Iberani 1 - Ala Wone Peenok Peebi Mbanak

IBERANI

AAKUMI IBERANI MENDEK INAKE LIIRU MBANAK WONE Ala nen yoge kagak, apuluk nen yo'nirage menggerak wone

¹ Maan aa'nduk Ala mbake menggerak nogo ninombomini ineenu aruwak nduk, Ala nen yorage kagak yoraga nogo, kulinik-kalinik inabi paga yorage, eerubok mendek inenggela'me eeriyak yorage, anebunu alitak lombok abok aret eeriyak yorage, eeke kenok, it nogo nen ninombomini yorogo nogogwaarak kwe,

² o yogondak irip paga perak, ninenggela'me logonet, ogoba oone yo'nirage logowak nduk, aput lombok nappi wagagerak o. “Naput mban yi mendek ndi mendek unde logowak o,” yinuk, mippege nagagerik, ogoba nen, “Yogop ee'nu, ndogop ee'nu,” yoge kagak, aput nogo nen mbogut-nggween yi mendek ndi mendek abok aret wakkagagerak.

³ Ogoba mondok tiyanak eebe eya ndelenak-welenak aago kenok, “Wi!” ugwi nogo kokwak, aput ndak-ndak aret menggerak. Aput nogo ti, ogoba iniki ndak-ndak aret. Yi mendek ndi mendek wakkagagerak nogo abok aret, at oone omaawi paga pipporogo menggerak. Ninomaluk abok aret lek eerogo mbo nappege nagagerik, at agi mbogut paga mondok tiyanak menggerak nogo, eenggi abe'nggan paga tiyarogon kwi'nari laganeegerak wonage o.

Malayikat tebenak iigak, aput tiyanak menggerak wone

⁴ Togop aret me, at Ala nen, “Naput o,” yoge nagagerak nogo ti, malayikat ambi yoroolik me, it malayikat mendek tebenak negen iigak, at aput mondok tiyanak aret o.

⁵ At Ala nen malayikat mendek ambi yoge logonet, “Yogondak kat an naput age, ndi an kat kogoba age, eekoorak o,” yinuk, ti yorulik. Ndi, ambi ari logonet, “An ti, at ogoba age, ndi, at ti, an naput age, eerugun o,” yinuk, ti yorulik mban.

⁶ Ata, Ala nen at aput ambolom ndarak nogo, o nggween paga yime wuppi woraakit nduk, eeke logonet, “Kit an nayonggo nugu monggotak malayikat abok aret at mban alut eeko logonip o,” yinuk, yorage,

⁷ ndi, ti'nuk, it malayikat eeko menggaarak nogo mbiningge logonet, “It an nayonggo nugu menggaarak malayikat nogo, o wiya pogom agago piige, Ndi, it an nayeloman mini nogo, kani omoonuk kwak eerogo piige, Eeke minggirak o,” yinuk, mbiningge, eereegerak kwe,

⁸ at aput eeke logorak awone ari logonet perak, “Nogoba Ala wae. Koone lengganogo yorage menggenom ti, mondok-mondok aret logogin o. It kabu'me menggaarak inawone mondok koonak mban mbangge menggendak ti, Mbim obate mbanak ti kwak aret me, kat in wakkagak agan nogo logogun o.

⁹ It obeelom eekwi iinok ti, kinikilom mbake, Ndi, maluk eekwi iinok ti, keebi lombok mbake, Eeke menggendak me, At Ala ti, kat kogoba Ala aret me, iniki ale'nggen kombake logonet, Amburu kilirogo pagareegerak paga koreewi tebenak iigak, inirimbaga tiyappagareegerak o,” yinuk, yoge nagagerik,

¹⁰ wone alik ambi ari logonet, “Nogoba o. O maan aa'nduk nggween yi, alom kwippege, Kat keenggi paga nen mbogut ogobakkigirogo pege, Eereegindak o.

¹¹ Mbogut inom, nggween inom, ti lek arigin kwe, kat perak, kitok mondok aret menggendak o. Yum maan yugu me, nibik ari kenok, mbo pogo mengga kwak, mbogut-nggween yi togop aret lek eerigin o.

¹² Yum etenggen maluk agaatak kenok, yuwi-mbuwi eerogo mbo punuk, Obaane'me alik ngget mendek yikkologo mengga kwak, mbogut-nggween yi, togop eerigin kwe, Kat perak, alik ageelik, kitok aret wonage, Nda'nagagindak eyom lek ageelik mondok aret wonage, Eeke menggendak o,” yinuk, aput yoreegerak kwe,

¹³ “It kinom wim mbanak mendek nogo, aan lebenogo kabu'me piiga'lek neegak, An neenggi abe'nggan kwi'nari mok o,” yinuk, yoreegerak nogo ti, it malayikat nen eeruwak nduk yoroolik o. Ata, aput nen eeruwak nduk, yoreegerak ti paga, nonggop mbakop? Lek o. At Ala nen, “Naput o,” yoge nagagerak nogo ti, it malayikat mendek ambi togop yoroolik me, it malayikat mendek tebenak negen iigak, at aput mondok tiyanak aret kogo o.

¹⁴ Ndi, it malayikat ti nonggop negen menggaarak mbakop? Lek o. It nogo aakumi inogoma ninigen iiga'lek nogo pogom logonet, Ala ake eeko menggaarak me, Ala nen aakumi inagap ndaruwak nduk, leenogo piyareegerak nogo, yeenggwaaraawak nduk, yonggo nappiige menggerak it aret o.