Ayup 34 - Ala Wone Peenok Peebi Mbanak

Aap Eliku nen ambinom Ayup yoreegerak wone

¹ Yoge nagagerik, aap Eliku nen it yorage logonet,

² “Kit aap kiniki warak yi, wae. An wone yokkirage yi, kinaruk konenggwi, Kit yi wone ndi wone kineenu monggotak yi, wae. An ari neegak, kinaruk nggoonggwi, Eeko logonip o.

³ Ninamili paga mbi ombat wakkogo monggo kwak Wone yogwe nogo ninaruk paga konembunuk, Yi abe aret kagi, yinuk, waganggo monggoorak.

⁴ Wone yi, abe ilik? yinuk, ninalitak lombok aret liippugwi, Op yoriyak ngge o? yinuk, nit abok aret koonogo pugwi, Eeruwok o.

⁵ At Ayup nen ari logonet, An maluk eerulik abe mban wonage neegak kwe, Ala nen nawone liirogon koonogo panega'lek wonage,

⁶ An abet aret ari neegak kwe, Yi pilit ari agaarik o, yinuk, nombake, An maluk eerulik aret neegak kwe, Omaale nookerak nawin agaarak nogo, Lek aga'lek kunik aret wonage, Eeke agaarik o. Yinuk, ari menggerak o.

⁷ Aakumi niyo nonggo mengga kwak, Ayup nen Ala meek eerogo pege me, At kokwak aap ta wonage mbakop?

^8-9 At Ayup nogo nen, Ala inikilom ninombaruwak nduk eekwi ti, We aanom warogo aret eekwi o, yinuk, It aap maluk eeka inom kunggolage, It maluk eeko menggaarak inom nege, Eeke menggerak o.

¹⁰ Togop aret me, Kit yi wone ndi wone kineenu yi, wae. An noone yokkirage yi, konenggo logonip o. At Ala nen maluk eeke, At Omaawi Lombok Menggerak nen ninggin eeke, Eeke menggerak yuurak mondok mage o.

¹¹ At Ala nogo nen Aakumi eekaatak ndak-ndak aret onggo wogorage, Inalitak lombok ineraambe mugurok onggo eeppiige, Eeke menggerak me,

¹² At Ala nogo maluk eeke, At Omaawi Lombok Menggerak nen Ugun-ugun inowak loongge, Eekeelik, mbako logonip o.

¹³ O nggween yi, arum logowak nduk, taamini nen at mippugwi, Mbogut-nggween abok aret, Kat aret unde logot o, Yinuk, taani nen at yogwi, Eereegwaarak mbakop?

¹⁴ Lek aret me, at Ala nen ambe aagi paga Aakumi ineenik eeppiige menggerak nogo Ambinom wumbega'lek puk arikit mba'netak en,

¹⁵ Aakumi abok ambugwi aret kanggwi, Iniyokan liirubu aret ari nogwe, Eeko logonetak o.

¹⁶ Togop aret me, Ayup wae. Yi wone ndi wone keenu kenok, An yokkege yi, karuk konengge, An ari neegak, karuk nggoongge, Eeke logot o.

¹⁷ At ambi aakumi eekwi ndak-ndak onggo wogorage eebi mbake nogo nen Aakumi inarum logonet, inawone mbaniyak op mbaken? Ndi, it eekaatak ndak-ndak eeppiiga mondok omaawi menggerak nogo, Kat maluk eekendak o, yinuk, at yoriyak op mbaken?

^18-19 Yi aap ndi aap abok aret At nen ogobakkigirogo piyareegerak me, Aap inendage warak iinok, inom agak eeke, Ineenggi lek iigak, ineenggi warak inom age, Eekeelik nogo nen Kit aap meek mendek yi wae, yinuk, It aap inoweewi inendagembogut yorage, Ndi, kit aap kinobaabut nggolo yi wae, Yinuk, aap nagawan-nagawan yorage, Eeke menggerak nogo lek a?

²⁰ It aap abok ti, abera'lek me kanggwi, Nogo iniki mbere eeke paga it ineenggi warak nogo lek ogwe, Inomaawi ambik wonogwe nogo aakumi nen lek at Ala nen aret We negen lek eerogo piige kenok, inenggaawak lek ogwe, Eeko menggaarak.

²¹ Aakumi eerit nugwi nogo Ala enegen wogoren nege, Yiru-ndiru nugwi nogo, at enegen liippiige, Eeke menggerak me,

²² It maluk eeko menggaarak nogo, o apit me kumaa'nari unggwogwe, O yumaak paga kunduk, kumaa'nogwe, Eeriyak meek o.

²³ Togop aret me, It aakumi inowak loongge logonet, ineegwa'me waakit nduk, at Ala nen, Ne ndi paga woraamunggup o, yinuk, punogo piigeelik o.

²⁴ Ineegwa'me wagangga'lek logonet, inendage warak inomaawi ambik wonogwe nogo, At nen yigirik-noonom eerogo piige, It inobaane'me aap alik mippiige, Eeke menggerak o.

²⁵ It eerit nugwi nogo at eenu menggerak me, Oonikiya paga inendage warak inom, inomaawi inom, Lek eeppiinok, ineebe yigirogo piige menggerak o.

^26-27 It aakumi ti nen, Ala mugurok noorak, nineebi o, yinuk, at mbo pugwi, At mbake nogo, Eeriyak nineebi o, yinuk, tu alik nomoninuk nogwe, Eeko menggaarak me, It maluk eerit nugwi nogo aakumi abok inigen iigak, Onggo eeppiige menggerak o.

²⁸ It aap ti nen ineenggi lek maluk eeppiigwi paga, Eeppinanugwi yi iyet o, yinuk, Ala yogwi iinok, it, Ai ao, yogwe nogo At aruk konengge menggerak kwe,

^29-30 At oone lek puk mban wonage kenok, Aap ta nen maluk at oba pege, At etenggen kumaappatinuk wonage kenok, Aap ta nen enegen kage, Eeriyak mbakop? Lek me, It Ala mugurok noorak ineebi mbakwi nen Keele pugu kwak aakumi yilunogo piinok, inoone omaawi yorogo logogun me, It aakumi inanebunu ambi nen ilik, aakumi abok nen a? It tebenogo piyoorak meek aret arigin o.

³¹ Aap ambi nen Ala yoge logonet, Aaninggin noba panegak mban eekerak paga niniki koonnagaarak me, An maluk ambinom eerigin lek o, ari,

³² Ndi, An maluk porogo wonage neyo yo'niru o. Yo'nege kenok, an maluk ambinom eerigin lek o, yinuk, ari,

³³ Eeke kenok, aap ti onggo ngge eeppuurak mbaken? Ala nen eekwi onggo eeppiige menggerak nogo Kat mbo pege menggendak me, Ala nen aap ti op eeppuurak ngge mbake agandik? An yigin lek o. Kat nen mban nggaruk togon yuurak me, Kat kage nogo an yo'niru o.

³⁴ It yi wone ndi wone ineenu nen an yo'nugwi, It iniki warak an ari konenggwi nogo nen an yo'nugwi, Eeko logonet,

³⁵ Ayup ti, wone eenggo'lek logonet ari, Iniki liippega'lek wone ugun agan nage, Eeke agaarik o, Yinuk, yogwe me,

³⁶ It aap maluk eeka kwak At Ayup nen wone onggo ari ti paga Owak abu li'lak loonit ungguwak lak, Ao, mbake agarik o.

³⁷ At maluk eeke nagaarik kwe, Maluk paganiyak neebi o, ari nogo paga maluk ambinom eekkolage agaarik o. Nit ninenggaanom paga an maluk noba wonage lek o, oone nabenak ari, Oone nabenak mban Ala enggali warit unggwage, Eeke agaarik o,” yinuk, yoragagerak.