Ayup 40 - Ala Wone Peenok Peebi Mbanak

¹ Yoge nagagerik, at Aliku ALA nen Ayup ambinom yoge logonet,

² “Ayup wae. At Omaawi Lombok Menggerak nen niniki koonogo paniyak, mbakendak nogo, Abu yogirak mbake agandik ilik, ambinom yorikit mbake agandik a? Ala nen maluk eeppanegerak o, At ari nogo nen aret an Ala eekirak ti, Ndogop eeppanggendak, yo'niruwak o,” yinuk, yoreegerak.

³ Yoge mbareegi, at Ayup nen Aliku ALA yoge logonet,

⁴ “An aap abu yunduurak aret me, Wone nonggop yokkirubok kenok, noone lek puk ari o.

⁵ Ne ambi paga noone ari, ne mbere paga wone mbangge, Eekirak nogo ti, Mbuuluk yuurak kagak ambik yagarak me, ambinom yigin lek o,”

⁶ Yoge mbareegi, Aliku ALA o wiya nombok-kombok warit wage enggela'me nen Ayup yoge logonet,

⁷ “An nen keegwa'me wagangge, Ndi, kat nen onggo an yo'nege, Eerugun me, Kat aap aret kenok, pipuk eeppunuk logot o.

⁸ Aakumi eekwi an nen a'me nggelok eeppiige nogo, Kat nen meek eerogo pege, Kaana'le mbanggolage logonet, Kat maluk eeppanggendak o, yinuk, an yo'nege, Eeke nogo ti, Op aret mbaken?

⁹ An neenggi nogo ti, Ala eenggi omaawi ndak-ndak wonage mbake, Ndi, at Ala oone ngguurubu ari menggi kwak, An noone togop aret ari mbake, Eeke agandik ya?

¹⁰ Togop aret mbake keenok, Kendage tiyanak kayuk warak keyaawak nduk nege, Kat aap nggwok, Wi, yuwak nduk, Kobaanggi-kobaangge li'luk eekko'nok nege,

¹¹ Kiniki mi'na'nuk kanini aakumi inoba kwippiinet nege, Iniki wogoppakwi nogo tebeppatuwak nduk, kenegen abi warogo piige,

¹² Iniki tiyappakwi nogo tebenogo patuwak nduk, kenegen loolo irage, Aap maluk eeka wonogo menggam aan lebenogo piige,

¹³ It abok ambugwi aret nggween taambiige, Keele maarogo kambunuk nogo menggam mambiige, Eeke logot o.

¹⁴ Ti eeke keenok, Kat keenggi omaawi lombok paga kagap ndakkolage keyaagin me, An nen, Wi! yinuk, pi wakkabigin o.

¹⁵ Lembu iri'ngga nenet nogo mengga kwak, kat keebe ogobakkigikkake logonet, Nggwiya kole mendek ogobakkigireegirak yi aa'nggi paga iri'ngga nenet nugwi endage, Kole Lombok o, yogwe nogo, pegiyet o.

¹⁶ Ineebe inomaawi lombok wonogwe, Inaanogum paga inomanggen mban ndoonak wonogwe, Eeko menggaarak me, iya o!

¹⁷ O wiya nen eyo nggabina na'ndo-wa'ndo eeke menggi kwak, inage togop aret eekkologwe, Inambulok omanggen mban penggaarak wonogwe,

¹⁸ Inowak mbuti tembaga kwak wonogwe, Ineenggi-iniyok mbuti owak kwak wonogwe, Eeko menggaarak.

¹⁹ An nen yi nggwiya ndi nggwiya ogobakkigirogo piyareegirak ando nogo Ineebe mbuulogwe inomaawi lek iigak, It nggwiya yi mendek perak, Ineebe kole inomaawi iya lombok wonogwe me, Nalik nen tebenogo piyoorak op kwe,

²⁰ Yi nggwiya ndi nggwiya yine kunggo menggam puut mbuulogwe-mbaalogwe paga It nunggo logorak inake iri'ngga wungge menggerak.

²¹ It nggwiya kole ti, eyo nggonggoondu alome winnogwe, Mbereewa'na purok me kumaarak wonogwe,

²² Eyo nggonggoondu yumaak aagome nobarak wonogwe, Eyo ndoolu yi aa'nggi paga lom warak enggela'me nugwi, Eeko menggaarak me,

²³ Niyo wu'nuk wage kenok, it inagabiti mbakwi, Yi inikime ndenen warak inambe a aago wonogwe kwe, Yi Yoraran kole wu'nuk wage logonet, Ndonggonninabigin o, yinuk, mbakwi, Eeka'lek nugut lek aret menggaarak o.

²⁴ It inigen ndogonogo piinok piginakwi, Inenggaanok keele yilunogo inogobak pelenogo piigwi, Eeriyak op mbaken?