Epetut 5 - Ala Wone Peenok Peebi Mbanak

Ala apuri o eya paga nogo menggaarak wone

¹ Noreewi o. Kit Ala apuri kinom kunik me, at eeke menggi kwak, kit ndak-ndak eerit nogo logonip o.

² Ala ake warogo kani kunggwi iinok, Ala nen obari obeelom kage menggi kwak, at Keritut ninabuwa nen, “Inake kambikit,” mba'nuk, ninake kambeegerak nogo ndak-ndak, nabuwa-kabuwa mbako logonet, at ambi obeelom eeppegak eeko logonip o.

³ Kit Ala apuri ake leenak aret kagak, kumi ugun wurinabit nugwi, kiniki kumi paga mban lunik logonet, ugun-ugun eerit nugwi, uugwe-uugwe mbakwi, eerit nugwi kiinok, it aakumi ando nen, “Ala apuri aret kwe, maluk eekwi iyaanip o,” yinuk, kinombakwi iyo, liippunuk, eeko logonip o.

⁴ Kumi inabok mban agan nugwi, elege negen ugun i'ndok kambuurak mban agan nugwi, iniki kumi paga mban lunik logonet, inoonewak agan nugwi, eekwi ti mendek abok aret yuurak lek maluk mendek kagak agan nugwi me, kit Ala apuri kenok togop yuurak mondok mage. Ata, Ala, “Wa!” mban yoge logonip o.

⁵ It kumi ugun wurinabit nogo menggaarak inom, iniki kumi paga mban lunik logonet, inabok agan nugu menggaarak inom, ndi, it uugwe-uugwe mbakwi nogo ti, aap kugiwak alut eekwi ndak-ndak aret me, it ti inom, it aap ti eeko menggaarak abok aret Ala Keritut imbirak inabu'me piigo menggam unggwi nagun mondok lek mbako logonip o.

⁶ It Ala wone tagambunuk, maluk ti mendek eerit nogwe iinok, Ala anini inoba piige menggerak me, it ugun kobak menggaarak nogo nen inoone amburu ndik-ndik agan wogo logonet, kinambokan laganggwi iyo, liippogo logonip o.

⁷ It aap togop yogo menggaarak nogo ti, kinom kunggoloorak mage o.

⁸ Kit aa'nduk o apit paga nogo nogogutak kwe, yogondak kinowe nen muk eya eerogo pinagareegerak me, Ala apuri eya paga logonet, eeko mengga kwak, kit togop aret eerit nogo logonip o.

⁹ It eya paga logonet eerit nogo menggaarak anggen yugu nogo ti, aakumi obeelom eeppiinet nugwi, maluk eeka'lek Ala ari menggerak nogo ndak-ndak eerit nugwi, iniki mbere lek ambit logonet, inoone abet mban agan nugwi, eeko menggaarak me,

¹⁰ kit nen, “An eeke yi, Ala inikilom mbake menggerak ndak-ndak aret eeke ilik?” yinuk, liippako logonet, Ala apuri eya paga logonet, eeko mengga kwak, kit togop aret eerit nogo logonip o.

^11-12 It aap o apit paga logonet, obeelom ambi eekkoloorak lek kagak eerit nogo menggaarak nogo, kinom lambumbunuk eerit nagup o. Ata, it kote eeko menggaarak inabok mbininiyak kineebi mbakwi kwe kagak, nggwok paga aret inenggali wappiigo logonip.

^13-14 Aap ambi nen ari logonet, “Wologwe wae. Kit nogo yugwi nogo kineenik a'nip o. Kineenik a'nuk, it aakumi mondok kambak wonogwe nogo, inenggela'me nen wundi wogwe kiinok, Keritut nen eya eekkinabigin o,” yinuk, yereegerak nogo ti, ndi wuninggwi iinok, yi mendek ndi mendek o apit paga wonage nogo kin kogo mengga kwak, it aap kote eeko menggaarak nogo, nggwok paga paganogo inenggali wappiigwi iinok, “Aap yi inobaabut togop aret menggaarak iigo o,” yinuk, yuwak nduk yereegerak kogo o.

^15-16 Togop me, kit eerit nogo monggotak nogo, mondok liippunuk eerit nogo logonip o. O yi eyom paga aakumi nen maluk mondok alik negen eerit nogo logorak koonggwi me, kiniki lek we ugun eerit nogo logorak ti mage o. Ata, kiniki mondok warak logonet, “O yogondak obeelom eeriyak ambi yi, nanonggwan agaarak me, eerikit o,” mba'nuk, eerit nogo logonip o.

¹⁷ Kumili negen kiniki lek ugun eerit nogo logogup o. Ata, ninowe nen eeriyak kooneegerak nogo mban liippunuk, eerit nogo logonip o.

¹⁸ Ndi, anggur amburu nonggo logomonggotik, kumili kunit namonggotak paga maluk eekkinaburak me, mbo punuk, Aberiniki mban kiniki me liinik logowak nduk, eeko logonip o.

¹⁹ Ndi, kit-kit aret kiniki mondok ale'nggen paga ninogoba endage alut eeko logonet, Ndawut ndawi pereegerak nogo inom, ki wone ndawi inom, Ala eeke menggerak ndawi inom, abok aret warit nogo logonip o.

²⁰ Warit nogo logonet, yi mendek ndi mendek apit eeppinanege menggerak nogo paga ninowe Yetut Keritut endage kunogo, “Ninogoba Ala wa,” yinuk, keyage wako logonip o.

Aap inakuwi inom eeko logorak wone

²¹ Ninowe Keritut ayuk wuko logonet, kiniki tebe yinuk nabu'me-kabu'me logonip o.

²² Kit kumi yi wae. Kit kinogonggelomini warak kenok, ninowe Yetut abu'me tebe yinuk, monggo kwak, kinogonggelomini inabu'me tebe yinuk, logonip o.

²³ At Keritut alik nen nit Ala apuri yi awi ndi awi monggoorak nogo, ninagap ndarogo at eebe paga ambit aruwak nduk, kunogo pinaneegerak me, ninanobak kwak Keritut wonage nogo pogom, kit kumi kinanobak kwak ti, kinogonggelomini aret o.

²⁴ Ndi, Ala apuri yi awi ndi awi monggoorak nogo ti, Keritut abu'me logonet, oone konenggo monggoorak nogo pogom, kit kumi togop aret kinogonggelomini inabu'me tebe yinuk, logonet, it inoone mban konenggo logonip o.

²⁵ Ndi, kit aap yi wae. Kit kinakuwi warak kenok, Keritut nen nit Ala apuri yi awi ndi awi monggoorak nogo, ninabuwa mbake logonet, “Inake kambikit o,” yinuk, ninake kambeegerak nogo kwak, kit kinakuwi togop aret inabuwa inombako logonet, obeelom eeppiigo logonip o.

^26-27 Nit Ala apuri yi awi ndi awi monggoorak ninake kambeegerak nogo ti, “An napuri inoba mili lenggenak yinik-pinik aago ineebe yinuk-punuk eerak iigak koloorak neebi o. Ata, ineebe kikak naka'lek mondok alik leenak abe kigirikwe lombok iinok kolaakit o,” yinuk, ngguu'mo wappiigo mengga kwak, at oone waganggwi paga ninomaluk lek eerogo pinanege logomenggerik, Ala ake leenak logowok nduk, ninabuwa mbake logonet, ninake kambeegerak o.

²⁸ Ti ndak-ndak kit aap kineebe kiniki kunik eekkologo monggotak nogo kokwak, kinakuwi togop aret kiniki kunik aganako logonip o. Aap ambi akwe iniki kunik eeke kenok ti, at eebe aret iniki kunik eekkolage menggerak o.

^29-30 Ndi, Keritut eenggi-iyok kwak nit aret me, Keritut nen at apuri yi awi ndi awi monggoorak nogo, iniki kundugu ee'ninake logonet, liirogon ndegenninake menggi kwak, nit aap nineebe ti, nineebi mbakulik o. Ata, niniki kunik eekkologo logonet, liirogon ndegenggologo monggoorak nogo pogom, kit kineebe ando nogo ti, kinakuwi aret me, kiniki kunik aganako logonet, liirogon aret ndegeninako logonip o.

³¹ “Togop me, aap nen agalo-ogoba mbo piinok, Akweeluk imbirak ambit a'nuk, it imbirak ineebe mbere kwe, ambit aret logogun o.”

³² Ala nen wone yereegerak nogo ti, wone alom abu kumaarak negen aret yereegerak mbake logonet, Keritut apuri yi awi ndi awi monggoorak nogo ninom nonggop togon ambit kunik logorak wakkagak yokkirage kwe, ti mban yokkirage lek o.

³³ Ata, kit aap kineebe kiniki kunik eekkologo monggotak kokwak, kinalitak lombok kinakuwi inabuwa mbakwi, ndi, kit kumi kunduk, kinogonggelomini inayuk wuko logonet, inabu'me tebe yinuk, inoone konenggwi, eeko logobagip nduk, inom aret yokkirage agarik o.