Epetut 1 - Ala Wone Peenok Peebi Mbanak

EPETUT

PAWULUT NEN ALA APURI O EPETUT MENDEK INAKE LIIRU MBANOGO NAPPEREEGERAK WONE

¹ Ala mbareegerak paga Keritut Yetut ayonggo nappiigak mendek agago paneegerak an Pawulut nogo nen kit Ala apuri at ake leenak Keritut Yetut kinom kunik logonet, obeelom wone liirogon mugurok nogo monggotak o Epetut wonogwe nogo, wone ambi yokkira o.

² Ninogoba Ala ninowe Yetut Keritut imbirak iniki kunik nen wokkirogwe, kiniki ugun tayenak ale'nggen logobagip nduk, eeppinagagwi, eeko logogun o.

Keritut ninom kunik me, obeelom eeppinanege menggerak wone

³ Ala wonage menggim mbogut paga mendek eeppinaniyak mbake menggerak nogo mendek abok aret, Keritut ninom kumbinaneegerak paga nen eeppinanege me, ninowe Yetut Keritut ogoba Ala mondok alut eeko logowok o.

⁴ At Ala nen, “Peebi Keritut nen eeppiyamenggerak paga an napuri maluk inoba lenggenna'lek nenggaanom paga mondok alik leenak logowak o,” yinuk, o nggween yi, awo wakkaga'lek kagak mii'ninabeegerak.

⁵ Nit awo nda'naga'lek niigak, at Ala nen Yetut Keritut eeremenggerak paga, nit at apuri lombok logowok nduk wo'ninaburak inikilom mbareegerak nogo ndak-ndak, iniki kunik en, “Eeppiyaakit o,” yinuk, koonogo pereegerak nogo aret eeppinaneegerak.

⁶ Ninabuwa mbake logonet, at aput iniki kunik nen wo'niragagerak nogo paga, amendek mondok alik negen ngginu-ngginu eerogo wo'nirage menggerak me, nit mondok at alut eeko logowok o.

^7-8 At Ala ninabuwa mba'nuk, iniki warak lombok logonet, mondok liippinanege nagagerik, oba ngginik kagak eeppinanit wundi wage menggerak nogo ndak-ndak, at amiya paga ninonggo mbambunuk, keele piinogo pinanege nagagerik, ninomaluk mondok lek eerogo pinaneegerak.

⁹ “Keritut nen togop eeppiyaawak o,” yinuk, inikilom mbake nagagerik, koonogo pereegerak kote kumaarak wonage nogo aret paganogo yo'niragagerak.

¹⁰ At Ala nen, “An eeriyak mbareegirak nogo, ndiyom paga a'me lik yigin o,” yinuk, kooneegerak nogo ti, mbogut paga mendek inom, nggween paga mendek inom, yi mendek ndi mendek abok aret Keritut abu'me pege logomenggerik, at eebe mondok tiyanak logorak kooneegerak nogo ti aret o.

¹¹ At eeriyak koonggetak ndak-ndak aret eeke menggerak nogo nen, “An napuri ndogop obeelom eeppiyaakit o,” yinuk, o maan togon nit nda'naga'lek niigak, koonogo pereegerak nogo ndak-ndak, Keritut eeremenggerak paga nit at apuri aret miirogo pinaneegerak wonogo ogoorik o.

¹² Ti eeppinaniyak koonogo pereegerak nogo ti, “Nit nen, Keritut ndogop eeppinanigin o,” yinuk, aa'nduk abet mba'nuk, niniki at oba panggombereegurak nogo eerit nogwe paga Ala endage tiyak yuwak nduk, mii'ninabeegerak me, at alut eeko logowok o.

¹³ Kit kinagap ndariyak Ala ari menggerak obeelom wone nogo, konembunuk, abet mba'nuk kiniki Keritut oba panggombogo mbareegup, wam yelok kaawak nduk, aruk nggaganggo mengga kwak, kit Ala apuri alik leenak yelok logobagip nduk, Aberiniki wo'niroorak koonogo pereegerak nogo, kit kunduk wokkiragagerak.

¹⁴ Ti wokkiragagerak nogo ti, peebi kit at apuri kinonggo mbanak me, kineebe abet aret wokkinaburak aberak logobagip nduk, kwe yiindi aa'nduk pogo mengga kwak, Aberiniki aret yilinogo wokkiragagerak me, Ala nen kit ninom ndak-ndak Keritut eeremenggerak paga aret mondok iya lombok koonogo pinaneegerak me, alut eeko logowok o.

Pawulut nen inake tamban eeke nagagerak wone

¹⁵ Togop me, kit nen ninowe Yetut abet mba'nuk, kiniki at oba panggombugwi, ndi, Ala apuri ake leenak abok aret kinom kiniki kunik aganakwi, eerit nogwe nogo, an konengge nagagirik,

¹⁶ tamban eeke logonet, kit eerit nogwe paga an puk aga'lek Ala mondok, “Wa,” yoge minggirak.

¹⁷ At ninowe Yetut Keritut ogoba Ala mondok tiyanak menggerak nogo nen, kit kiniki warak eeppinagage, Ala eeke menggerak yelok kaabagip nduk, kineenu eeppinagage, eeke menggerak Aberiniki nogo, ambinom wokkiraawak nduk, kinake tamban eeke minggirak.

¹⁸ Ti eeke logonet, kit kola nabagip nduk kinayonggo pinagareegerak kiniki lunik wonogwe nogo inom, nit at apuri ake leenak kenok eyate mondok alik negen eerogo wo'niraagin kooneegerak nogo inom, ndi, nit abet mbakwi mendek Ala omaawi mondok iya lombok eeppinanege menggerak nogo inom, kineenu arubagip nduk, “Inikime eya eeginake logot o,” yinuk, Ala yoge minggirak.

^19-21 Nit abet mbakwi niinok, at omaawi mondok iya lombok nogo paga eeppinanege nogo ti, Keritut kambunuk, nogo menggam nen eenik agago mippege nagagerik, kugi nggween abu'na mendek inom, eyonggaame mendek inom, mbogut abu'na o oolo yayi mendek inom, yi kugi ndi kugi inayuk wuko menggaarak o yogondak wonogwe inom, peebi logorak inom, it abok aret tebenak iigak, at Keritut alik mban Ala eenggi abe'nggan tiyanak logowak nduk, mbogut paga mippereegerak nogo ndak-ndak, nit yogondak at omaawi ti paga togop aret eeppinanege agaarik o.

²² Yi kugi ndi kugi inom, yi aakumi ndi aakumi inom, yi mendek ndi mendek abok aret at abu'me piinok, nit Ala apuri yi awi ndi awi kuwak eerit nogo monggoorak nogo lambuk togon ninanobak kwak ninowe tiyanak logowak nduk, mippereegerak.

²³ Ndi, nit Ala apuri yi awi ndi awi kuwak eeko monggoorak lambuk togon nogo ti, at eebe aret me, eebe ambit aruwak nduk, nit nineebe anobak nogo paga kumbinaneegerak me, yogondak at eebe yi awi ndi awi abok aret mondok endak warak menggerak.