Etet 6 - Ala Wone Peenok Peebi Mbanak

Aap endagembogut nen Morekayi tiyappereegerak wone

¹ At aap endagembogut nogo oonikiya ti eyom paga nogo yuurak abu meek eeke mbareegi, at abu'me piinok wonage logonet, eerit nage nagagerak mbuku paga liiru mbanak wonage nogo at enggaanom paga lunuwak nduk, “Wonok woraanip o.” Yorage mbareegi,

² liiru mbanak nogo wonok wa'nuk, lunggo logonet, it aap endagembogut arungga paga tum wako menggaarak Mbigatan Teret imbirak nen aap endagembogut Akatiwerot wariyak wone mbaneegwaarak nogo, at Morekayi nen kurumbi yori wagagerak liiru mbanak wonage nogo kogogwaarak.

³ Kogo nogogwaarik, aap endagembogut nen ayeloman nogo yorage logonet, “At aap Morekayi wone ti yereegerak paga ayuk wukwi, endage tiyappugwi, eereegwaarak ilik, lek a?” Yorage mbareegi, at inom ake eeka nogo nen at yogo logonet, “Ambi eeppuulik aret o, ninogoba,” yoreegwaarak.

⁴ Ti eyom paga at Kaman nen aap Morekayi enggaanok keele yilinogo eyo paga tugumbuurak aap endagembogut yorikit nduk, wagagerak at awoore'nggam wonage aap endagembogut nogo nen kage nagagerik, “Aap nawoore'nggam unggwi wagaarak wonage ti ta o?”

⁵ Yorage mbareegi, at ake eeka nogo nen at yogo logonet, “Aap kawoore'nggam wagaarak wonage ti, Kaman aret.” Yogo mbareegwa, aap endagembogut nogo nen, “Unggwi woraawak nduk yo'nip o,” yoragagerak.

⁶ At Kaman nogo aap endagembogut wonage me unggwi wage mbareegi, aap endagembogut nen at yoge logonet, “Aap endagembogut nen aap ambi inikilom mba'nuk tiyappuurak mbake kenok, at nonggop eeppuurak mbaken?” Yoge mbareegi, at Kaman nen iniki mbake logonet, “Aap endagembogut tiyappuurak mbake nogo ti, alik ambi wonage lek an aret kagi,” mbake nagagerik, aap endagembogut nogo yoge,

⁷ “Kat nogoba kendagembogut nen aap ambi kinikilom mba'nuk, tiyappuurak mbake nogo ti,

⁸ aap inendagembogut inayum yiriko menggaarak kat yike menggendak nogo wagangge, ndi, kat kwi'na'nuk nege menggendak nggare-nggare mendaarak anobak paga yirik kuda nogo wonok wage, eeke logomenggendik,

⁹ yum nogo inom, kuda nogo inom, it kawuri inendage warak nagawan-nagawan inowe ambi wogoge keenok, at nogo nen aap kat tiyappuurak kinikilom mbake nogo, yum nogo yirippege, kuda nogo amborowak paga kwippege, eeppunuk, o kota oolo tinime wonok nege logonet, Aap endagembogut nen aap ambi tiyappuurak inikilom mbake kenok, yogop aret eeppege menggerak o, yinuk, aa'nduk a'nuk, oone nggwok paga agan nawak o,” yinuk, yoreegerak.

¹⁰ Yoge mbareegi, aap endagembogut nen Kaman yoge logonet, “An nayum yike minggirak inom, naguda inom, mbet-mbet wagangge logomenggendik, aap Yakuri mendek nawoore'nggam tu unggwogo menggam wonage Morekayi nogo, kat yagandak ndak-ndak aret eeppi nak o. Ndi, eeppi nage logonet, wone kat yagandak nogo ambiriluk ambi teppuurak lek tigitogon aret eeru o,” yinuk, yoreegerak.

¹¹ Yoge mbareegi, at Kaman nen yum nogo wagangge, kuda nogo wagangge, eeke nagagerik, wonok yum nogo aap Morekayi yippege nagagerik, aap endagembogut aguda paga kwippunuk, wonok o kota oolo tinime nogome nage logonet, “Aap endagembogut nen aap tiyappuurak inikilom mbake kenok, yogobi eeppege menggerak o,” yinuk, oone nggwok paga agan nagagerak.

¹² Nage nagagerik, at Morekayi nogo iyokan aap endagembogut oore'nggam tu unggwogo menggam ari wage kagak, at Kaman nogo enete nobakko'nok enggali mbakak mbet-mbet aret ame nagagerak.

¹³ Nage nagagerik, at eeriyak oba agagerak nogo akwe Tereti inom, oreewi inom, mbininogo yoragagerak. Yorage mbareegi, at inom wone koongga nogo inom, akwe Tereti inom, nen Kaman yogo logonet, “At Morekayi tiyappege kagak, kat tebek ari nogo ti, at aap Yakuri mendek aret me, tebenogo puurak nduk eeke keegak, kat panggombagayak ambi lek me, tebenogo patumunggun aret o,” yinuk, yoreegwaarak.

¹⁴ Ndi, wone nogo awo yogwi me, it aap endagembogut ake eeka inooli wogo nogo, wogo nogogwaarik, aap Kaman nogo kwe Etet laago lareegim mbet-mbet aret wonok nogogwaarak.