Etet 1 - Ala Wone Peenok Peebi Mbanak

ETET WONE

Aap endagembogut akwe Wati nen ogonggelo yoreegerak nogo taganeegerak wone

¹ Aap endagembogut Akatiwerot nogo o Indiya nen nok, Etiyopiya kuli o nggwok 127 nenaarogo pit nagagerak unde logonet, wone lengganogo yorage kagak, wone agagerak nogo yi aret.

² Aap endagembogut Akatiwerot nogo at abu'me piinok wone lengganogo yorage menggim awi o nggwok abe wurik o Tutan wonage logonet, wone lengganogo yorage nagagerak.

³ Wone lengganogo yorage kagak, tahun mbere eeppunuk, ambi age paga it o Peritiya o Meriya mendek ineegin warak inoweewi inom, it aap inendage warak nagawan-nagawan inom, at abu'me o unde menggaarak inom, inake laago nggwok lake me, ne ti eyom paga kuwak eeri wogogwaarak.

⁴ Kuwak ari wogo mbareegwa, inabugo lake logonet, at abu'me menggim yi mendek ndi mendek mondok iya ineenggi lingginiyak meek kuwak eerak nogo titik irage, ndi, at endage mondok nggwok kenok aakumi nen, Wi, ugwi iigak, alik negen eeke nagagerak nogo mbininirage, eeke kagak, tut 6 peneneegerak.

⁵ Ti abu aret eeppunuk, aap Akatiwerot nen it aakumi at awi o nggwok abe wurik o Tutan wonogwe inendage warak inendage lek abok aret inake nen, at awoore'nggam abe ogobakkigirik me nogome laago lake tit kagak, nogo 7 kuli aret yereegerak.

⁶ Aap endagembogut awoore'nggam obaanggi-obaangge eerak wonagagerak ti, yum yawenak amuni mbanak yanggwi negen inom, yum kibu-kibu inom, nogo poorogo keele yum yawenak amuni mbanak maa'ngga kunik nogo paga, yugum muuni paga owak mippugu irip mbuti perak paga, tenggen yarogo nggelenak nogo paga nggelembunuk, tugunogo wurabak wonage, ndi, yugum muuni mendek etenggen mili inom, meeli inom, maa'ngga kunik inom, yugum onggo nggwok alik mendek inom, nogo paga ndik yabenggek-ndabenggek ndoonak me, mbuti emas-perak paga kwi'nagak abu abe ogobakkigirik nogo ndoonak nogo paga kwippugu wonage, eerak wonagagerak.

⁷ Ndi, anggur amburu nogo ti, togolowak mbuti emas paga ogobakkigirik enete alik-alik nogo paga it aap inendagembogut iniki ndoobu paga tumburirogo mengga kwak anggur amburu eno korok togon mban toologo pit nogwe,

⁸ ndi, anggur amburu noorak nogo ti, aap endagembogut nogo nen at ayeloman mini amburu toorirogwe unde nogo yorage logonet, “Iniki uugwe mbakwi ndak-ndak mban nonggo logowak o,” yinuk, yoragagerak me, ndak-ndak aret wogoragaatak nunggwi, eeko nogogwaarak.

⁹ Ne ti eekwi eyom paga mban aap endagembogut akwe Wati nogo nen it kumi at ogonggelo endagembogut Akatiwerot awi o nggwok abe wurik me wonogwe nogo inake togop aret laago lareegerak.

^10-11 Lakugak nogo 6 yippunuk, ko'lu ari wage mbareegi, aap endagembogut Akatiwerot nogo amburu toolak nengge nagagerik, iniki ale'nggen mbake logonet, at akwe kwe nggwok Wati nogo abu kigirikwe lombok me, aakumi abok inom, aap nagawan-nagawan inom, etenggen kigirikwe inigen kaawak nen aap endagembogut inakuwi nggare-nggare yiriko menggaarak at kwe Wati yirik kagak wonok woraawak nduk, aap at ake eeko menggaarak inooli wogo ineebe 7 Mekuman, Mbitata, Karobona, Mbigata, Abagata, Tetat, Karakat nogo yoragagerak.

¹² Yorage mbareegi, it nogo nen aap endagembogut yereegerak nogo kwe Wati yori nogogwaarak kwe, woroorak eebi mbake mbareegi, at endagembogut iniki aagi mi'nage nagagerik, anini ambik agagerak.

^13-14 Anini ambik age nagagerik, it aap inendagembogut nen eeko logorak wone yugu inom, wone lengganak inom, aap ineenu kenok yorogo menggaarak me, at Akatiwerot nen it aap o Peritiya, o Meriya mendek at abu'me menggaarak inendage warak iniki kunik inom wone mbangga Karetena, Tetat, Aramata, Taritit, Meret, Maretena, Memukan ineebe 7 nogo eeko logorak wone ineenu me, yorage logonet,

¹⁵ “Kwe nggwok Wati ti, woraawak nduk, it aap nake eeko menggaarak nen yori nawak nduk, yonggo nappiigirak kwe, woroorak eebi mbakerak me, wone eeko logorak yugu nogo paga eeppuurak an yo'ninip o,” yinuk, yoragagerak.

¹⁶ Yorage mbareegi, at aap Memukan nen aap endagembogut inom, it aap inendage warak nagawan-nagawan inom, abok inenggaanom paga at endagembogut yoge logonet, “Kwe nggwok Wati ti, kat ninowe kendagembogut mban maluk eerogo pagage ti lek o. Ata, nit nagawan-nagawan inom, ndi, kat nowe kendagembogut wone lengganogo yorage menggenom yi aakumi ndi aakumi inanebunu lombok wonogwe nogo inom, abok aret maluk eerogo pinanege agaarik o.

¹⁷ Kwe nggwok eraambe maluk nen yegerak ti, it kumi abok aret inaruk konenggo logomenggaarik, inogonggelomini meek inomba'nuk yorogo logonet, Aap endagembogut Akatiwerot nen akwe kwe nggwok Wati wonok woroorak yoragagerak kwe, woroorak eebi mbareegerak nogo tit ari a, yinuk, yugun nogo lek a?

¹⁸ Nit aap o Peritiya o Meriya mendek nagawan-nagawan ninakuwi kat kendagembogut kakwe kwe nggwok yegerak inaruk konenemenggaarak nogo nen, nit kawuri nagawan-nagawan ndak-ndak yo'nirogo logogun me, inogonggelomini nit nogo meek eerogo pinanugwi, inoone andiigwi yo'nirogwe, eeko logogun o.

¹⁹ Togop eerit nogo logokwak me, kat ninogoba kendagembogut nen, O yogondak kuli kwe Wati ti, an nendagembogut Akatiwerot nowagam woroorak mondok lek o, yinuk, wone lengganogo pege, it aap Peritiya inoweewi inendagembogut inom, it aap Meriya inoweewi inendagembogut inom, nen, eeko logorak wone lengganogo yorogo menggaarak liiru mbanak lek eerogo puurak meek nogo, inom mbanogo pege, ndi, kakwe kwe nggwok endage tiyanak menggim obaane'me kwe alik eraambe abe mendek kero mippege, eeriyak op aret mbake keenok, eeru o.

²⁰ Ti eeke keenok, yi o ndi o unde menggendak nggwok lombok nogome wone lengganogo wumbemenggendak nogo, it kumi abok aret konenggo logomenggaarik, inendage lek inendage warak abok aret inogonggelomini inayuk wuko logogun o,” yinuk, yoreegerak.

²¹ At aap Memukan nen wone yereegerak nogo aap endagembogut inom, at awuri nagawan-nagawan inom, nen “Op aret yegerak,” mbako mbareegwa, at endagembogut nen wone yereegerak nogo ndak-ndak aret eeke logonet,

²² “Aap ambi akwe apuri wonage kenok, inarum logorak at aret me, oone konenggo logowak o,” yinuk, at abu'me piige menggim yi o ndi o inoone alitik-alitak wonogwe me, it inoone paga lombok liiru mbanogo nappit nagagerak.