Epetut 6 - Ala Wone Peenok Peebi Mbanak

Wologwe-komologwe nen eeko logorak wone

¹ Wologwe-komologwe yi wae. Kit Ala apuri aret me, kinagalomini-kinogobamini inoone yokkirogwe iinok, konembunuk eeko logorak nogo ti, Ala nen aret kooneegerak me, liirogon eeko logonip o.

^2-3 Ala nen wone, “Yogop ee'nu, ndogop ee'nu,” ari logonet, “Kinagalo-kinogoba inayuk wuko logonet, inoone liirogon aret konenggo logomunggup o,” ari nagagerik, ti'nuk, “Nggween paga yime yi wone ndi wone kinoba aga'lek, kineebe obeelom li a'nuk, kanggo logomunggup o,” yinuk, yereegerak nogo ti, wone, “Yogop ee'nu, ndogop ee'nu,” yoragagerak eekwi iinok, onggo koloorak wone aa'nduk lombok yoragagerak nogo ti aret.

⁴ Kit aap kinapuri wonogwe kenok, inanini aruwak nduk, eeppiyaagup o. Ata, Ala wone mugurok nogo logowak nduk, inaruk wakwi, Ala wone mamunirogwe, eeko logonet, tawe eeginako logonip o.

Inayeloman inogobamini inom eeko logorak wone

⁵ Kit aakumi inayeloman monggotak yi wae. Kit nen, “Nogoba yi, Keritut kwak me,” yinuk, kinagabiti mbakak inayuk wuko logonet, kiniki obeelom yanggonak paga inoone konembunuk, inake eeko logonip o.

⁶ Eerit nogo logonet, inikilom kinombaruwak nduk, inigen iigak mban eeko logorak ti lek o. Ata, “An Keritut ayeloman aret me,” yinuk, Ala iniki mbake menggerak nogo, “Eerikit o,” yinuk, kiniki obeelom yanggonak paga eeppiinet nogo logonip o.

^7-8 Nit aakumi inayeloman wonogwe inom, aakumi we ugun wonogwe inom, abok aret obeelom eerit nogwe niinok, ninogoba nen onggo ndak-ndak aret wo'niraagin nineenu me, “Yi aakumi inake eeke lek o. Ata, nowe ake aret eeke o,” yinuk, kineebi mbaka'lek kiniki ale'nggen paga eerit nogo logonip o.

⁹ Ndi, kit nogobamini yi wae. Kit kinayeloman wonogwe kenok, “Nit ninogoba ambit mbogut paga wonage nogo nen ninayeloman inom, inogobamini nit inom, ninetenggen liippinaninuk wo'niraagin lek, eekwi onggo ndak-ndak wo'niraagin,” mbako logonet, kinoone omaawi paga yoraagup o. Ata, it kinayeloman nen iniki ale'nggen paga eeppinagago mengga kwak, kit ndak-ndak kiniki yanggonak paga obeelom eeppiigo logonip o.

Ala eegin-omaale li'luk eeppunuk, logorak wone

¹⁰ Wone abu aret yokkiragarak me, age yobok ambi yi yokkira o. Kinowe omaawi ambik nogo paga kiniyok panggombunuk, kinogogumbuk logonip o.

¹¹ Ibilit nen iniki koombunuk, kinambokan lagani wage kero, mugogo nappegak eeko logobagip nduk, Ala nen at eegin-omaale li'luk eerogo pinagareegerak nogo, waganggo logonip o.

¹² Wim ninom nambuko logonet, perenggologwe nogo ti, nit aap nggween paga mendek ninom nambukwi lek o. Ata, it inayuk warak o oolo yayi nugu logonet, aakumi nggween paga yime iniki o apit aago pogom wonogwe nogo, maluk eeruwak nduk, iniki nggaganggo menggaarak Tile inom, at awuri yi kugi ndi kugi inom, abok aret ninom wim nambuko logonet, perenggologwe me,

^13-17 maluk eekkinabuwak nduk wogwe iinok, mondok mugogo nappiigo logonet, kit mban kineegin tiyanak logobagip nduk, inagabee'le mbam nggerenggologo mengga kwak, Ala ari menggerak wone kinikime nggerorogon waganggwi, tin yikkologo mengga kwak, Ala obaabut obeelom menggerak nogo yikkologwe, sepatu omaawi mendek yikko'nok nogo mengga kwak, Ala ninom lambumbinaniyak obeelom wone nogo pipuk ee'nuk nogwe, eeko logomonggotik, at maluk lombok eeke menggerak nogo nen omaale kani kunik negen namburi wage nogo, mbeenogo nappogo logobagip nduk, nggeemu langgunggologo mengga kwak, abet mba'nuk kiniki Ala oba panggombugwi, petagi langgunggologo mengga kwak, kinagap ndariyak wone aberogo kologwe, tege wooluwak kwak ti, Aberiniki nen Ala wone wo'niragagerak nogo waganggwi, eeko logomonggotik, Ala nen at eegin-omaale wurogo pinagareegerak nogo, li'luk eeppunuk, kinogogumbuk nu'lek logonip o.

¹⁸ Kinogogumbuk mondok kinom perenggologo logonet, Ala nen yeenggwaagiraawak nduk, Aberiniki nen yokkirage kagak, puk aga'lek Ala nggino yogwi, nogo yigin eekkinaka'lek kineenik logonet, it Ala apuri ake leenak abok aret inake tamban eekwi, eeko logonet,

^19-20 an kunduk, obeelom wone kote kumaarak wonagagerak nogo, yoranet nege logokit nduk, Ala nen aret leenogo mippaneegerak kagak keele maarogo mambaneegwaarak yime logonet, nagabiti nen noone puk logorak ti lek o. Ata, wone nogo yoraakit nduk, eeke neegak, Ala nen, “Togop yoret o,” yinuk, yo'nege kenok, nagabiti mbaka'lek noone teeluk paganogo yorage logokit nduk, it Ala apuri abok aret inake tamban eeko logonet, an kunduk, nake tamban eeko logonip o.

Irip paga keyage wappiyareegerak wone

²¹ At ninawot niniki kunik ninowe eyabu liirogon eeke menggerak Tikikut nogo nen, an neebe nonggop logonet, eeke minggirak wone nogo, abok aret kineenu arubagip nduk, yokkira woraagin o.

²² Kineenu eeppinagarak nduk, kinowagam nappi woraminggirak wage logomenggerik, nit abok nineebe nonggop wonogwe nogo, ninabok yokkirage, ndi, kiniki eyak wappinagage, eeri woraagin o.

²³ Kit ninoreewi Ala apuri abok aret abet mba'nuk, kiniki ugun obeelom ambit lambunik logonet, nabuwa-kabuwa mbako logobagip nduk, ninogoba Ala ninowe Yetut Keritut imbirak nen eeppinagago logowak o.

²⁴ Ninowe Yetut Keritut kit kiniki kunik eekwi nogo, lek aga'lek mondok kundugu wonogwe kiinok, kinabuwa mbake logonet, kinarum logogin o. An Pawulut nen abu aret yokkiragi o. Noreewi wa!