Ayup 9 - Ala Wone Peenok Peebi Mbanak

Ayup nen wone onggo yoreegerak wone

¹ Yoge mbareegi, Ayup nen wone onggo at Mbilirat yoge logonet,

² “Wone yagandak ti neenu me, abet aret yagandak kwe, Ala nen, Kat obeelom aret o, yuwak nduk, Aap kanggo menggaarak mendek ambi nen Oone omaawi paga Ala nonggop togon yoriyak?

³ Wone ti yuwak nduk, Ala nimbirak wone warikit o, yinuk, mbaremenggerak kwe, Wone ambiriluk yoge kagak, At nen wone onggo seribu kuli aret at oba kwippigin me, Oone lek aret arigin o.

⁴ At Ala ti, yi wone ndi wone eenu wonage, At mondok omaawi aret wonage, Eeke menggerak me, At eerit nage kagak it ambi nen inogogumbuk a'nuk Non mbanogo pege kenok, teppiyaagin mbaken?

⁵ Puut ugun wonage kagak tayorogon nappege, Anini paga nippegak-wuppegak eeke,

⁶ O nggween yi, ya langgok eerogo nappege, Nggween alom yarak na'ndo-wa'ndo eeke,

⁷ Oonegen wundi waga'lek puk logowak nduk, Wone lengganogo yoge, Laaluguragan eya eeke kero, At nen ambit me lom warogo piinok, Eenggi amburu negen eerogo piige,

⁸ At alik nen mban mbogut mbiganogo pege, Niyo laut kilaarak-mogonik eeke paga iyok pit nage,

⁹ Laaluguragan ambi kuwak aago Biduk inom, Ambi kuwak aago Belantik inom, Ambi kuwak aago Kartika inom, Laaluguragan ninggirik o ame pa'nggwe wonage inom, Abok aret at nen mban koonogo piige,

¹⁰ Aakumi liippuurak abu meek iya nogo mendek at nen aret eeke, Eerubok ineenggi lingginiyak meek mendek at nen aret eerit nage, Eeke menggerak.

¹¹ An mbeyok neegak nage kwe, eebe nenegen kage, An keyoppanegak nage kwe, liippege, Eeka'lek aret agarik o.

¹² Aakumi inamendek ndinggolage kenok, ta nen non mbanogo pege, Kat nonggop eeke agandik o? yinuk, ta nen yoge, Eerigin mbaken?

¹³ Ala anini tebenogo pakeelik o. At Arakap ayeloman mini nogo At abu'me tebe yinuk, ayuk wureegwaarak nogo o.

¹⁴ At nimbirak wone wake, An wone onggo yoriyak koonogo pege, Nonggop togon eeriyak o?

¹⁵ An maluk eeka'lek aap abe aret wonage logonet kwe, An nen at wone onggo yoriyak meek a'netak o. At nowak loongga aret me, We nabuwa nombaruwak nduk mban yo'netak o.

¹⁶ Noone nggwok paga yoge neenok, Yu o, yo'neremenggerak kwe, Noone liirogon konenuwak mba'nuk yo'nirigin, an mba'netak lek o.

¹⁷ O wiya omaawi warit wage paga aan lebenogo panege, Ndi, alom lek kagak, nawin nagabolo paga ambik kunogo panege, Eeppanit wage ti paga

¹⁸ Niniki awo yonggonggola lek lek Ambinom eeppanegak mban eeke paga niniki apit eerogo panege, Ee'netak o.

¹⁹ At nimbirak ninomaawi wakkaa'netak nen, At omaawi abu iya a'netak o. At nimbirak ninowak looniyak kwe, Kat kawone mbaniyak me, Omok o, yinuk, Ta nen yo'netak mbakop?

²⁰ An aap obeelom aret kwe, Noone yikkolage ti paga nen kat aap abe lek maluk aret, yo'nege, Ndi, an maluk eeka'lek aret kwe, Wone yiminggirak ti paga nen, Kat maluk aret, yo'nege, Ee'netak o.

²¹ Ndi, an maluk lek aret kwe, Neenik nili yikkoloorak neebi mbake me, Eeppaniyak mbake kenok, eeppanuwak aret o

²² Aap ambi maluk eeke, ambi maluk eeka'lek wonage, Ala nen imbirak ndak-ndak Inenggaawak lek eerogo piige menggerak me, Eeppaniyak op mban aret, yagi o.

²³ Aap maluk eeka'lek ambi abera'lek me Aaninggin oba kwi'naremenggerak kangge kenok, Ala nen agi'ndok kangge,

²⁴ Ndi, nggween yi, Aap abet mbaka'lek ineenggime piige logomenggerik, Aap inowak loongga nen wone abe koonggwi iyo, Inigen mbuk kwak eerogo piige, Eeke menggerak o. Ti eerit nogwe nogo ti, At Ala nen eerulik mbakendak kenok, Ta nen eekerak me nduk ari agandik?

²⁵ Aap ambi mbe agan nage menggi kwak, An nda'nagagim mbet-mbet lek ari nage, Nale'nggen kaga'lek neegak, Mbet-mbet wobok yi nage, Eeke agaarik o.

²⁶ Longgop paga yiiro ogobakkigirik nogo, Niyo nen mbet-mbet wonok nage, Towe wu nen at wariyak mbaketak nogo Eenggabit nde agan nabuk togon wangge nagaatik, Nggerok togon wonok nggarek ari, Eeke menggi kwak, An nda'nagagim togop aret age menggerak o.

²⁷ An ee'nabit unggwage neebi mbake nogo, Mari eerogo pege, Nenete wandu aago wonage nogo mbo pege, Eeppunuk, Nale'nggen kaakit o, yinuk, Kooniminggirak kwe,

²⁸ At Ala nen, Aap yi maluk eeka'lek aap abe aret o, Nomba'nuk, yo'nirigin lek an neenu me, Aaninggin abok aret noba panege kero, Nagabiti mban mbarit unggwage minggirak o.

²⁹ At Ala nen, Aap yi maluk aret eekerak, nombake kagak, Nano eekkoloorak nduk, Aaninggin eerogo patit nage logorak mbaken? Ti we aanom warogo aret o.

³⁰ Niyo mili paga nabin kookkolage, Tonggo-tonggo paga neenggi kookkolage, Eeriminggirak kwe kagak,

³¹ At Ala nen purok me taanogo panemenggerak me, Nambogoyum nen, Aap yi, ogole o, yinuk, yo'nirigin o.

³² At Ala ti, aap kwak logo me an nen wone onggo yoge, Owak loonggo menggam time ninowak loolon yogwe, Eeruwok lak, Aap kwak lek me, meek o.

^33-34 At Ala nen aaninggin noba panege kero, Naganak nu'nirit nage nogo lek aruwak nduk, Aap ambi nen Ala nimbirak pigogo kwippinaninuk, At yawi mbanak paga nookak mban eeke nogo, Tayoppuwak nduk, ninawone amburu mbanuwak lak, Ao, mbake agarik o.

³⁵ Ti eeke logonetak nen, Nagabiti mbaka'lek noone teeluk aret yoriyak kwe Lek me, meek o.