Etara 3 - Ala Wone Peenok Peebi Mbanak

Ala ake warogo wogogo logowam ogobakkigireegwaarak wone

¹ It aakumi Iterali mendek nogo it logowam o kota-kota nogome ye mbambatinuk wonogwe iigak, tut 7 penengge mbareegi, iniki ambit eeppunuk, ambugwi aret o Yerutalem kuwak ari wogogwaarak.

² Kuwak ari wogo nogogwaarik, aap Yotarak aput Yetuwa oreewi aap Ala unde inom, Teyalitiyen aput Terubaben oreewi inom, abok nen, eeko logorak wone yugu aap Ala wone liirogon eeka Muta nen liiru mbaneegerak nogo ndak-ndak, Iterali inogoba Ala ake warogo kani kunggo logowok nduk, kani kunggak ogobakkigireegwaarak.

³ Ndi, it aakumi o time menggaarak ineebe paga inagabiti mbakak aa'nduk ogobakkigirik wonagagim nogome obaane'me ogobakkigiko nogogwaarik, nogo paga kuuben inom, kiyoma inom, at Aliku ALA ake warogo kani kunggo nogogwaarak.

⁴ Ti eeko logonet, liiru mbanak nogo ndak-ndak laago endage Ooliya-Ooliya Wurit Wogogwaarak nogo aberogo inale'nggen nen lakwi, ndi, “Ne ti paga ari wage kenok, kinaanggumi ndi kuli warogo Ala ake kani kunggo logomunggup o,” yugu nogo ndak-ndak aret ko'lu-kii'me warogo ake kani kunggwi, eeko nogogwaarak.

⁵ Ti eeko nogogwaarik, ne ti paga at Aliku ALA ake warogo kani kunggo nogogwaarak nogo aret kani kunggwi, tut ngget penengge kenok warogo kani kunggwi, ndi, Aliku ALA nen, “Ne ndiyom paga nake warogo wo'nogo logorak o,” yinuk, punogo pereegerak nogo paga warogo wogogwi, eeko logonet, it aakumi ando iniki nen Ala ake we aret pi wogwe iinok, warogo wogogwi, eeko nogogwaarak.

⁶ Ti eeko nogogwaarak nogo ti, at Aliku ALA awi owak awo wuraka'lek kagak kwe, tut 7 penenak ne aa'nduk ari wage ti paga, it nen Aliku ALA ake warogo kani kunggo logorak wareneegwaarak nogo ti aret.

Ala awi obaane'me wuruwok nduk, eereegwaarak wone

⁷ Ti eeko nogogwaarik, at aap Peritiya mendek inowe endagembogut Koret nen eeriyak yoragagerak nogo ndak-ndak, it aap o yugum paga wuka inom, eyo paga wuka inom, wu wogorogwe, ndi, it aakumi o Tiron mendek inom, Tirut mendek inom, eyo nggabina o Libanon nen wonok niyo laut paga o Yapo pi woraawak nduk, mbi eege, niyo eege, wam amburu toolak eege, wogorogwe, eereegwaarak.

⁸ Ndi, at Teyalitiyen aput Terubaben inom, Yotarak aput Yetuwa inom, inoreewi aap Ala unde inom, aap Lewi mendek inom, ndi, aakumi apit keele maageren mbo piya nogogwaarak nogo inom, nen iniyokan Ala awi wurik wonagagim o Yerutalem wogo nogogwaarik, wonogwe iigak, tahun ambi eeppunuk, ambi eeke tut ambi penembunuk, ambi penenak paga Aliku ALA awi wuruwok nduk, warenggwi iigak, inarum logowak nduk, aap Lewi mendek ndarak iigak, tahun 20 eerak nen irimbaga kuli kero mippiyareegwaarak.

⁹ Ndi, at Yetuwa apuri owe-awot inom, at Karimiyen apuri aap Yekura anebunu mendek inom, ndi, it aap Kenarat apuri owe-awot inom, it abok aret ti, Lewi mendek me, it nen aap Ala awi wukwi inarum wonogwe nogo inom aret inarum wonogogwaarak.

¹⁰ It aap o wuka nen Aliku ALA awi nogo owak wurakwi iigak, aap Ala unde nogo nen Ala awi wurik me eeko logonet, inayum yirika nogo mendek yirippunuk, oone pu eeka trompet nogo waganggwi, ndi, aap Lewi mendek Atap apuri nen togolowak tabak oone pu ndale eekak nogo waganggwi, eeko nogogwaarik, Aliku ALA alut eeruwok nduk, Iterali inowe endagembogut Ndawut yorage nagagerak ndak-ndak mi'nogogwaarak.

¹¹ Mi'nogo nogogwaarik, “Kaliku ALA kawi wuriyak nogo owak abu aret wurako o,” yinuk, ndawi wako logonet, Aliku ALA alut eekwi, “Wa!” yogwi, eereegwaarak. Ndi, eeko logonet, “Kat obeelom aret o. Nit Iterali mendek yi, Mondok-mondok kiniki kunik ee'ninake logomunggun o,” yinuk, it aakumi abok nen, “Kaliku ninogoba ALA wa,” yinuk, keekok yogogwaarak.

¹² It ando inale'nggen nen keekok yogwe iigak kwe, it inanggok Ala awi aa'nduk wurik inigen kogo nogogwaarak aap Ala unde inom, aap Lewi mendek inom, it aap ndarak ndegek inoweewi inom, nen o nogo owak wurakwi inigen iigo nogogwaarik, inoone nggwok paga le yereegwaarak.

¹³ It aakumi inoone nggwok paga noone-koone yogwe nogo, nda nen koneneegwaarak me, “Inale'nggen paga yogwe ilik, le yogo logonet yogwe a?” yinuk, yelok koorak meek aret wonogogwaarak.