Iberani 11 - Ala Wone Peenok Peebi Mbanak

Abet mbakwi paga waganggo nogogwaarak wone

¹ Nit niniki abet mbakwi eebe ngge o? Nit niniki abet mbakwi eebe nogo ti, yi mendek ndi mendek nit niniki lunik wonogwe nogo, “Abet aret waagun,” mbakwi, ndi, ninigen kaga'lek kwe, “Abet aret wonage,” mbakwi, eekwi ti aret o.

² It ninombomini aa'nduk ndarak nogo ti, Ala yoragagerak wone nogo, “Abet aret kogo o,” yinuk, abet mbakwi iinok, Ala nen, “Aap yi, obeelom aret o,” yinuk, inombake nagagerak.

³ At Ala oone paga nen mbogut-nggween wakkagagerak nogo ninigen kogo logonet, “Yi Ala nen aret wakkagagerak o,” yinuk, abet mbakwi paga nineenu ogwe me, yi mendek ndi mendek ninigen kogwe yi, ninigen kaga'lek nogo paga nen wakkagagerak kogo o.

⁴ At Kayin nogo nen amendek maluk negen Ala ake pi wagagerak kwe, Kaben perak, Ala yoreegerak nogo, “Abet aret yo'nigi,” mba'nuk, amendek obeelom mendek warogo Ala ake pi wage mbareegi, ake pi wage nogo Ala enegen kage nagagerik, “Aap yi, iniki abe koonak aret kagi,” yinuk, yereegerak. Ndi, at Kaben nogo ti, muk kambeegerak kwe, at abet mba'nuk eereegerak wone nogo nit awo mbininggwi me, ninom wone yogwe negen aret ogoorik o.

⁵ Aap Enok kunduk, iniki abet mbareegerak paga kambulik Ala nen eenik wonok laganeegerak kagak, oreewi nen kwaareegwaarak mendek lek aret kogogwaarak. Wonok lagangga'lek kagak, “At Ala imbirak iniki kunik wonagagerak o,” yinuk, Ala wone liiru mbanak paga kogo monggoorak nogo o?

⁶ “Ala abet aret menggerak me, niniki abe paga at owagam nogwe niinok, onggo wo'niraagin,” abet aret mbako logonet, at owagam nagak eekwi niinok, inikilom ninombake menggerak kwe, aap ambit-ambi abet mbaka'lek kagak, at owagam nage kenok perak, Ala inikilom ombarigin abu lek o.

⁷ Aap Nu kunduk, peebi eeriyak awo kin kaga'lek kagak, Ala nen kurumbi yoge mbareegi, “Yi abet aret eeriyak yo'nege kagi,” yinuk, ayuk wuke logonet, akwe-apuri inom inagap ndaruwak nduk, o yiiro wureegerak. Ala nen at yoreegerak nogo abet mba'nuk, yiiro wureegerak ti paga, “Kit aakumi maluk eekwi onggo niyo paga kinoorigin o,” yinuk, ineenu eeppiyareegerak me, nit abet mbakwi paga at Ala nen, “Aap yi, iniki abe koonak aret o,” yinuk, yo'nirage nogo ndak-ndak, at Nu iniki abet mbareegerak paga, “Aap yi, iniki abe koonak o,” yinuk, yereegerak.

⁸ Ndi, at Abarakam kunduk, Ala nen, “Eyate kwak nggween ambi kat unde logonok nduk, wokkirigin me, nak o,” yoge mbareegi, o ti, eenggo'lek kwe kagak, “Abet aret wo'nirigin,” mba'nuk, nagagerak.

^9-10 “O wokkirigin o,” yoreegim nogome aret nagagerak logonet kwe, “O yi ti lek o. Ala nen o kota alik ambi mondok logorak mendek ogobakkigirikit koombunuk, ogobakkigiremenggerak nogome, an aret unde eeppanigin o,” yinuk, abet mba'nuk, tokkage logonet, Itak Yakup imbirak inom ineyate kwak kolaawak nduk, yoragagerak me, it inom aap nggiru kwak ooliya wuppunuk, ya nogo yegak nda nogo yegak eerit nugu nogogwaarak.

¹¹ At kwe Tara kunduk, abu kweegelo aagaluk ndariyak meek aret kwe, at Abarakam nen, “Ala yegetak ndak-ndak eeke menggerak me, yo'niragaarak nogo abet aret eeppinanigin kagi,” mbareegerak paga Ala nen akwe nogo agabolo ki eeppege mbareegi, Abarakam apuluk aret ndareegerak.

¹² Ndi, aap Abarakam nogo apuluk ndaka'lek me, kambeegerak negen wonagagerak kwe, iniki abet mbareegerak paga ombowologwe laaluguragan mbogut paga wonage kwak, mbini kale'ngga yi aa'nggi paga wonage ineenggi lingginiyak meek kwak, nogo ndak-ndak aap ambit Abarakam paga ombowologwe aret wigannogogwaarak.

¹³ It aap ti abok aret, “Wokkiraagin o,” yoragagerak wone nogo, agalu'mok negen o nda taati wage inigen nakkogo nogogwaarik, “Nogo yi aret ee'ninabi wage kogo o,” yinuk, iniki ale'nggen mbako logonet, “Nit aap o nggween paga yime ninaworak wonogwe lek o. Aap nggiru negen aret ogoorik o,” yinuk, wone yugu eebe liirogon woolik kwe, “Abet aret wo'niraagin o,” yinuk, iniki abet mbareegwaarak ti paga, eebe waganeegwaarak negen aret logonet, kambit nogo nogogwaarak.

¹⁴ It aakumi togop yogwe paga inanggween alik ngget mendek it logowam kwaakkologo logonet, yogo menggaarak iigo o.

¹⁵ It aap ti, inawi alom paga mbo pereegwaarak nogo, iniki aberak logonetak en, yungguninuk inawi alom paga nanetak op kwe, togop mbarulik o.

¹⁶ It iniki nen, “Nit ninawi abe mbogut paga kola nawok lak ao,” yinuk, miippunuk, kambit nogo mbareegwa, Ala nen it iniki mbareegwaarak nogo ndak-ndak inawi abe kota negen pipuk eerogo piyareegerak wonage me, “Ninogoba Ala o, yinuk, yo'nogo logorak op aret,” mbake menggerak.

^17-19 Ala nen Abarakam abut mbanikit nduk yoge logonet, “Kaput warogo an nake kani kumbu o,” yoge mbareegi, Abarakam nen, “Kaput Itak paga nen kombowologwe apit wigannarugun o, yinuk, yo'nege mbaki, abet aret mbakirak kwe, Waru o, yo'nege me, nonggop togon wari?” ti mbarulik. Ata, “Ala nen kanggaatak ineenik eerogo mippiige menggerak neenu me, togop aret eenik eerogo mippigin kagi,” yinuk, abet mbake logonet, “Naput ambolom ndarak yi kagak aret warikit,” mbareegerak. Ndi, Ala nen kanggaatak ineenik agago mippiige menggerak abet mbareegerak nogo ndak-ndak, iniki nen abu warikit mbareegerak ti paga abet aret wakerak mba'nuk, Ala nen eenik agago mippereegerak negen aret mbaruwok o.

²⁰ Aap Itak nen, “O peebi Ala nen togop eeppinagage kaamunggup o,” yinuk, Ala yoreegerak nogo abet mbake logonet, ale'nggen Yakup Etawu imbirak inoba piyareegerak.

²¹ Ndi, Yakup kunduk, kambikit nduk eeke logonet, “Ala nen eeriyak yo'niragagerak nogo eerigin aret o,” yinuk, abet mba'nuk, Yutup apuri inalitak lombok ale'nggen inoba piige nagagerik, owaanggun paga anep kumbunuk Ala alut eereegerak.

²² Ndi, Yutup kunduk, kambuurak eeke mbareegi, Ala nen wone at yoreegerak nogo abet mbake nagagerik, yorage logonet, “Kit Iterali mendek o Metit yime logomunggup lek o. Wundi namunggup aret me, wundi nogo logonet, an nowak nenenak inom wonok namunggup o,” yinuk, eenik logonet, wone abet mbareegerak paga awoneninu kiliriragagerak.

²³ Muta agalo-ogoba kunduk, Ala nen eeriyak wone yugu nogo abet mba'nuk, elege Muta nda'nagagerak mondok abe amuni mbanak kogo nogogwaarik, aap endagembogut wone lengganeegerak nogo inagabiti mbaka'lek logonet, kumaappi nogogwaarak kagak, tut kenagan peneneegerak nogo o.

²⁴ Ti'nuk, peebi Muta nogo tawe age nagagerik, wone yoragagerak nogo mban abet mbake nagagerik, “Pirawun apuluk nogo aagaluk yo'niriyak ti neebi,” mba'nuk,

^25-26 “Peebi Ala nen onggo wo'nirigin o,” yinuk, iniki aberak logonet, “O Metit yime yi mendek ndi mendek abe mban wonage yi, iya lek o. Ata, Keritut nen peebi eeppinaniyak tokkogwe ti, meek ninombakwi kwe, peebi eeppinaniyak ambi wonage me, iya o,” mba'nuk, maluk eerit nogo logonet, ne ambiriluk inikilom mbako menggaarak mendek nogo mbo punuk, Ala apuri aaninggin-paaninggin inoba piige nogo, “An ninom aret eeppanugo logowak o,” yinuk, miippunuk, Iterali wonogwe me, nagagerak.

²⁷ Ala nen yoreegerak nogo, abet aret mbake nagagerik, “Aap endagembogut anini nen nooke kenok ti, nooruwak aret o,” yinuk, o Metit mbo punuk, agabiti lek aret wundi nagagerak. Ninigen kaga'lek mendek nogo, at enegen kage negen aret eereegerak me, mondok ogogumbuk a'nuk, mugurok nage nagagerak.

²⁸ At malayikat aakumi inooke menggerak nogo nen, it aakumi o Metit mendek inapuri manggu ndarak inoorit nage logonet, Iterali mendek inom inooke kero, Ala yoreegerak nogo, at Muta abet mba'nuk, laago Obaga Mbo Noorak lako logonet, tu nggambe paga amiya labunogo pit nagagerak nogo o.

²⁹ Ala nen yoragagerak nogo abet mbako logonet, nggween woloonak paga nugu mengga kwak, Iterali mendek nogo niyo Merah yenggenak paga wunda wogo mbareegwa, it Metit mendek nen togop aret wunda woraawok nduk, eekwi me, niyo ndonggoninabeegerak o.

³⁰ Ala nen yoragagerak nogo abet mbako logonet, o Yeriko yengget-wangget eekwi iigak, nogo 6 yippunuk, ko'lu 7 paga yugum pak wurik nogo langgu-langgu wambit nagagerak.

³¹ Kwe yawukak Arakap kunduk, Ala nen it Iterali mendek eeppiige nogo, aruk konembunuk, iniki abet aret mbake nagagerik, aap o pekkaawok nduk wogogwaarak nogo, iniki obeelom paga kumaappiyareegerak me, peebi it aap Ala wone taganeegwaarak nogo inooko logonet, at kwe nogo teppereegwaarak.

³² Ndi, ambi ngge inom yokkira o. Lek o. It aap Nggireyon kunduk, Mbarak kunduk, Timeton kunduk, Yepeta kunduk, Ndawut kunduk, Temuwen kunduk, Ala nen yorage kagak yoraga kunduk, it abok aret togop mban Ala nen it yoragagerak wone abet mbareegwaarak paga, iya negen eeko nogogwaarak nogo mbininogo yokkiroorak op aret kwe, oonegen lek age me mbo o.

³³ It aap ti, Ala nen yoragagerak abet mbareegwaarak paga, it aap inendagembogut inabu'me piigo menggam tebenogo piigwi, obeelom eerit nogo logonet, a'me nggelok eeko logowak nduk, koonogo piigwi, Ala nen yoragagerak nogo ndak-ndak aret waganggwi, aakumi inooka singa nogo inambe keele maarogo piigwi,

³⁴ kani omoonuk eyak ambik kwe, naganak-paganak eerogo pugwi, tege wooluwak paga inooriyak nduk eekaatak kwe, melak togon woppatinuk nggarek yogwe, ndeyak aganaketak kwe inomaawi eekkologwe, ndi, waka'ngget a'nuk wim nambuko logonet aap inanebunu alik mendek inawuri yigin unde nogo mondok mugogo wumbiinet nugwi, eerit nogo nogogwaarak.

³⁵ It kumi ando inaagalogwe kanggaatak ineenik agago wogorogwe, ndi, it ando perak, “Peebi nineenik mondok logorak mippinanigin me, ninili eerogo teppinaniyak mage o. Mondok-mondok ninooko logonip o,” yogwe iinok, iniki mondok alik negen taganak-mbaganak eerogo inookwi iinok kanggwi,

³⁶ it ando miyuk-meya eerogo piinok yawi inookwi, ando mbutigeele paga ineenggi-iniyok maarogo mambiigo menggam mambiigwi,

³⁷ it ando yugum paga iniki togu eerogo inookwi, ando nggege paga inobate mbanogo piigwi, ando tege wooluwak paga inookwi, ando inayum abu lek kenok, ndomba-kambin inagabolo mbelanogo inayum yirippunuk, mbi abu nugwi iigak, “Aap maluk me,” nduk, inogole yogo logonet, maluk eerogo piigwi, eeko nogogwaarak.

³⁸ Aap ti abu obeelom aret me, o maluk nggween paga yime nugu logorak meek kwe, kagak, karume inom, eyonggaame inom, mbaganit nugu logonet, “O nggeeme nogo yi na o,” yinuk, mbuun ambena inom, ndoome inom, ugun nogo yit nugu nogogwaarak.

^39-40 It aap ti abok aret Ala yoragagerak nogo abet mbako logonet, eerit nogo nogogwaarak paga Ala nen, “Aap yi obeelom aret,” inombake nagagerak kwe, at Ala nen nit awo niigak it inaa'nduk obeelom eeppiyoorak mbarulik o. Ata, nit ninom ambugwi obeelom eeppinaniyak op mbareegerak me, wone yoragagerak nogo, eeppiiga'lek kagak, kambit nogo nogogwaarak.