Ayup 8 - Ala Wone Peenok Peebi Mbanak

Aap Mbilirat nen Ayup yoreegerak wone

¹ Yoge mbareegi, aap o Tuwa mendek endage Mbilirat nen Ayup yoge logonet,

² “Kat ne mande paga koone togop mban ari logomunggun? Kat koone ari nogo ti, O wiya oone pu ari kwak aret ari agandik.

³ Ala nen nomo-komo eerogo aakumi maluk eeka'lek iigak, Maluk onggo eeppiige, Obeelom eekwi iigak, at Omaawi Lombok Menggerak nen, Ti maluk aret o, yinuk, maluk eeppiige, Eeke menggerak mbaken? Lek me,

⁴ Kat kapuri nogo ti, at oone yugu taganogo pugwi iinok, Onggo ndak-ndak wogoragagerak kwe,

^5-6 Kat perak, kiniki kikak naka'lek abu koonak logonet, Yeenggwa kiruwak nduk Ala yoge, At Omaawi Lombok Menggerak nen Kabuwa mbaruwak nduk nggino yoge, Eeke keenok, At kake eerikit nduk, mi'nage logomenggerik, Aa'nduk wonagagerak obaane'me li'luk eerogo pagagin o.

⁷ Li'luk eerogo pagage ti paga, Peebi logomunggun nogo ti, Mondok iya lombok aret logomunggun me, kat nen, Aa'nduk wonagagirak nogo ti, Meek negen aret wonagagirak kagi, Mbake logomunggun o.

^8-9 Nit kobit iluk nda'nogoorak me, Yi wone ndi wone nineenggo'lek wonogwe, Nit nggween paga nineenik nugwi yi, Ninagalu'mak pogom aret wonogwe, Eekwi me, Aakumi aa'nduk wonogogwaarak nogo, kin wogiige, Kombomini liirogon mamunggologogwaarak nogo, liippege, Eeke logot o.

¹⁰ Eeke keenok, it nen kat mamunggugwi, wone yokkugwi, Eeko logonet, Yi wone ndi wone inikime wonage nogo kilirogo yokkirugun lek mbaken?

¹¹ Purok lek me, longgop nggorek lagangge, Niyo amburu lek me, mbereewak kwit agan lagangge, Eeke menggerak mbaken?

¹² Niyo lek kenok, iri'ngga mbet-mbet mbuk age menggi kwak, Longgop mbereewak imbirak anggen yege, eebe kole age, Eeka'lek kagak Mbet-mbet mbuk age menggerak o.

¹³ Nogo ti ndak-ndak aakumi abok aret Ala mari eerogo pugwi ti, Togop aret ogwe, It Ala ineebi mbaka iniki lunik nogo ti, Togop aret lek age kogwe, Eeko menggaarak o.

¹⁴ It aakumi ti, iniki lunik wonogwe nogo mbet-mbet lek age, Iniki panggonak wonogwe ti, laa'nggi awi kwak aret me,

¹⁵ Ti paga pengge'nage kenok, nibik togon wangge kagak, Pigaakit nduk eeketak kwe, inom yirik-wurik wangge, Eeke menggi kwak wonogwe o.

¹⁶ Iri'ngga mo paga wonage nogo, Engga mili lagangge logonet, omanggen yarak me ndoonogo nagabit nage,

¹⁷ Yugum logonak me yerek-perek eerogo nappit nage, Yugum ambe nggaganak me mambit nage, Eeke menggerak kwe,

¹⁸ Obaane'me kinok togon nappugwi kenok, At wonagagim nen ari logonet, An nen kat liippagaga'lek aret agarik o, Yoge kenok,

¹⁹ Iri'ngga nogo mbuk aremenggerak me, Obaane'me alik mendek nggween me nen lagangge menggi kwak, It aakumi ti, togop aret menggaarak o.

²⁰ Togop aret menggaarak kwe, Aap ambi inoone oba pugulik iniki abe kenok Ala nen mbo pege, Ndi, it maluk eeko menggaarak kenok yeenggwaarage, Eekeelik aret mbake logot o.

²¹ Togop eekeelik me, i'ndok kekererak nage, Kale'nggen kinikime nggelok ari logonet agan nege, Eerenok nduk eeppagagin me,

²² Ineebi kombakwi nogo inenggali mbakak nugwi, It maluk eeko menggaarak nogo inawi wurik lek aremenggerak kogwe, Eerugun o,” yinuk, yoreegerak.