Ayup 5 - Ala Wone Peenok Peebi Mbanak

¹ Togop aret me, koone nggwok yu o. Koone ari keenok, it ambi nen koone konenggwi, Ala ayonggo ambi nen yeenggwa kiri wage, Eekwi iyaamun ilik, lek a?

² Aap wi negen iniki wakko'net unggwage paga eebe aret wakkolage, Ndi, aap iniki yunduurak nen, An eerikit lak at eeke, Ao, mbarit unggwage paga eebe aret wakkolage, Eeke menggerak o.

³ Aap yi eekak ndi eekak alom abe eerit nage nogo Wi negen age kage minggirak o. An nen aberak lek me, At wonage menggim kugi pulunogo pege mbaki,

⁴ Apuri wologwe nogo yeenggwaaraga'lek teppiigwi, O kota tu unggwogo menggam inowak loonggo logonet, Tebenogo piigwi iigak, inaana'le mbangga'lek mbo piigwi,

⁵ Ineyabume anggen mbanak nogo aakumi mbi abu nen lek eerogo nunggwi, Iri'ngga alok enggela'me wonage kunduk, kalirubu pup eerogo nunggwi, Niyo abu eeginake menggi kwak, inamindik-inamendek kolaawok nduk, uugwe mbarit nugwi, Eekwi iigirak o.

⁶ Aaninggin-paaninggin eerogo pinanege nogo ti, Liirubu enggela'me nen lagi wage, Ndi, maluk eerogo pinanege nogo ti, Anggen awi kwak nggween paga nen mbilangge, Eekeelik o.

⁷ Eekeelik kwe, Kani kunik tubuk togon lagangge menggi kwak, Aakumi inalik nen aaninggin-paaninggin inoba pako menggaarak o.

⁸ An aaninggin noba a'netak nen Ala nggino yoge, Ndi, an ee'nabenetak nen, Yogop ee'nakerak o, yinuk, paganogo yoge, Ee'netak o.

⁹ Nit eeriyak meek kogwe nogo, at aret eeke, Ndi, eerubok mendek nit lingginiyak meek nogo, at aret eerit nage, Eeke logonet,

¹⁰ At nen o nggween paga mayu wuppi wage, Yabu yarak paga niyo kilirogo pit nage,

¹¹ Inendage tebenak kenok, inendage tiyappiige, Iniki wakkologwe windak iinok, inale'nggen eerogo mippiige, Eeke menggerak o.

¹² Iniki ngget paga maluk eeriyak koonggwi nogo, at nen lek eerogo piige, It eeriyak koonggwi nogo, ale-pale aruwak nduk eeppiige,

¹³ Iniki ngget paga maluk eeriyak koonggwi nogo, Awo koonggwi iigak, nggerok togon wagangge, Iniki penenak paga koonggwi nogo, Melak togon lek aruwak nduk eeppiige, Eeke kenok,

¹⁴ O liingge kagak o apit inoba kwi'nage me, Liingge paga oonikiya kwak ineenggi nduk nugu menggaarak o.

¹⁵ Togop kwe, It inoone omaawi warak nen, Ineenggi lek tebenak wonogwe nogo Inambe me yonggorinakwi, ineebe inoorogo piigwi, Eeko logokwak, At Ala nen inagap ndake,

¹⁶ Ineenggi lek nogo iniki lunik ambi wonage me, It maluk eeppiyoorak mbakwi nogo, inoone lek eerogo piige, Eeke menggerak o.

¹⁷ Aap Ala nen inaruk wake nogo inale'nggen wonogo menggaarak me, At Omaawi Lombok Menggerak nen niniki koonogo pinanege kenok, Neebi, yuurak mage o.

¹⁸ At nen inawinde-inobaande eerogo piigetak kwe, At nen mban nggerenogo piige, At nen inoorogo piigetak kwe, At nen aret obeelom eerogo piige, Eeke menggerak o.

¹⁹ Aaninggin ne 6 kuli nggwik togon koba pagage kwe, at nen kagap ndake, Ndi, ne 7 kuli koba ariyak nduk eeke kwe, non mbanogo pagage,

²⁰ Mbi noogelo age paga kangge keyo, keebe unde wakkake, Wim eeko logonet wooluwak paga koorukwak kili eerogo pagage,

²¹ Aakumi nen inoone andiigwi yokkugwi iyo, at karum wonage, Eerigin me, Kat keebe lek eerogo pagarak nduk, koba ari wage kenok, Kagabiti mbaka'lek ugun aret logomunggun o.

^22-23 Yi yugum ndi yugum keyabume wonage nogo Kimbirak wone abuk nggaruk togon koonogo pege, Ndi, wam nggwiya kat kimbirak lambungge, Eeremenggendak me, Keebe lek age, mbi abu eekkake, eeriyak kagak kagi'ndok kangge, Ndi, wam nggwiya nibinggabi wogwe iigak, Kagabiti mbaka'lek ugun wonage, Eeke logomunggun o.

²⁴ It kame menggaarak nogo, iniki ugun nu'lek wonogwe, Ndi, kaanggumi wonogo menggam pekkage kenok, Ambi kobak arulik enaani wonogwe, Eekwi iyaamunggun o.

²⁵ Kat paga nen ambik aret wigannogwe, Kat kombowologwe ti, iri'ngga nggween paga wonage nogo pogom ogwe, Eerugun o.

²⁶ Ndi, kat perak, gandum anggen mbanak nogo Mbelaniyak eyom ari wage kenok, Mbelanggo menggam mambogo mengga kwak Kagabolo ki keegak kanggok a'nuk kangge keenok, Piya unggwogo menggam pagi unggugun o.

²⁷ Togop aret me, nogoba wae. Ti eeriyak abok aret an liippege nagarik, Abet aret, mba'nuk yokkigirak me, Wone yagarak ti liippege, kinikime nabenggolage, Eeru o,” yinuk, yoreegerak.