Etara 5 - Ala Wone Peenok Peebi Mbanak

Ala awi kak kunik pereegwaarak nogo Ndariyut nen wuruwak nduk yoragagerak wone

¹ Togop aret wonogogwaarak me, ne ti eyom paga it Yakuri mendek o Yekura inom, o kota Yerutalem inom, wonogwe yeenggwaarage menggerak Iterali inogoba Ala nen aap Ala wone yoraga Agayi inom, aap Iro paga wiganak ambi Takariya inom, wone yorage kagak, “Ala ndogop yigi o,” yinuk, yorogo nogogwaarak.

² Wone yorogo nogogwaarak nogo paga aap Teyalitiyen aput Terubaben inom, Yotarak aput Yetuwa inom, “Ala awi obaane'me wuruwok aret o,” yinuk, wukwi iigak, it aap Ala wone yoraga nogo nen yeenggwaarogo nogogwaarak.

³ Ne ti eyom paga aap o niyo Eparat oonegen kilu yi nage menggim pa'nggwe o unde menggerak Ta'nayi inom, aap Tiyetat-Mbotanayi inom, inoreewi ando inom, o Yerutalem wogo nogogwaarik, it Ala awi wukwi nogo yorogo logonet, “Ta nen wone lengganogo yokkiragaarak paga o alut eeko menggam yi, obaane'me wukwi, owa'nagat wurogo pugwi, eeko ogotik?”

⁴ Yorogo nogogwaarik, “Ndi, it aap Ala awi wukwi yi, inendage taani o?”

⁵ Yorogo nogogwaarik, it Yakuri mendek inoweewi Ala enegen wogonake nagagerak me, Wone yi, at Ndariyut konengge logomenggerik, Nonggop eeko logorak nogo, liiru mbanogo nappi waga'lek kagak, Wuriyak mage, yoraga'lek teppiyareegwaarak.

⁶ Teppiyareegwaarak wukwi iigak, niyo Eparat oonegen kilu yi nage menggim pa'nggwe o unde menggerak aap Ta'nayi inom, aap Tiyetat-Mbotanayi inom, inoreewi ando inabu'me mendek niyo Eparat oonegen kilu yi nage menggim pa'nggwe yi o ndi o arum menggaarak inom, nen liiru mbanogo at endagembogut Ndariyut nappiyareegwaarak.

⁷ Liiru mbanogo nappiyareegwaarak eebe nogo yi aret. “Ninogoba kendagembogut Ndariyut wa lombok yokkogo o.

⁸ Nit o Yekura paga wogo nogoorik, at mondok iya menggerak Ala awi wukwi iigoorak nogo kat ninowe kendagembogut keenu arenok nduk, yokkiruwi o. Yugum yo'nggok paga mban wukwi, eyo nggaganak paga kobat nabenggwi, eeko logonet, it iniki ambit eeppunuk, mondok abe li'lak wukwi iigoorak o.

⁹ Iigo nogoorik, nit nen it aap inoweewi nogo kin wogiigo logonet, Ta nen wone lengganogo yokkiragaarak paga o alut eeko menggam yi, obaane'me wukwi, owa'nagat wurogo pugwi, eeko ogotik? yinuk, yorogwe,

¹⁰ ndi, inendage liiru mbanogo yokkiruwok nduk, Aap inendage ngge? yinuk, kin wogiigwi, eeko mbako,

¹¹ it nen onggo yo'niragaarak nogo yi aret. Nit yi nogo, at o mbogut-nggween unde menggerak Ala ayeloman mini aret me, o obaane'me wukwi yi, yi tahun ndi tahun eekoorak yi, eeka'lek kagak o maan togon aap nggwok lombok Iterali inowe endagembogut nen Ala awi wuppunuk, li'luk eerogo pereegerak kwe,

¹² nit ninombomini nen at mbogut unde menggerak Ala anini wunduwak nduk, eeppogo mbareegwa, at nen waganogo aap Katirim mendek it Mbaben inowe endagembogut Nebukanetat nogo eenggime pege mbareegi, at nen o yi, yigirik-noonom eerogo punuk, ineebe keele maagiren o Mbaben piya nagagerak o.

¹³ Piya nagagerak kagak kwe, at Koret nogo aap Mbaben mendek inowe endagembogut mi'nage ti eyom paga at endagembogut Koret nen Ala awi wurik wonagagim obaane'me wuri woraawok nduk, wone lengganogo wumbege,

¹⁴ ndi, Ala awi wurik me yi mendek ndi mendek eeko menggaarak mbuti emas-perak paga ogobakkigirik nogo, Ala awi wurik o Yerutalem yime wonage me, at Nebukanetat nen wonok at agugi awi wurik me o Mbaben pi nagagerak nogo, aap endagembogut Koret nen wagangge nagagerik, at o yi unde logowak nduk mippereegerak aap Tetabatat nogo wogoge, eereegerak.

¹⁵ Eeke nagagerik, wone lengganogo at yoge logonet, Yi mendek ndi mendek yi wagangge logomenggendik, wonok o Yerutalem pi nanuk, Ala awi wurik wonagagim obaane'me wuko logomonggotik, time pumunggun o, yinuk, yoreegerak.

¹⁶ Yoge mbareegi, at Tetabatat nogo wonok o yime wage nagagerik, Ala awi owak wurabeegerak kuli yogondak awo aret wukwi kwe, age yubungga'lek aret ogoorik o, yinuk, yo'niragaarak o.

¹⁷ Togop aret yo'niragaarak me, Aap endagembogut Koret nen Ala awi obaane'me o Yerutalem wuri nanip o, yinuk, wone abet aret lengganogo yoragagerak liiru mbanak wonage kero, it aap inoweewi inendagembogut yi wone ndi wone lengganogo yorogo menggaarak liiru mbanak pogo menggam wonage kero, liirogon kwaaru o. Kwaakkage logomenggendik, pekkenok, nit wone ngge yoroorak kiniki mbaremenggendak nogo, liiru mbanogo nit nappinani mok o,” yinuk, liiru mbanogo nappereegwaarak.