Etet 9 - Ala Wone Peenok Peebi Mbanak

It aakumi Yakuri mendek ineegin tiyak yereegerak wone

¹ Aap endagembogut nen it Yakuri mendek eeppiyoorak wone lengganogo wumbereegerak nogo eyom panggoni wage mbareegi, it Yakuri ineebi inombakwi nogo nen, “Tut 12 Arat penenak tanggal 13 paga it Yakuri mendek tebenogo piyaawok,” mbareegwaarak kwe, mbeyok ari logonet, it Yakuri mendek nogo nen it ineebi inombakwi nogo tebenogo piyoorak age mbareegi,

² it aakumi Yakuri maluk eerogo piyoorak mbakwi nogo inooruwok nduk, it Yakuri mendek yi o ndi o aap endagembogut Akatiwerot unde menggim inawi yi kota ndi kota abok aret kuwak eerit nogo mbareegwa, it aakumi inanebunu alik lombok nogo abok aret nen it Yakuri ineebe paga inagabiti mbareegwaarak.

^3-4 Ndi, at Morekayi nogo aap endagembogut awi o nggwok abe wurik me endage tiyak ari, at endage yi o ndi o nenaarogo pit nagagim nogome abok aret wiganinuk nage, eereegerak me, logonet-logonet at omaawi mondok arit wundi nage paga it aap yi o ndi o inoweewi nagawan-nagawan inom, aap endagembogut abu'me menggaarak inom, at awuri yi o ndi o unde menggaarak inom, aap endagembogut inom eeko menggaarak inom, abok aret aap Morekayi paga inagabiti nen it Yakuri mendek inom ogogwaarak me, it ambi nen Yakuri mendek inom wim eeriyak meek aret agagerak.

⁵ It Yakuri mendek nen it aakumi ineebi inombakwi nogo, iniki nen eeppiyoorak mbareegwaarak nogo eeppiinet nogo logonet, wooluwak paga inoorit nogwe, ineebe lek eerogo piigwi, eerit nogogwaarak.

⁶ Eerit nogo logonet, aap endagembogut awi o nggwok abe wurik me o Tutan nogome ineebe lima ratus inoorogo piigwi,

^7-10 aakumi Yakuri inooriyak wone kooneegerak aap Kamerata aput Kaman nogo at apuri Patarata, Ndalopon, Atapata, Porata, Araliya, Arirata, Paramata, Aritayi, Arirayi, Wayitata, ineebe 10 aret inookwi, eereegwaarak kwe, inamindik-inamendek perak, kugun ambi abu woolik aret o.

¹¹ Ne ti eyom paga aap endagembogut awi o nggwok abe wurik o Tutan nogome, “Aap ineebe yogop kuli aret inookaarak o,” yinuk, aap endagembogut mbininogo yori wogo mbareegwa,

¹² aap endagembogut nogo nen kwe nggwok Etet nogo yoge logonet, “Nit ninawi o nggwok abe wurik o Tutan yime it aakumi Yakuri mendek nen ineebe lima ratus inooko logonet, aap Kaman apuri ineebe 10 nogo inom aret inookaarak o. O Tutan yime ineebe lima ratus inookaarak kenok, yi o ndi o an nabu'me piige minggim nogo ti, abunuk inookaarak me, noone yagabok o. Togop me, kat nen, Ndi mendek eeppaniyak, nggino yo'nege keenok, eeppagage, ndi, kiniki uugwe mbake nogo, Wo'niru, yo'nege keenok, wokkege, eerigin me, yu o.”

¹³ Yoge mbareegi, kwe Etet nen yoge logonet, “Nogoba o. Kat aap kendagembogut aret me, wone lengganak yogondak eerit nagaarak nogo ko'lu togop aret eerit nogwe, ndi, at Kaman apuri ineebe 10 inoorak nogo inenggaanok keele yilinogo eyo paga tugumbiigwi, eeriyak op mbake keenok, it aakumi Yakuri mendek o Tutan yime wonogwe nogo yoret o,” yinuk, yoreegerak.

¹⁴ Yoge mbareegi, aap endagembogut Akatiwerot nen Etet yoreegerak nogo ndak-ndak eeruwak nduk, wone lengganogo o Tutan time wumbege mbareegi, aap Kaman apuri ineebe 10 inoorak nogo eyo paga tugunogo piigwi,

¹⁵ ndi, tut Arat penenak tanggal 14 ti paga aakumi Yakuri mendek o Tutan wonogwe nogo ambinom kuwak eeko nogogwaarik, aap ineebe tiga ratus inoorogo piigwi, eereegwaarak kwe, inamindik-inamendek perak, kugun ambi abu woolik aret o.

¹⁶ Ndi, o Tutan time eekwi iigak, it aakumi Yakuri mendek ando yi o ndi o aap endagembogut abu'me piige menggim wonogwe nogo inawi abolok lek eerogo pakwi, inili eerogo pakwi, eeruwok nduk, kuwak eeko nogogwaarik, it aap ineebi inombakwi nogo ineebe tujuh puluh lima ribu aret inoorogo piyareegwaarak kwe, inamindik-inamendek perak, kugun ambi abu woolik aret o.

¹⁷ Ti eereegwaarak nogo ti, tut Arat penenak tanggal 13 paga eeko nogogwaarik, tanggal 14 paga yonggonggologo logonet, inale'nggen nen laago nggwok lakwi,

¹⁸ ndi, it aakumi Yakuri mendek ando o Tutan wonogwe nogo perak, tanggal 13 paga inom, 14 paga inom, kuwak eeppunuk, eeppiinet nogo nogogwaarik, tanggal 15 paga yonggonggologo logonet, inale'nggen nen laago nggwok lakwi, eereegwaarak.

¹⁹ Ti eereegwaarak paga it aakumi Yakuri mendek inawi wonogo menggam lombok wonogo logonet, tut Arat penenak tanggal 14 ari wage kenok, iniki ale'nggen nen laago nggwok lako logonet, inambi tumbut-tumbut eerogo nonggo menggaarak.

Laago endage, Purim, lako logorak koonogo pereegerak wone

^20-22 Eerit wogogwaarak nogo abok aret at Morekayi nen liiru mbanogo pege nagagerik, ti'nuk, it aakumi Yakuri mendek eeko logorak liiru mbangge logonet, “Tut Arat tanggal 14 paga inom, 15 paga inom, nit Yakuri mendek ninawi abolok lek logowak nduk, it ineebi ninombakwi nogo tebenogo piigwi, tut ti paga niniki puru aago wonogwe nogo obaane'me ale'nggen ninikime nggelok ari, ninikime le nggu ari nogo obaane'me niniki ale'nggen age, eekoorak me, tahun ambi eekak tut Arat penenak tanggal 14, 15 ari wage kenok, niniki ale'nggen nen laago lakwi, ninambi tumbut-tumbut nunggwi, ndi, it aap ineenggi lek kenok, ninamendek we wogorogwe, eeko logowok o,” yinuk, it aakumi Yakuri mendek yi o ndi o at endagembogut Akatiwerot abu'me piige menggim koorok wonogwe inom, nda wonogwe inom, abok inake liiru mbanak nogo nappiinet nagagerak.

²³ Mbanogo nappiinet nagagerak nogo it Yakuri mendek nen malenggo nogogwaarik, “Ale'nggen nen laago lakwi warenggoorak nogo mondok-mondok eeko logowok o,” yinuk, yereegwaarak.

Irip paga lambunogo yereegerak wone

²⁴ Aap Agat mendek endage Kamerata aput it Yakuri eebi lombok inombake nagagerak Kaman nogo nen it Yakuri mendek inoorit nage, inenggaawak lek eerogo piige, eeriyak koongge logonet, “Ne ti paga eeriyak,” kin age kaawok nduk, liiru mbanogo punuk, ambi waganggo mengga kwak, it pur eeko nogogwaarak nogo, eeke nagagerik, eenu agagerak kwe,

²⁵ koonogo pereegerak nogo, kwe Etet nen aap endagembogut yori unggwage mbareegi, aap Kaman nen it Yakuri mendek eeppiyoorak maluk lombok koonogo pereegerak nogo, at endagembogut nen melak togon at oba aruwak nduk, wone lengganogo liiru mbanogo wumbege, at apuri inom inenggaanok keele yilinogo tugumbiige, eereegerak.

²⁶ Ndi, “It aakumi Yakuri ne ndi paga eeppiyoorak,” eenu agak endage Pur eereegerak paga eenu agagerak me, ne ti endage Purim aret yogo nogogwaarak. Ndi, wone lengganak liiru mbanogo nappereegerak inom, inigen kogogwaarak inom, aakumi nen it eeppiigwi kogogwaarak inom, nogo paga

²⁷ it Yakuri mendek nen koonggo logonet, “Nit inom, ninapuri-ninombo wologwe inom, it aakumi apit ninom eeko logorak mbakwi inom, nen tahun ambi eekak ne mbere ti, mari eerogo pugun lek, Ne ndi paga ndogop eeko logorak, punogo pereegerak nogo ti, nit ninobaalombok me, eeko logogun aret o,” yinuk, yogwe,

²⁸ ndi, “Purim ari wage kenok, nit Yakuri mendek yi o ndi o inom, yi kota ndi kota inom, wonogwe nogo niniki ale'nggen nen laago lakoorak yi, lek eerogo pugwi, ninapuri-ninombo wologwe nen mari eerogo pugwi, eerugun lek ndak-ndak lombok ndarak logok ne yi aberogo niniki ale'nggen nen laago lakwi, eeko logogun aret o,” yinuk, yereegwaarak.

²⁹ Ne Purim eeko logorak wone liiru mbanogo aa'nduk nappiinet nagagerak nogo, mondok-mondok eeko logowak nduk, aap Abikayin apuluk kwe nggwok Etet nogo inom, aap Yakuri mendek Morekayi inom, nen omaawi eerogo liiru ambinom mbanogo punuk,

^30-31 aap Yakuri mendek Morekayi inom, kwe nggwok Etet inom, “Ne Purim tanggal ndi paga eeko logorak,” liiru mbanogo pugwi, ndi, it Yakuri mendek inalik iniki koonggo logonet, “Nit inom, ninapuri-ninombo wologwe inom, Ne ndi paga ninambe mage negen logonet, leenggu maako logogun o,” yinuk, koonogo pugwi, eereegwaarak nogo paga ne Purim ti, mondok-mondok eeko logowak nduk, it Yakuri mendek aap endagembogut Akatiwerot abu'me piige menggim o seratus dua puluh tujuh nenaarogo pereegim nogome liiru mbanak nogo nappiinet nage logonet, “Kiniki nu'lek tayenak logomunggup nduk, kinake tamban eeke minggirak o,” yinuk, inom liiru mbanogo nappereegerak.

³² Ne Purim eeko logorak wone yugu nogo at Etet nen wone lengganogo liiru mbanogo wumbereegerak paga omaawi age mbareegi, eerit nogo nogogwaarak liiru mbanak wonage nogo, wone ti inom liiru mbanogo pereegwaarak.