Ayup 42 - Ala Wone Peenok Peebi Mbanak

“An maluk aret yagarak o,” yinuk, yoreegerak wone

¹ Yoge mbareegi, at Ayup nen Aliku ALA yoge logonet,

² “Kat nen yi mendek ndi mendek abok aret op mban eeke, Eeriyak koonogo pege nogo lek aga'lek a'me aret nggelok ari, Eeke menggendak nogo an neenu aret o.

³ Kat nen ari logonet, Aap wone eenggo'lek logonet an eeriyak koongge nogo, Kagaarogo pit nage ti ta o, yinuk, yo'negendak nogo ti, An liippega'lek logonet wone ari, Iya eeriyak mendek an neenggo'lek kwe kagak ari, Eekirak o, nogoba.

⁴ Ndi, kat nen wone ambi an yo'nege logonet, An nen kat keegwa'me wagangge, Ndi, kat nen onggo an yo'nege, Eerugun me, Wone an yokkege yi, karuk logot o, yinuk, yo'negendak nogo ti,

⁵ O aa'nduk aakumi nen kabok yogwe mban naruk konengge nagagirak kwe, Yogondak perak, nenegen abe nen aret keegi o.

⁶ Togop aret me, Nela nen yagarak o, yinuk, niniki wakkolage, Wun nanobak paga yumbunogo pake, liirubu paga lagak-mbagak ari, Eeke logonet, Noone maluk yagarak nogo ti, Ao, yinuk, mbo pigi o,” yinuk, yoreegerak.

Ayup aa'nduk wonagagerak ndak-ndak eeppereegerak wone

⁷ At Aliku ALA nen wone ti abu aret Ayup yoge nagagerik, aap Teman mendek Elipat nogo yoge logonet, “An nayeloman Ayup nen nabok abe pagangge menggi kwak, kit togop yuulik me, kat inom, koreewi mbere inom, nanini kinombake agarik o.

⁸ Nayeloman Ayup nen nabok abe pagangge menggi kwak, kit togop yuulik paga aaninggin kinoba pinagarak mbakirak kwe, lek eerogo pinagakit nduk, tapi ngguunok 7 waganggwi, ndomba ngguunok 7 waganggwi, ee'nuk, nayeloman Ayup owagam nogo logomonggotik, ti abok aret warogo kinake kani kunggwi kiinok, nayeloman Ayup nen kinake tamban eeke kenok, naruk konengge logominggirik, kit eekotak ndak-ndak eeppinagagin lek teppinagagin o,” yinuk, yoreegerak.

⁹ Yoge mbareegi, at Teman mendek Elipat inom, aap Tuwa mendek Mbilirat inom, aap Naama mendek Topat inom, nogo nen Aliku ALA nen yoragagerak nogo ndak-ndak eeko mbareegwa, Ayup tamban eereegerak nogo Aliku ALA aruk koneneegerak.

¹⁰ At Ayup nen oreewi inake tamban eeke mbareegi, ti'nuk, Aliku ALA nen at Ayup amendek aa'nduk wonagagerak nogo obaane'me wogoge logonet, oba luunogo ambik lombok aret wogoreegerak.

¹¹ Wogoge mbareegi, at oreewi-iriwi inom, it aa'nduk inom wonagagerak inom, abok aret ka wogo nogogwaarik, at ame inom laago lako logonet, iniki eyak wappugwi, Aliku ALA nen aaninggin oba pereegerak kenok iniki ale'nggen eeppugwi, inalitak lombok nen inawu mbuti perak mendek wogogwi, mbuti emas paga ogobakkigirik ogobak ayo inom, aruk ayo inom, nogo wogogwi, eereegwaarak.

¹² At Aliku ALA nen Ayup aa'nduk eenik wonage kagak ale'nggen oba pege nagagerak kwak lek peebi eenik wonage kagak ale'nggen ambik oba pereegerak. Pege kagak, aanggumi kambin-ndomba empat belas ribu inom, unta enam ribu inom, lembu mbere'mbo seribu inom, keledai kooli seribu inom, unde wonagagerak.

¹³ Ndi, apuri kunduk, wologwe 7 ndaganake, komologwe kenagan ndaganake, eereegerak.

¹⁴ Apuluk kolaga manggu ndareegerak endage Yemima toongge, ambokan ndareegerak Ketiya toongge, enabooluk ndarak endage Keren-Kapuk toongge, eereegerak.

¹⁵ Yi o ndi o time abok aret komologwe Ayup apurilogwe abu kigirikwe lombok togoti ambi ndaganaka'lek aret wonogogwaarak. Inogoba Ayup eyate iniriwi wologwe ti, wogorage logonet, komologwe ti inom aret wogoragagerak.

¹⁶ Ti abu aret eeke nagagerik, aap Ayup nogo eenik wonage kagak, tahun seratus empat puluh aret eereegerak me, apuri inom, ombowologwe 4 kuli nda'narit wogogwaarak inom, abok aret enegen iige nagagerak.

¹⁷ Ndi, Ayup nogo abu anggok lombok age nagagerik, li a'nuk kambeegerak.