Etara 10 - Ala Wone Peenok Peebi Mbanak

Kumi ugun wogonabeegwaarak nogo ponggoninabeegerak wone

¹ At Etara nogo Ala awi wurik enaame taati ena wanduk yagak eeke logonet, tamban eeke, omaluk pagangge, le ari, eeke me, it Iterali mendek ambik lombok aago kumi-aap inom, wologwe-komologwe inom, at owagam kuwak ari wogo nogogwaarik, togop aret inoone nggwok paga leenggu maareegwaarak.

² Leenggu maakwi me, aap Elam mendek paga wiganak Yekiyen aput Tekaniya nogo nen at Etara yoge logonet, “Yi aakumi ndi aakumi alik mendek ninaagan-ninambokan wonogwe inapuri komologwe wogonakoorak nogo ti, ninogoba Ala oone yugu li'lak eerulik tagambunuk, maluk aret eekoorak me, at Ala nen nit Iterali mbo pinanukwak, wone ena koonugun aret o.

³ Eeko logorak wone yugu liiru mbanak niniki ti paga panggombunuk, kat nogoba inom, it ninogoba Ala wone, Yogop ee'nu ndogop ee'nu, yugu inagabiti mbakwi nogo inom, nen, Ndogop aret eeko logowok o, yinuk, koonogo yo'niramonggotak nogo ndak-ndak eeko logonet, kumi endekem mendek inaagalogwe inom wonogwe yi, ponggonogo wumbiyaawok nduk, ninogoba Ala enggaanom paga wone ambi abuk nggaruk togon koonogo puwok o.

⁴ Wone ti eeriyak nogo ti, kat kobaalombok nen aret kooniyak me, koongge keegak, nit yeenggwa kirugun me, kogogumbuk a'nuk, mi'nage logomenggendik, koonu o,” yinuk, yoreegerak.

⁵ Yoge mbareegi, at Etara nogo mi'nage nagagerik, it aap Ala unde inengga warak inom, Lewi mendek inom, it Iterali abok aret inom, yoreegerak nogo ndak-ndak it eeko logorak kumbuk mbanuwak nduk, yorage mbareegi, “Eeko logowok o,” yinuk, kumbuk mbaneegwaarak.

⁶ Kumbuk mbanggo mbareegwa, at Etara nogo Ala awi wurik enaamenggwe nen wo'narok Eliyatip aput Yokanan ago ogoorak me nogome unggwi nage nagagerik, wonage logonet, it aap wogoren piya nagagerak wogogwaarak Ala wone yugu liirogon eerulik maluk eereegwaarak nogo paga iniki puru ari logonet, mbi inom, niyo inom, nengga'lek aret wonagagerak.

⁷ Wonagagerik, ti'nuk, aakumi wogoren piya nagagerak wogogwaarak o Yekura paga wonogwe inom, o Yerutalem paga wonogwe inom, abok aret o Yerutalem kuwak ari woraawak nduk, wone lengganogo wumbiige logonet,

⁸ “Aap ambi ta nen waga'lek kagak, ne kenagan ari nage kenok, nit aap inarum wonogwe inom, inoweewi inom, wone koonogo pogoorak ndak-ndak at amendek abok aret ndinggologwe, it wogoren piya nagagerak wogogwaarak kuwak eerak inenggela'me nen wumbugwi, eerugun o,” yinuk, eerogo nappit nagagerak.

⁹ Nappit nage mbareegi, nogo kenagan yega'lek kagak it aap Yekura mendek inom, Mbeniyamin mendek inom, aap mban abok aret tut 9 penenak tanggal 20 paga o Yerutalem kuwak ari wogo nogogwaarik, Ala awi wurik oore'nggam kwi'nari unggunuk logonet, wone agagerak ti paga inom, mayu nggwok wage paga inom, inaganak wake nagagerak.

¹⁰ Wake wonogwe iigak, aap Ala unde Etara nogo mi'nage nagagerik, it yorage logonet, “Kit Ala wone yugu liirogon eeka'lek taganogo mbo punuk, kumi alik mendek kinakuwi wogonako nogotak paga nit Iterali maluk eekwi nogo ambinom nggwok eerogo pogotak me,

¹¹ o yogondak aret kinombomini inogoba Aliku Ala enggaanom paga kinomaluk paganggo logomonggotik, Ala eeriyak iniki mbake nogo, Aret eeruwok o, yinuk, it yi aakumi ndi aakumi kinaagan-kinambokan wonogwe nogo kinom ogookkologwe, ndi, kumi alik mendek wogonakotak nogo ponggonogo wumbiigwi, ee'nip o.”

¹² Yorage mbareegi, it aakumi kuwak aago nogo ambugwi aret inoone nggwok paga onggo yogo logonet, “Wone yagandak ti abet aret me, nit ndak-ndak aret eeruwok o.

¹³ Togop eerugun aret kwe, yogondak aakumi ambik kuwak eeri wagaarak ya'i wonogwe iigak, o mayu kunik tit wonage me, endekem mi'ndak logorak meek tit age, ndi, nit maluk ambik lombok eekoorak me, ne ambit paga, ne mbere paga, wone yi kooniyak meek aret age, eeke me,

¹⁴ kit aap nit aakumi abok kuwak aago ninarum monggotak yi nen aret ninawone amburu mbanggo logomunggup nduk, yokkirogo o. Ndi, wone ti mbaniyak nduk, Ndiyom paga woraamunggup o, yo'nirogwe kiinok, nit ninawi kota-kota aap abok aret kumi alik mendek inakuwi wogonakaarak nogo nen inakuwi nogo wogoren wogo logonet, ninawi kota-kota lombok ninarum menggaarak ninoweewi inom, aap wone ninowak loongga inom, ninom kinowagam wogwe niinok, ninawone amburu mbanumonggotak paga ninogoba Ala anini kani omoonuk negen ninoba pinanege nogo lek aret arigin o,” yinuk, yorogogwaarak.

¹⁵ Wone yorogogwaarak nogo it abok op aret mbareegwaarak kwe, it aap Atayen aput Yonatan aap Tikwa aput Yateya imbirak perak, aap Metulam aap Lewi mendek Tabetayi imbirak wone inikime mambiyareegwaarak paga, “Eeriyak nineebi,” yereegwaarak.

^16-17 Togop aret yereegwaarak kwe, it aap wogoren piya nagagerak wogogwaarak nogo nen eeriyak kooneegwaarak nogo eeko logonet, aap Ala unde Etara nogo nen it aap ndarak ndegek inarum menggaarak inoweewi inalitak lombok inendage kunogo leeninabeegerak. Leenogo piige mbareegi, tut 10 penenak tanggal 1 paga it aap kumi alik mendek wogonabeegwaarak nogo inawone amburu mbanuwak nduk, inom kuwak eeppiinok, inalitik-inalitak inawone mbanggwi iigak, tut iyaalok penenak tanggal 1 paga ari wagagerak.

Aap kumi alik mendek wogonabeegwaarak wumbiyareegwaarak inendage liiru mbanak wone

¹⁸ It aap Ala unde paga wiganak nen kumi alik mendek wogonabeegwaarak inendage yi aret. Aap Yotarak aput Yetuwa oreewi inom it paga wiganak ti, Maateya, Eliyetet, Yarip, Nggeraliya aret.

¹⁹ It nogo nen, “Nit ninakuwi abet aret ponggonogo wumbiyaagun o,” yinuk, inoweewi kumbi wappiinok, eereegwaarak nogo Ala aberak logokwak, inomaluk lek eerogo piyaawak nduk, inaanggumi inenggela'me nen ndomba ngguunok ambi waganogo Ala ake warogo wogoreegwaarak.

²⁰ Aap Imet paga wiganak ti, Kanani, Tebaya imbirak aret.

²¹ Aap Karim paga wiganak ti, Maateya, Eliya, Temaya, Yekiyen, Utiya aret.

²² Aap Patikut paga wiganak ti, Eliyowenayi, Maateya, Itamayen, Natanen, Yotabat, Elata aret.

²³ It aap Lewi mendek inenggela'me nen wogonabeegwaarak inendage ti, Yotabat, Timeyi, Kelaya endage ambi Kelita nogo, Petakiya, Yura, Eliyetet aret.

²⁴ It ndawi tiyangga inenggela'me nen waganeegerak endage ti, Eliyatip aret. It tungga'nggi arum menggaarak inenggela'me nen wogonabeegwaarak inendage ti, Talum, Telem, Uri aret.

²⁵ It aap Iterali ando inenggela'me nen wogonabeegwaarak inendage yi aret. Aap Parot paga wiganak ti, Aramiya, Yetiya, Malikiya Miyamin, Eleyatat, Malikiya, Mbenaya aret.

²⁶ Aap Elam paga wiganak ti, Mataniya, Takariya, Yekiyen, Abiri, Yeramot, Eliya aret.

²⁷ Aap Tatu paga wiganak ti, Eliyowenayi, Eliyatip, Mataniya, Yeramot, Tabat, Atita aret.

²⁸ Aap Mbebayi paga wiganak ti, Yokanan, Kananiya, Yabayi, A'layi aret.

²⁹ Aap Mbani paga wiganak ti, Metulam, Maluk, Araya, Yatup, Teyan, Yeramot aret.

³⁰ Aap Pakat-Mowap paga wiganak ti, Arana, Kelan, Mbenaya, Maateya, Mataniya, Mbetalen, Mbinuwi, Manate aret.

³¹ Aap Karim paga wiganak ti, Eliyetet, Yitiya, Malikiya, Temaya, Timeyon,

³² Mbeniyamin, Maluk, Temariya aret.

³³ Aap Katum paga wiganak ti, Ma'nayi, Matata, Tabat, Elipelet, Yeremayi, Manate, Timeyi aret.

³⁴ Aap Mbani paga wiganak ti, Maarayi, Amaram, Uwen,

³⁵ Mbenaya, Mbereya, Keluku,

³⁶ Waniya, Meremot, Eliyatip,

³⁷ Mataniya, Ma'nayi, Yaatayi aret.

³⁸ Aap Mbinuwi paga wiganak ti, Timeyi,

³⁹ Telemiya, Natan, Araya,

⁴⁰ Makanarabayi, Tatayi, Tarayi,

⁴¹ Ataren, Telemiya, Temariya, Talum,

⁴² Amariya, Yutup aret.

⁴³ Ndi, aap Nebo paga wiganak ti, Yeyiyen, Matika, Tabat, Tebina, Yarayi, Yowen, Mbenaya aret.

⁴⁴ It yi, abok aret inakuwi kumi alik mendek wogonabeegwaarak me, kumi nogo yorogo logonet, “Kumi yi wae. Kinaagalogwe kinom nanip o,” yinuk, wumbiyareegwaarak o. 1