Ayup 39 - Ala Wone Peenok Peebi Mbanak

¹ Kambin eyonggaame mendek inaagalogwe ndaganaburak keenu age, Rusa inaagalogwe ndaganakwi iigak, kat liippiige, Eeke menggendak ilik, lek a?

² Inabila iigak tut linggingge, Ndi eyom paga ndariyak keenu age, Eeke menggendak ilik, lek a?

³ Inagalomini inamborowak yunggunggwi iinok, inaagalogwe inanobak to agan wambi wogwe, Andi yagan wakwi iigak, perak togon wanggwi,

⁴ Karume logonet inomaawi arit nogwe, Penaame logonet ineebe kole ogwe, Eeko nagaatik, Inagalomini mbo piinok nanuk, iya waga'lek aret wonogwe, Eeko menggaarak nogo, Kat nen liippiige menggendak ilik, lek a?

⁵ Ta nen keledai nggwiya piinogo piige, Ndi, keledai inogowa ambik nugu logowak nduk, keele piinogo teppiige, Eereegerak mbaken?

⁶ Aakumi lek me anggu paga nugu logowak nduk, an nen aret o karume unde eeppiige, Nggween mayu yumbunik me, iri'ngga lagangga'lek menggim logowak nduk piige, Eeke mbareegi,

⁷ Time wonogo logonet, O kota noone-koone yogwe nogo inagi'ndok kanggwi, Aap wogoren nega nen inoone kole yorogwe nogo konengga'lek aret nugwi,

⁸ Puut nggelok-nggobok me inambi kwaarogo nenet nugwi, Iri'ngga mili kenok mbanogo nenet nugwi, Eeko menggaarak o.

⁹ Lembu nggwiya nen kake yabu eeriyak mbakwi, Ndi, kaanggumi inambi wogorage menggenom lembu nggwiya ti, time nogo yi unggwogwe, Eeriyak mbaken?

¹⁰ Eyo nggween kabungga nikkenok nogwe, Ti'nuk, nggween amok mbanit nogwe, Eeruwak nduk, Inenggaanok paga keele maarogo piige,

¹¹ It inomaawi ambik me, it paga kiniki panggonak wonage, Nake eeko logowak o, yinuk, yabu aaninggin kenok inoba piige,

¹² Gandum anggen wonok kame pi unggwogwe, Ndi, mbelanggo menggam kuwak eerogo pugwi, Eeruwak o, yinuk, inombake, Eeriyak op mbaken?

¹³ Towe ndiimbu inale'nggen nen ina'naabit yimbik-yimbik eekwi kwe, Ina'naabit inom, ineeruwak inom, ti towe lu kokwak lek o.

^14-15 Aakumi nen iniyok aan lebenogo pugwi, Nggwiya nen iniyok yigirogo pugwi, Eeriyak mbaka'lek towe ndiimbu ti, Inako nggween paga ugun pit nogwe, Aganggen aruwak nduk, mbini enggela'me teppit nogwe, Eeko menggaarak o.

^16-17 Ala nen iniki warak eeppiige, Ineenu aruwak nduk, eerogo piige, Eerulik me, Inaagalogwe ndappiinok, Nit ninaagalogwe lek o, yinuk, yimbinogo nappiigwi, Aanom warogo yagan wakirak me, yinuk, liippiiga'lek wonogwe, Eeko menggaarak kwe,

¹⁸ Mbe agan nawak nduk, ina'naabit wiganogo wumbogo logonet perak, Kuda inom, at paga kwi'ndak nega inom, Inogowa lek yi, Ha! yinuk, inagi'ndok kanggo menggaarak o.

¹⁹ Kat nen kuda inomaawi eeppiige, Inali'lu'me ineeruwak nggorek yaganak-taganak yogo logowak nduk yippiige,

²⁰ Wurin ku'mbo laganggak eekwi kwak eeko logonet, Ia, ninombaruwak o, yinuk, inogobak me timu-tamu eekwi iinok, Aakumi inagabolo ne agan nage logowak nduk yorage, Eeriyak op mbaken?

²¹ Kuda nen, Nomaawi ambik aret o, yinuk, Nawok nduk, iniyok tenggen-tenggen wakwi, Wim tinime nggare agan unggwogwe,

²² Wim iya lombok kenok, Inagabiti mondok mbaka'lek agi'ndok kanggwi, Wooluwak kagak inakom tayok yaga'lek inanep nonggonak unggwogwe,

²³ Kuda paga kwi'ndak inomaale ta'mbanak inamborowak paga nggerenak nogo oone ndale ari kagak unggwogwe, Tege inom, ndut nggabenak inom, lan ee'nuk unggwogwe, Eeko menggaarak o.

²⁴ Oone nggwok eeka trompet oone eeke kenok, Ko waka'lek inanini wuk togon nggween mondok kaga'lek mbe agan nogwe,

²⁵ Oone nggwok eeka trompet nogo Oone eeke konenggwi kenok, inoone yi'nggwe-ya'nggwe yogwe, O nda nen wim obari mbanogo nappugwi, Ineegin warak inoweewi nen wim lengganggwi inoone konenggwi, Ninawim o, yinuk, nggomookwi nogo konenggwi, Eeko menggaarak.

²⁶ Kat nen towe pen ware mamuniragandak paga tiyarogon wiga agan nogwe, Ina'naabit wiganogo punuk, o ame pa'nggwe ari nogwe, Eeruwak nduk, Eeppiige menggendak mbaken?

²⁷ Towe nggindooni wone lengganogo yorage menggendak paga Tiyarogon wiga agan nogwe, Inawi agi tiyarogon mbambunuk wonogwe, Eeko menggaarak mbaken?

²⁸ Puut kirin paga inawina puk wonogwe, Puut eegwak tiyak-tebek pak wurogo pereegim wonogwe,

²⁹ Time nen inambi kwaarit wambi wogwe, O nda nen inambi noorak inigen liippit nogwe,

³⁰ Aakumi inoorak paga ninggippunuk wonogwe, Inoorak inamiya inoo'nu nen piit-piit eerogo nunggwi, Eeko menggaarak o,” yinuk, yoreegerak.