Etara 8 - Ala Wone Peenok Peebi Mbanak

Iterali ndarak ndegek aap Etara inom wogogwaarak inendage mbanak wone

¹ At aap Aratakata nogo inowe endagembogut wonage kagak, it aap Iterali ndarak ndegek lombok inawuri inom o Mbaben nen an ninom o Yerutalem niniyokan wogogurak nogo inendage liiru mbanak yi aret o.

² At Pinekat paga wiganak ti, Nggeroton, At Itamat paga wiganak ti, Ndaniyen, At Ndawut anebunu mendek

³ aap Tekaniya paga wiganak ti, Katut, aret me, it nogo ti, an ninom wogwe, At Parot paga wiganak ti, Takariya aap nda'nogogwaarak inendage liiru mbanak aap mban ineebe seratus lima puluh inom a'nuk ninom wogwe,

⁴ Aap Pakat-Mowap paga wiganak Terakiya aput Eliyowenayi aap mban dua ratus inom a'nuk ninom wogwe,

⁵ Aap Tatu paga wiganak Yakatiyen aput Tekaniya aap mban tiga ratus inom a'nuk ninom wogwe,

⁶ Aap Arin paga wiganak Yonatan aput Ebet aap mban 50 inom a'nuk ninom wogwe,

⁷ Aap Elam paga wiganak Ataliya aput Yetaya aap mban 70 inom a'nuk ninom wogwe,

⁸ Aap Tepata paga wiganak Mikayen aput Tebaya aap mban 80 inom a'nuk ninom wogwe,

⁹ Aap Yowap paga wiganak Yekiyen aput Obaya aap mban dua ratus delapan belas inom a'nuk ninom wogwe,

¹⁰ Aap Mbani paga wiganak Yotipiya aput Telomit aap mban seratus enam puluh inom a'nuk ninom wogwe,

¹¹ Aap Mbebayi paga wiganak Mbebayi aput Takariya aap mban 28 inom a'nuk ninom wogwe,

¹² Aap Atagat paga wiganak Akatan aput Yokanan aap mban seratus sepuluh inom a'nuk ninom wogwe,

¹³ Aap Aronikam paga wiganak Elipelet, Yekiyen, Temaya, aap mban 60 inom a'nuk, age yobok togon peebi wogwe,

¹⁴ Aap Mbigawayi paga wiganak Utayi Tabut imbirak aap mban 70 inom a'nuk ninom wogwe, eereegurak nogo ti aret.

Aap Etara nen aakumi Lewi mendek kwaarinabeegerak wone

¹⁵ It aap ti abok aret niyo mbininik o kota Akawa nage aa'nggi paga time kuwak eeppiige nagagirik, ninawooliya wuppatinuk wonogwe niigak, nogo kenagan yereegurak. Wonogo logonet, an Etara nen it aakumi maloppiige nagagirik, it aap Iterali inom, aap Ala unde inom, ninom wonogwe kwe, it Lewi mendek ambiriluk ambi ninom wonogwe lek aret iyareegirak.

¹⁶ Iige nagagirik, it aap ndarak ndegek inarum menggaarak aap Eliyetet inom, Ariyen inom, Temaya inom, Elanatan inom, Yarip inom, Elanatan inom, Natan inom, Takariya inom, Metulam inom, it aap wone mamuniraga mendek Yoyarip Elanatan imbirak inom, wiiragagirak.

¹⁷ Wiiragagirak wogo mbareegwa, it nen aap o Katipiya inarum menggerak inowe Iro wonage me yori nawak nduk, nappiige logonet, at Iro inom, awuri o Katipiya alut eeko menggam yabu eeko menggaarak inom, nen nit ninogoba Ala awi wurik me alut eekwi niigak, ninake eeko logorak inawuri ambi nappiya woraawak nduk, “Ndogop yori nanu o,” yinuk, nappiyareegirak.

¹⁸ Nappiyareegirak yori nogo mbareegwa, at ninogoba Ala ninabuwa nen eenggi nggorek paga nobappinanogo wonage me, aap Iro awuri inom nen aap Iterali ombooluk Lewi aput Makili paga wiganak mendek ninake eeriyak obam lombok Terebiya inom, awuri-apuri ineebe 18 inom,

¹⁹ aap Merari paga wiganak aap Katabiya Yetaya imbirak inoreewi-inapuri ineebe lambunik 20 inom,

²⁰ ndi, it aap Ala awi wurik me yabu eeko menggaarak mendek at Ndawut inom eeko nogogwaarak nogo nen it Lewi mendek yeenggwaarogo logowak nduk, leenogo piyareegwaarak inendage mbanak ineebe dua ratus dua puluh nogo inom, leenogo piigo mbareegwa, wogoren wogogwaarak.

Mbi nengga'lek inambe mage negen logonet, tamban eeko nogogwaarak wone

²¹ Wogo mbareegwa, niyo Akawa mbininik aa'nggi paga time logonet, ninogoba Ala enggaanom paga niniki tebeppatinuk, nit inom, ninapuri inom, ninamindik-ninamendek inom, abok aret at Ala nen, Tu obeelom ndegenniren woraawak nduk, mbi nengga'lek ninambe mage negen logonet, Ala nggino yoruwok o, yinuk, yoragagirak.

²² Nit nen aap endagembogut wone yogo logonet, It aakumi ambi nen, Ala ninarum logogin o, yinuk, yogwi iinok, ninogoba Ala eenggi nggorek paga nobappiige menggerak kwe, it aakumi nen at Ala mbo pugwi iinok perak, at anini ambik inoba piige menggerak o, yinuk, yoreegurak me, nit tu paga nogwe me, ninawim nen ninookwi iyo, aap ineegin warak inom, it aap kuda paga kwi'na'nuk nugu menggaarak inom, yoroorak nenggali nen

²³ nit mbi nengga'lek ninambe mage negen logonet, ninogoba Ala mban nggino yoreegurak nogo aruk koneneegerak.

Ala awi wuriyak ake kuwak eerak wonok nawak nduk, wogoragagerak wone

²⁴ Ti'nuk, an nen it aap Ala unde inengga warak Terebiya, Katabiya imbirak inoreewi ineebe 10 inom leenogo piyareegirak. Ineebe lambunik 12 ti, leenogo piige nagagirik,

²⁵ aap endagembogut inom, at inom wone koongga inom, inom eeko menggaarak inendage warak inom, it Iterali mendek time wonogwe nogo abok inom, nen ninogoba Ala awi wurik me logorak ake mbuti perak-emas inom, yi mendek ndi mendek alik inom, leenogo pereegwaarak nogo it 12 leenak nogo wonok noorak wogoraakit nduk, aaninggin wakkage logonet,

²⁶ wu mbuti perak aaninggin dua puluh dua ribu age, yi mendek ndi mendek mbuti perak paga ogobakkigirik aaninggin tiga ribu empat ratus age, mbuti emas aaninggin tiga ribu empat ratus age, eeke mbareegi, wogorage,

²⁷ niyo kilirogo pit nagak togolowak mbuti emas paga ogobakkigirik wu paga kunggwi kenok aaninggin 8 eeppunuk, ambi oolo ari nage nogo mendek wogorage, ndi, togolowak mbere mbuti emas ndak-ndak abu kigirikwe mbuti tembaga abu abe abinak pigan-pigan eeke ogobakkigirik nogo mendek wogorage, eereegirak.

²⁸ Eeke nagagirik, it yorage logonet, “Kit kineebe inom, yi mendek ndi mendek ogobakkigirik yi inom, Aliku ALA ake leenak aret o. Ndi, mbuti emas-perak yi, aakumi iniki nen onggo lek we aret at kinombomini inogoba Aliku Ala ake pegaarak me,

²⁹ kit nen liirogon aret ndegenit wonok o Yerutalem pi nogo logomonggotik, it aap Ala unde inengga warak inom, it Lewi mendek inom, Iterali ndarak lenok inarum menggaarak inoweewi inom, inigen iigak, aaninggin wakkanok, Aliku ALA awi wurik me pi ungguurak kuli aret ari nawak o.”

³⁰ Yorage nagagirik, aap Ala unde inom, aakumi Lewi mendek inom, nen mbuti perak-emas inom, yi mendek ndi mendek ogobakkigirik inom, ninogoba Ala awi wurik me o Yerutalem logowak nduk, aaninggin wakkaanuk, wogoragagirak nogo waganeegwaarak.

O Yerutalem wogogwaarak wone

³¹ Waganggo mbareegwa, nit abok aret o Yerutalem woraawok nduk, tut aa'nduk penenak tanggal 12 paga niyo Akawa mbininik aa'nggi paga nen wundi wogogurak. Wundi woraanuk, tu paga wogwe me, ninawim nen ninookwi, aap inogogun ambik nen ninamendek ndinggwi, eekwi iyo, ninogoba Ala eenggi nggorek paga nobappinanogo kagak kuuri'me aret

³² o Yerutalem unggwi wogogurak. Unggwi wogo nogogurik, tat yonggonggologwe niigak, nogo kenagan yereegurak.

³³ Ndi, nogo kenagan yippunuk, ko'lu ninogoba Ala awi wurik me yime nit nen mbuti perak-emas inom, yi mendek ndi mendek nogo inom, abok aret aaninggin ambinom wakkogo nogogurik, aap Uriya aput Ala unde Meremot eege, aap Pinekat aput Eleyatat eege, it Lewi mendek aap Yetuwa aput Yotabat eege, aap Mbinuwi aput Nowaya eege, ineenggime piyareegurak.

³⁴ Piigo mbareegu, yi mendek ndi mendek endage mbanak inom, aaninggin wakkagak aago liiru mbanak inom, “Abu ndak-ndak aret kogo o,” yinuk, inambuku paga liiru mbanogo pereegwaarak.

³⁵ Ti eeko nogogurik, nit wo'niren pinani nagagerak niniyokan wogogurak nogo nen Iterali ninogoba Ala ake warogo kani kunggo logonet, nit Iterali abok ninake tapi ngguunok 12 wakwi, kambin-ndomba ngguunok 96 wakwi, ndomba aagalogwe ngguunok 77 wakwi, ndi, ninomaluk lek eerogo pinanuwak nduk, kambin ngguunok 12 wakwi, eerogo punuk, ti abok aret Aliku ALA ake kani kuneegurak.

³⁶ Ti eeko nogogurik, aap endagembogut nen wone lengganogo yoragagerak liiru mbanak nogo, it aap endagembogut abu'me menggaarak inom, it niyo Eparat oonegen kilu yi nage menggim pa'nggwe yibagan yi o ndi o unde menggaarak inom, iranet nogo mbareegu, it nen nit yeenggwa nirogwe, ndi, Ala awi wurik me logorak ake pugwi, eereegwaarak.