Etet 3 - Ala Wone Peenok Peebi Mbanak

At Kaman nen it Yakuri mendek lek eerogo piyoorak kooneegerak wone

¹ Ti'nuk peebi, aap endagembogut Akatiwerot nogo nen aap ambi anebunu Agak mendek Kamerata aput Kaman nogo it aap inendage warak nagawan-nagawan ando inendage tiyanak negen iigak kwe, at endage abu tiyanak lombok logowak nduk, abu'me logonet, imbirak eeke logowak nen ale'nggen oba pege nagagerik, mippereegerak.

² Mippege nagagerik, at ake eeko menggaarak awi o nggwok abe wurik me tu unggwogo menggam wonogwe nogo yorage logonet, “Aap Kaman unggwi wage, wundi nage, eeke kenok, kinendobanggun yindumbunuk, ayuk wuko logonip o,” yinuk, yorage mbareegi, it abok togop aret eeko nogogwaarak kwe, at Morekayi alik perak, endobanggun yindumbunuk, ayuk wuke logolik aret.

³ Ayuk wuka'lek mbareegi, it aap endagembogut ake eeko menggaarak at awi o nggwok abe wurik tu unggwogo menggam wonogwe nogo nen at Morekayi nogo yogwi, “Kat nonggop nduk aap endagembogut nen wone yegerak taganogo pege agandik?” yinuk,

⁴ wone ko'lu-kii'me togop mban yogwi iigak kwe, at Morekayi nen, “An aap Yakuri mendek aret o,” yinuk, ayuk wuka'lek mbareegi, “At Kaman nen Morekayi nonggop eeppege kaamun?” yinuk, Kaman yoreegwaarak.

⁵ “At aap Morekayi nogo endobanggun yindumbunuk kat kayuk wuka'lek aret agaarik o,” yogo mbareegwa, at Kaman nen, “Ti abet aret kagi,” mbake nagagerik, anini mondok alik negen age,

⁶ ndi, at Morekayi nogo, aap Yakuri mendek aret eenu age, eeke nagagerik, at alik mban eebe warogo puurak meek mba'nuk, at owe-awot it aakumi Yakuri aap endagembogut Akatiwerot abu'me wonogwe nogo abok aret, “Inenggaawak lek eerogo piyaakit,” mbareegerak.

⁷ Mbake mbareegi, aap Akatiwerot nogo endagembogut wonage kagak, tahun 11 eeppunuk, ambi eerak tut aa'nduk Nitan penenak paga at Kaman nen maluk eeginaburak kooneegerak nogo tut inom, tanggal inom, kin age yelok kaawak nduk, liiru mbanogo punuk, waganggo mengga kwak, it pur eeko menggaarak nogo eeko logonet, at Kaman enggaanom paga tut 12 endage Arat penenak ti paga eeriyak mbanak nogo aret waganeegwaarak.

⁸ Waganggo mbareegwa, at Kaman nen aap endagembogut Akatiwerot nogo yoge logonet, “Nogoba wae. Yi o ndi o kat kabu'me piige menggenom yi aakumi ndi aakumi ninenggela'me aakumi alik mendek mak eerak wonogwe nogo nen, it yi aakumi ndi aakumi eeko mengga kwak eekwi lek it inandogon alik aret eeko logonet, kat wone lengganogo wumbege nogo liirogon eekwi lek me, teppiyaamunggun kenok, kendage maluk eerogo pagagun o.

⁹ Togop me, it aakumi ti, lek eerogo piyoorak wone lengganogo wumbuurak op mbake keenok, it aap wone lengganogo wumbemenggendak eerit nogwe onggo an nen wu mbuti perak aaninggin tiga ratus empat puluh lima ribu kat kawu kuwak eerak pege menggenom nogome mambigin o,” yinuk, yoreegerak.

¹⁰ Yoge mbareegi, aap endagembogut nogo nen mberaarenggen paga amburu cap eekak eenggi oolo yirik wonage nogo nggoorogo, aap Agak mendek Kamerata aput it Yakuri eebi inombake Kaman nogo wogoreegerak.

¹¹ Wogoge logonet, at Kaman yoge, “It aakumi ti, eeppiyoorak op mbakendak nogo kobaalombok eeppiige logonok nduk, ineebe inom, wu ti inom, wokkigi o,” yinuk, yoreegerak.

^12-14 Ti'nuk, tut aa'nduk penenak tanggal 13 ari wage paga at Kaman nen it aap endagembogut ake liiru mbangga nogo wiiragagerak wogo mbareegwa, it yorage logonet, “Tut 12 Arat penenak tanggal 13 paga it aakumi Yakuri mendek aap inanggok inom, tawe inom, kumi inom, wologwe-komologwe inom, abok aret ne ambit ti paga ambugwi aret inoorit nogo logonet, inenggaawak mondok lek eerogo piinok, inamindik-inamendek kugun waganggo logonip o. Ndi, ne eeriyak yogoorak ti paga yi aakumi ndi aakumi abok aret eeriyak pipuk aago logowak nduk, wone eeriyak lengganak yi aret o, yinuk, at endagembogut abu'me piige menggim yi o ndi o abok aret mippit nogo logonip o, yinuk, liiru mbaninip o.” Yorage mbareegi, yoragagerak nogo ndak-ndak, it aakumi inanebunu lombok yi o ndi o wonogwe nogo it inoone paga lombok liiru mbanggo mengga kwak, liiru mbanogo pogo nogogwaarik, “Aap endagembogut Akatiwerot nen aret yegerak,” mbaruwak nduk, at amberaarenggen nogo paga amburu cap eerogo punuk, aap endagembogut awuri at abu'me menggaarak inom, at awuri yi o ndi o unde menggaarak inom, yi aakumi ndi aakumi inoweewi nagawan-nagawan inom, aap endagembogut abu'me piige menggim yi o ndi o abok aret nappiinet nawak nduk, mbanogo pereegwaarak.

¹⁵ Mbanogo pogo mbareegwa, it aap wone lengganak liiru mbanak wonok nawak nduk, yoragagerak nogo nen, “Aap endagembogut nen nappinani waga o,” yinuk, mbet-mbet yi o ndi o tumburiranet nogwe, ndi, aap endagembogut awi o nggwok abe wurik o Tutan nogome yorogwe, eerit nogwe iigak, aap endagembogut Kaman imbirak kwi'na'nuk, anggur amburu nunggwi ugun iigak kwe, it aakumi o kota Tutan wonogwe nogo perak, wone ti konembunuk, iniki ma'nagagerak.