Etet 7 - Ala Wone Peenok Peebi Mbanak

Aap Kaman enggaanok keele yilinogo tugumbereegerak wone

^1-2 Wonok nogo mbareegwa, aap endagembogut Kaman imbirak kwe nggwok Etet ne ambinom laago lareegerak nogo nenok, anggur amburu nonggo logonet, aap endagembogut nen kwe Etet nogo yoge, “Etet yi wae. Kat kwe nggwok aret me, kat nen nggino yo'nege keenok wokkege, ndi, yo'niriyak mbake nogo yo'nege keenok an teppatigin lek abok wokkege, eeke logonet, o an unde menggim yi togon mogonogo wokkirigin aret me, yu o.”

^3-4 Yoge mbareegi, at kwe nggwok Etet nogo nen wone yoge logonet, “Nogoba o. Kat kendagembogut aret me, an inom, aakumi an mendek ninom ninooko logonet, ninenggaawak mondok lek eerogo pinaniyak ninoba wonage me, kat nen an kiniki kunik ee'nake, ndi, kat nogoba op aret nombake, eeke keenok, an nili yenok nduk nggino yokkege, ndi, aakumi an mendek kunduk, inagap ndarenok nduk yokkege, eeriyak uugwe mbakirak me, yokkigi o. An inom, aakumi an mendek inom, aakumi inayeloman logowak nduk, kunninabenetak nen, kat yi wone ndi wone koonit nage me, abunuk aaninggin eerogo pagukwak, yokkiriyak lek kwe, nineebe lek eerogo pinaniyak tit kenok, yokkigi o.”

⁵ Yoge mbareegi, aap endagembogut Akatiwerot nen kwe nggwok Etet nogo yoge, “Aap agabiti mbaka'lek iniki teeluk togop eeriyak koonggerak ti ta o? At eebe ngge o?”

⁶ Yoge mbareegi, at Etet nogo nen, “Eebi lombok ninomba'nuk, maluk eeppinaniyak eeke nogo ti, aap maluk abe iyagalo Kaman yi aret o!” Yoge mbareegi, at Kaman nogo ogut nggigik ari nagagerik, aap endagembogut Akatiwerot kwe nggwok Etet imbirak enegen laganogo pegiige mbareegi,

^7-8 aap endagembogut anini nen anggur amburu nengge nogo mbo punuk, mi'nage nagagerik, endekem oore'nggam abe ogobakkigirik me wungge mbareegi, at Kaman nogo nen, “Aap endagembogut yi, an nooriyak nduk aret kooni wungge kagi,” mbake nagagerik, kwe nggwok Etet nogo kwi'nage menggim yonggonggolage wonage me, aap Kaman nogo at eebe ili yuwak nduk, Etet owagam ngginnari nanuk wonage aap endagembogut endekem oore'nggam nen unggwi wage logonet, enegen kage nagagerik, oone nggwok paga, “Nakwe lombok name nimbirak wonage neegak, maluk eeppuurak eeke yi kogop a?” Awo ari kagak, it aap endagembogut ake eeka nogo wogo nogogwaarik, aap Kaman etenggen yum nobappunuk,

⁹ at endagembogut ake eeka inooli wogo ambi endage Karobona nen at endagembogut yoge logonet, “Aap kat kagap ndareegerak Morekayi nogo enggaanok keele yilinogo puurak nduk at Kaman nen eyo nggorek metet 23 awoore'nggam yinogo pegerak wonage o.” Yoge mbareegi, at endagembogut nen, “Eyo ti paga aret Kaman enggaanok keele yilinogo pi nanip o.”

¹⁰ Yoge mbareegi, at Kaman nen eyo aap Morekayi tugunogo puurak nduk yineegerak nogo paga Kaman aret enggaanok keele yilinogo tugumbi nogo mbareegwa, aap endagembogut anini mbake nogo teyok yereegerak.