Etet 5 - Ala Wone Peenok Peebi Mbanak

Kwe Etet nen aap endagembogut Kaman imbirak laago larak noorak wiiragagerak wone

¹ Nogo mbere yippunuk, ko'lu at aap endagembogut nogo at wone lengganogo yorage menggim kwi'na'nuk, tu unggwogo menggam ena looge wonage me, Etet nogo kumi yo'nggok inayum yiko menggaarak mendek yippunuk, aap endagembogut awi wurik akem ko kole wone mbanggo menggam at wonage engga loolo ari nage mbareegi,

² aap endagembogut nogo nen at akwe kwe nggwok Etet ko kole ogoorak nogome mi'ndak wonage enegen kage nagagerik, abuwa nen owaanggun mbuti emas paga ogobakkigirik eenggime wonage nogo Etet titik ege mbareegi, at Etet nen owagam wage nagagerik, waanggun abo nogo eenggi mbaanggagagerak.

³ Mbaanggage mbareegi, aap endagembogut nen, kwe Etet nogo yoge, “Etet yi wae. Kat kwe nggwok aret me, nano uugwe mba'nuk wagan o? Kat uugwe mba'nuk wagandak nogo yo'nege keenok, an teppatigin lek abok wokkege logonet, o an unde minggim yi togon mogonogo wokkirigin aret me, yo'niru o.”

⁴ Yoge mbareegi, kwe Etet nogo nen wone onggo yoge logonet, “Nogoba o. An nen kat kake laago lake me, yogondak aap Kaman kimbirak na noorak op mbake keenok, na namunggup o,” yo'nuk, nagagerak.

⁵ Nage mbareegi, aap endagembogut nen, “Kwe Etet nen ninayonggo pegerak me, aap Kaman woraawak nduk, mbet yori nanip o.” Yoragagerak yori nogogwaarak wage mbareegi, aap endagembogut imbirak at Etet laago pipuk eereegim nogome nogogwaarak.

⁶ Nogo nogogwaarik, anggur amburu nonggo logonet, aap endagembogut nen kwe Etet nogo ne ambinom yoge logonet, “Kat nggino yo'nege keenok wokkege, ndi, yo'niriyak mbake nogo yo'nege keenok, an teppatigin lek abok wokkege, eeke logonet, o an unde minggim yi togon mogonogo wokkirigin aret me, yogondak yu o,” yinuk, yoreegerak.

⁷ Yoge mbareegi, at Etet nen wone onggo at yoge logonet, “An uugwe mbake inom, nggino yokkiriyak mbake inom, yi aret me, yokkiri o.

⁸ Kat nogoba kendagembogut nabuwa mbake, ndi, an uugwe mbake inom, nggino yokkiriyak mbake inom, ndak-ndak eeppikit nombake, eeke keenok, ko'lu kinake laago ambinom larigin me, kat Kaman kimbirak na woraamunggup o. Na wogwe kiinok, Wone yu o, yo'negendak nogo ti, yokkirigin o,” yinuk, yoreegerak.

At Kaman nen Morekayi wariyak iniki kooneegerak wone

⁹ At Kaman nogo kwe Etet laago lareegerak neenok iniki ale'nggen alik negen eereegerak wundi wage logonet, at Morekayi nogo aap endagembogut awi o nggwok abe wurik arungga paga kwi'ndak wonage kage nagagerik, “Mi'na'nuk, nayuk wurigin,” mbareegerak mendek agabiti mbake, ayuk wuke, eeka'lek aret mbareegi, at Morekayi eebe paga anini alik negen agagerak.

¹⁰ Anini alik negen agagerak kagak iniki yanggo yinuk, ame nage nagagerik, at oreewi inom, akwe Tereti inom, woraawak nduk wiiragagerak wogo mbareegwa,

¹¹ iniki wogoppake logonet, eenggi warak lombok age, apuri aa'mbin-aa'mban ndaganake, aap endagembogut nen ale'nggen oba pege, it aap nagawan-nagawan inom, it aap yi o ndi o unde menggaarak inom, iigak, aap endagembogut imbirak eeke logowak nduk tiyappege, eereegerak nogo paga tiyappake logonet yorage,

¹² “Nogo ti mban lek o. Ata, aap endagembogut akwe kwe nggwok Etet nen laago lakerak nawok nduk, aap endagembogut nimbirak mban ninayonggo pinanggerak o. Ndi, ko'lu kunduk, ambinom nawok nduk, aap inalik ambi wiiroolik. Ata, aap endagembogut nimbirak mban wiiniragaarak.

¹³ Yi mendek ndi mendek eeppanugwi yi paga nale'nggen kaakit lak, at aap Yakuri mendek Morekayi nogo aap endagembogut awi wurik tungga paga mban wonage nenegen kage me, nale'nggen lek aret ee'nake o.”

¹⁴ Yorage mbareegi, at akwe Tereti inom, oreewi abok aret inom, nen konenggo nogogwaarik, at yogwi, “Ti kenok, it aap inenggaanok keele yilinogo tugumbiigo logorak eyo nggorek metet 23 kero yinu o. Yingge logomenggendik, eyo ti paga aap Morekayi enggaanok keele yilinogo tugunogo wuppi woraawak nduk, ko'lu kuuben aap endagembogut yori namenggendak eeke kenok, kiniki ale'nggen paga aap endagembogut kimbirak mbi na namunggup o,” yoreegwaarak. Yoreegwaarak nogo at Kaman nen, “Op aret kagi,” mbake nagagerik, eyo yinuwak nduk, awuri yoragagerak.