Epetut 4 - Ala Wone Peenok Peebi Mbanak

Ala apuri nineebe ambit kunogo pinaneegerak wone

¹ Ti kenok, noreewi o. Kit eeko logorak yonggo pinagareegerak Ala nen kit ndak-ndak aret eerit nogwe kiyaawak nduk, an ninowe oone wonok yoranet nege paga keele maa'nabeegwaarak nogo nen, “Ao,” mbake logonet, yokkiragi o.

² Eerit nogo logonet, kiniki tebe yinuk yanggorogon eeppiigwi, kiniki aanaganggenggwi lek nabuwa-kabuwa mbako logonet, yeenggwa-yeenggwa eekwi,

³ Aberiniki nen kiniki ambit lambumbinagareegerak nogo kinom ogookkologwe kiyo, liippunuk wonogwe, eeko logonip o.

⁴ Kiniki lunik wonogwe nogo ambit aret kolaabagip nduk, yonggo pinagareegerak nogo ndak-ndak, kit kineebe ambit lambunik aret. Aberiniki eebe togon ambit aret.

⁵ Nit ninowe nogo eebe ambit aret. Niniki abet mbakwi wone togon ambit aret. Ndi, yiime wuppinanugwi wone nogo kunduk ambit mban aret o.

⁶ Nit aakumi abok ninogoba ti, Ala ambit aret logonet, oome-endekem at eebe mondok endak warak menggerak. Yi mendek ndi mendek abok aret at abu'me menggerak me, yi eekwi ndi eekwi abok aret at nen mban koonogo yo'nirage kagak eeko monggoorak.

^7-8 Ala wone liiru mbanak paga nen ari logonet, “At agi tiyarogon lagi nage logonet, It aakumi keele maarogo piirogo wonogwe nogo, apit aret ndineren lagi nage nagagerik, At amendek onggo lek we aret tumburiragagerak o,” yinuk, yereegerak nogo ndak-ndak, nit togon, at eyabu eeko logowok nduk, Keritut nen, “At ti mendek eeke logowak,” kooneegerak nogo, iniki kunik nen ninalitik-ninalitak togop aret unde eeppinaneegerak.

⁹ Ndi, “At lagi nagagerak,” yereegerak nogo ti, ngge nduk yereegerak mbakop? Lek o. At nggween abu'na wambi nage nagagerik, lagi wagagerak nogo kenok, yereegerak nogo lek a?

¹⁰ Ndi, at wambi nage nagagerik, lagi wagagerak nogo ti, yi awi ndi awi abok aret at eebe endak warak logowak nduk, mbogut irimbaga lombok lagi nagagerak nogo aret.

¹¹ At nogo nen it ando nappiigak logowak nduk unde eeppiige, ando Ala wone yorogo logowak nduk unde eeppiige, ando obeelom wone yi awi ndi awi ambime yoragak nugu logowak nduk unde eeppiige, ando o ambit me Ala apuri liirogon inarum logowak nduk, eeppiige, ndi, ando Ala wone mamunirogo logowak nduk eeppiige, eereegerak.

¹² Ti eereegerak nogo ti, nit Ala eyabu liirogon eerit nogo logonet, nit nineebe paga Keritut eebe mondok wigak yuwak nduk, nit Ala apuri abok aret mondok li'luk eerogo pinaneegerak.

¹³ Ti eeppinaneegerak nogo ti, nit abok aret Ala aput eeke menggerak nineenu ogo logomonggoorik, abet mbakwi paga niniki ambit a'nuk, Keritut iniki mondok koleewak obeelom wonage nogo kokwak, nit togop aret niniki kole eeppinanit wundi wage logowak nduk, unde eeppinaneegerak.

¹⁴ Togop me, noreewi o. Yi kilaarak-mogonik eeke logonet, yi mendek ndi mendek piyanogo nippege, o wiya nen yi mendek ndi mendek wonok nage, eeke menggi kwak, elege-aabologwe ti, togop aret wonogwe me, kit kunduk togop logonet, it aakumi pilit wone yogo menggaarak nogo nen aakumi inambo'me laganuwok nduk, iniki koombunuk, inoone amburu paga nomoniren nawok nduk, agan nugwi wone ti mendek kit ugun konenggo logorak mage o. Ata, Keritut iniki mondok kole menggi kwak, nit togop aret niniki kole eeppinanit wundi wage kenok, nit elege-aabologwe togop ti ndak-ndak logogun lek o.

¹⁵ Ata, nit aakumi niniki kunik en Ala ari menggerak wone nogo mban yorogo logonet, ninanobak kwak Keritut iniki abu koleewak menggi kwak, nit togop aret niniki kole ee'ninabuwak nduk, eerit nogo logowok o.

¹⁶ Nineenggi-niniyok yeregerak-peregerak abok aret eeriyak ake punik alitak lombok wonage kwe, nineebe ambit ninomanggen paga yinik-kunik eerak logonet, eerit nage kenok, nineebe mondok op aret menggerak nogo kokwak, nit Ala apuri ninanobak kwak Keritut ninom togop aret kunik me, niniki-kiniki kunik eeko logonet, ninalitak eeriyak unde eeppinaneegerak nogo ndak-ndak eerit nugwi niinok, Keritut eebe mondok obeelom aret logonet, nit nineebe paga wiganit nage logogin.

Ninobaabut ngget mendek eeppinaneegerak wone

¹⁷ Togop me, noreewi o. “It aakumi Ala wone konenggulik endekem mendek nen we aanom warogo koombunuk, eerit nogo mengga kwak, kit togop eerugup o,” yinuk, ninowe nen yo'nege kenok yokkiragi o.

¹⁸ It iniki omaawi logonet, “Ala wone woorak nineebi o,” yinuk, yogwe paga it iniki o apit pogom wonogwe, Ala inom ogoorak wonogwe, eekwi me, Ala nen ineenik eeppiyoorak wone nogo, it mondok kobak aret wonogwe o.

¹⁹ It maluk eeriyak inagabiti mbaka'lek kumi paga mban iniki lunik logonet, “Ugun-ugun eeruwok o,” mba'nuk, iniki nengge kenok ale'nggen paga eerit nogo menggaarak kwe,

²⁰ Keritut eeke nagagerak wone nogo mamunggirogo logonet, kit eekwi ti mendek ambi inom mamunggiroolik o.

²¹ At eeke nagagerak nogo mamunggirogwe niigak, Ala ari menggerak wone at Yetut ndak-ndak ari nagagerak nogo, kit liirogon konenggo logonet,

²² “Niniki nengge kenok mugurok nogo nogoorak nogo ti, maluk ee'ninaburak kagak mugurok nogo nogoorak kogo,” yinuk, mamunggologogutak me, kinobaabut maan mendek nogo, nggonenogo mbo punuk,

²³ kiniki ngget ogobakkigikkinabuwak nduk, Ala oone mban mugurok nogo logonip o.

²⁴ Ala maluk eekeelik obaabut abu abe koonak menggerak nogo kokwak, kit ndak-ndak kinobaabut mondok ngget mendek eerogo pinagawak nduk, yokkiragi o.

²⁵ Togop me noreewi o. Keritut ninom kunik eenggi-iyok kokwak nit aret me, kit-kit aret pilit pugunggo monggotak nogo mbo punuk, kit abok aret wone abet kenok mban yogo logonip o.

²⁶ Kinanini nen maluk eeriyak ti mage o. Ndi, kinanini wungge kagak oonegen kilu yi noorak ti mage mban.

²⁷ Ibilit nen, “Nanonggwan aga o,” yinuk, kiniki nggagangginake kero, maluk mbuuluk kinikime kumaappunuk logogup o.

²⁸ Kit yogoot waganggo monggotak nogo, ambinom yogoot waagup o. Ata, kineenggi paga nen mban eerogo nunggwi, it aakumi inamendek lek iinok yeenggwaarogwe, eeko logobagip nduk, yabu ambi eeriyak miippunuk, kineenggi omaawi paga eekko'net nogo logonip o.

²⁹ Wone maluk mendek kinambe paga nen wumbi woroorak ti mage o. Ata, it konenggwi nogo nen, “Ninabuwa nen yo'nirogwe iigo o,” yuwak nduk, aaninggin ambi inoba age kenok, iniki kole eeppiyoorak wone mban yogo logonip o.

³⁰ Ala nen at apuri wogonabi wage logonet, nit ninom wo'ninabi woroorak nineenu logowok nduk, wam yelok kaawak nen aruk nggaganggo mengga kwak, Aberiniki wo'niragagerak me, Ala Aberiniki nogo, iniki maluk eerogo puurak mage o.

³¹ Kinoreewi kinom ogoorak wonogwe, neebi-keebi yogwe, nanini-kanini yogwe, wone wakwi, miyuk-meya eerogo piigwi, kinoreewi maluk eeppiigo monggotak nogo mendek abok aret mbo pogo logonip o.

³² Mbo punuk, kinom nabuwa-kabuwa eeko logonet, kiniki yanggonak paga at ambi obeelom eeppegak eeko logonip o. Keritut eereegerak nogo paga Ala nen kit kinomaluk lek eerogo pereegerak nogo ndak-ndak, kit-kit aret maluk eekkologomonggotak nogo, mari eerogo mbo pogo logonip o.