem ninake kambikit nduk nage kagak miyuk-meya eerogo pogo nogogwaarak nogo kokwak, nit kunduk ti ndak-ndak miyuk-meya eerogo pinanugwi iigak, at mugurok o kota endekem aret wundi nawok o.

¹⁴ Nit niname kota mondok-mondok logorak nogo nggween paga yime wonage lek o. Ata, niname kota alik ambime nawok nduk, we luulu tokkogo ogoorik o.

¹⁵ Togop me, eyoonggen abe yi'nage menggi kwak, “Yetut ninowe aret o,” yinuk, Keritut ninake eereegerak paga Ala ake warogo wogogwi negen, nit kulinik-kalinik ninoone paga Ala alut eeko logonet, endage tiyappegak mban eeko logowok o.

¹⁶ Ndi, ti eeko logonet, Ala ake warogo wogogo nogogwa kwak, at ake aakumi obeelom eeppiigwi, yeenggwaarogwe, eekwi niinok, Ala inikilom ninombake menggerak me, mari eerogo puurak ti mage o. Ata, eeppiinet nogo logonip o.

¹⁷ It kinogobamini nogo ti, “Aakumi nonggop inarum wonogotak o, yinuk, Ala nen yo'niraagin,” mba'nuk, liirogon aret kiniki arum wonogwe me, inabu'me logonet, wone yokkirogwe nogo, liirogon aret konenggo logonip o. It inoone konengga'lek wonogwe kiinok, inale'nggen lek logonet, kinarum liirogon wonogwe lek paga maluk aret eekwi kiyoorak me, iniki ale'nggen paga kinarum logowak nduk, inoone liirogon aret konenggo logonet, obeelom eeppiigo logonip o.

¹⁸ Ninake tamban mban eeko logonip o. Nit obeelom eerit nogo logorak mban, “Ao,” mbako monggoorak me, yi eekak ndi eekak eeko logonet, maluk eekoorak ambi ninikime abe'naga'lek kenok, “Obeelom aret eerit nogo monggoorak kogo,” yinuk, mbako ogoorik o.

¹⁹ Ala nen an mbet-mbet kinowagam nappani woraawak nduk, “Nake tamban mban eeko logorak ao,” mbake logonet yokkiragi o, noreewi.

Inake tamban eereegerak wone

²⁰ Ndi, yogondak abu aret o, noreewi. Nit niniki ugun tayenak ale'nggen logowok nduk eeppinanege menggerak Ala nogo nen wone koonogo yo'niragagerak nogo, “Mondok-mondok eerigin o,” yinuk, abet mbako logowok nduk, ndomba mondok liirogon ndegenninake menggerak ninowe Yetut nogo, ninake amiya kili'nage mbareegi, kambunuk nogo menggam nen eenik agago mippereegerak me,

²¹ at Ala eeriyak mbake menggerak nogo, kit mondok ndak-ndak eeko logobagip nduk, yi mendek ndi mendek abe mendek kenok mban li'luk eerogo wokkirage, ndi, Yetut Keritut eereegerak paga kit eeppinagarak inikilom mbake menggerak nogo eeppinagage, eeke logogin me, at endage mondok-mondok tiyappogo logowok o. Amin!

Irip paga yoragagerak wone

²² Noreewi o. Kit eeko logorak an wone mbuuluk liiru mbanggiragi yi, kiniki abe paga waganggo logobagip nduk, yokkiragi o.

²³ Ninore Timotiyut keele maarak wonagagerak nogo, muk piinogo pereegwaarak kineenu arubagip nduk, yokkiragi o. At mbet-mbet an neya wage kenok, nimbirak aret kiya woraagun o.

²⁴ It kinarum menggaarak inom, it abet mbakwi Ala apuri inom, abok aret, “At nen, Wa! yokkiragi, yegerak,” yoraanip o. Ndi, it aap o Italiya mendek ninom wonogwe nogo, abok ninom nen keyage wakkinako o.

²⁵ Ala iniki kunik en eeppinagage logonet, kinarum logogin o. Abu aret yokkiragi o. Wa!