Ayup 37 - Ala Wone Peenok Peebi Mbanak

¹ Ti eeke nogo an kage logominggirik, Niniki ponok-ponok eeke logonet, mbo laganggak eeke menggerak me,

² Wologwe wae! Kinaruk logonip o. At Ala oone ngguurubu negen eeke, Ambe me nen oone kole eerogo wumbi wage, Eeke nogo Konenggo logonip o.

³ At nen mbogut abu'na abok aret o kimbik telanogo nappit nage, O nggween paga irip-irip abok aret eya pindanogo nagabit nage, Eeke logomenggerik,

⁴ Oone kole eerogo wumbi wage, Oone nggwok mondok iya ngguurubu kwak ari, Eeke logonet, Puk aga'lek pindan-pindan eeke menggerak o.

⁵ Ala oone ngguurubu negen ari kenok, it aakumi nen, Wi! ugwi, At iya eeke menggerak nogo ti, aakumi nen liippuurak meek ogwe, Eeko menggaarak.

⁶ At nen ndugu-ndugu yoge logonet, nduguk togon nggween paga wambu o, yoge, Ndi, o mayu yoge logonet, mayu nggwok lubu-lubu wambu o, yinuk, yoge, Eeke menggerak.

⁷ At eeke ti paga aakumi ogobakkigirogo piyareegerak nogo nen At eeke menggerak ineenu aruwak nduk, It eeko menggaarak nogo non mbanogo piige,

⁸ Ndiimbu-nggwiya menggam nawak nduk eeppiige, Inawi mbanak me logowak nduk, eeppiige, Eeke menggerak.

⁹ O wiya obaane'me nen omaawi lombok warit wundi wage, O wiya warit wage logonet, togwi nggut-nggut eerogo pit wage, Eeruwak nduk eeppege menggerak o.

¹⁰ Ala ambe pu eeke paga mayu anggen eerogo pege, Niyo kole mayu anggen kwak li eerogo pege,

¹¹ Ndugwi paga mayu narogo pege, Ndugwi nen o kimbik nggaganogo nappuwak nduk eeppege, Eeke menggerak.

^12-13 Ndi, it maluk eekwi onggo eeppiige, O at ogobakkigireegerak yi, miin eerogo pege, Aakumi inabuwa mbake nogo ineenu eeppiige, Eeriyak mbaketak nogo aret Ndak-ndak aruwak nduk, yime-ndime nawak nen Ndugwi nogo wone lengganogo yorage kenok, Nggween irimbaga abok aret ndugwi mban ndak warit nage menggerak o.

¹⁴ Togop aret me, Ayup yi wae. Wone yi abok aret karuk konengge, Ala eerubok eeke nogo liippunuk, kat koone puk wonage, Eeru o.

¹⁵ Ala nen ndugwi eeko logorak punogo piige, Ndugwi enggela'me o kimbik nggaganogo nappit nawak nduk, eeppege, Eeke menggerak kat keenu ya?

¹⁶ Ndugwi yarugu-parugu lagit wage nogo liippege, At yi wone ndi wone abok aret eenu menggerak nen Eerubok mendek eeke nogo keenu age, Eeke menggendak ya?

¹⁷ O ame paga nen o wiya warit wage logonet, o aganggen ket-ket eerogo pege kenok, Kayum yirik ligak wuundamo eekkake nogo nen

¹⁸ Mbuti tembaga woraappunuk, Pugagi abu omaawi ogobakkigirogo pogo mengga kwak At Ala nen o yi nenaarogo pege logonet, Ndugwi ndak warogo pit nage menggerak nogo Kat togop aret eeriyak mbaken?

¹⁹ Nit wone koonogo at Ala yoriyak niniki kobak ee'ninake me, Yoruwok nduk, kat nen aret yo'niret o.

²⁰ Eliku nen wone ambi kat yokkiriyak ari me, Yokkiriyak ilik, lek a? yinuk, Ala yoriyak op mbaken? Aap ambi nen, Nenggaawak lek eerogo panu o, Yinuk, yoriyak op mbaken? Meek aret mbaki o!

²¹ O ogum eerak wonage me, O wiya nen lek eerogo pege logonet, oonegen kwindagala eerogo pege kagak, Inigen pekkoorak meek aret menggerak nogo o.

²² Mbuti emas pindan-pindan eeke kwak O omarip paga nen Ala eya ndelenak-welenak aago kagak wage, At mondok tiyanak lombok kenok, aakumi inamineeri ne agan nage kagak wage, Eeke menggerak o.

²³ At Omaawi Lombok Menggerak me, Nit at owagam noorak meek age, At omaawi lombok tiyanak wonage, Aakumi eekwi onggo a'me nggelok eeppiige logonet, mondok obeelom lombok eeppiige, Eeke menggerak me, At nen aakumi maluk eeppiyoorak meek aret o.

²⁴ Ndi, aakumi nen, Nit niniki warak aret o, yinuk, yogwe nogo at liippiigeelik me, Aakumi abok at mban ayuk wuko menggaarak o,” yinuk, yoreegerak.