Ayup 31 - Ala Wone Peenok Peebi Mbanak

¹ Kolaga tawe niniki nengge kero, Nenegen pekkoorak mondok lek o, yinuk, Niniki abuk nggaruk togon koonogo pereegirak o.

² At agi menggerak Ala nogo nen ninake nano koonogo pege, At Omaawi Lombok tiyarogon menggerak nen nineyate kwak nano wo'niroorak koonogo pege, Eereegerak mbakop?

³ It obeelom eekulik mendek ti, maluk mendek inoba kwi'nage, It maluk eeko menggaarak ti, aaninggin-paaninggin inoba age, Eeruwak nduk, Koonogo piige lek mbakop?

⁴ At Ala nogo nen an eeke minggirak nogo liippanege, Niyok pit nage nogo at eenggi linggingge, Eekeelik mbakop?

⁵ An pilit pugunit nage logorak mban ee'nake, Aap inambokan laganiyak mban ninikilom mbarit nage, Eeka'lek neenok,

⁶ Aaninggin abu abe wakkogo mengga kwak, At Ala nen an liippaninuk, maluk eerulik aret neyaagin o.

⁷ Tu abe kagak nomok togon nage, An nenegen kenok niniki nenet nage, Maluk neenggi paga lenggenak wonage, Eeke neenok,

⁸ An yarit nagarak anggen nogo, aap alik nen mbanogo nunggwi, Ndi, yumbunit nagarak ero nogo, aakumi nen kinogo nappugwi, Eeko logowak o.

⁹ Kwe paga niniki nengge, Noreeluk arungga paga nena woorogon mannari nage, Eeke logonetak en,

^10-11 An nenggali age, maluk kenok nowak loongge, Eeriyak aret me, Nakwe nen aap alik ake gandum yigike, Aap alik inom nogo yit nege, Eeke logonetak kwe, lek me meek o.

¹² Ti eeke logonetak nen Kani pup eerogo nengge menggi kwak, An togop aret eerogo panege, Ndi, kuwak eerogo pigirak nogo kunduk, Mondok lek eerogo pege, Ee'netak o.

¹³ Nayeloman mini kumi-aap nen, Ndogop eeppinaniyak me eekendak o, Yinuk, yo'nugwi iigak, It yogwe an liippega'lek mbo piige neenok,

¹⁴ Nowak loongge eyom paga Ala nen yo'nege kenok, an nen nonggop yoge, Nonggop eeppiigendak o, yo'nege kenok, an onggo ngge yoge, Eeriyak mbakop?

¹⁵ At nagalo inikime ogobakkigirogo paneegerak nogo nen It kunduk inagalomini inikime ogobakkigirogo piyoolik mbakop? Ninagalomini inikime ogobakkigirogo pinaneegerak ti, Eebe ambit Ala aret nogo lek a?

^16-18 It ineenggi lek nen uugwe mba'nuk yo'nugwi nogo wogoraga'lek mbo piige, Wulaga mbuuluk paga it kumi nanu nenegen wogonake nagagirak kwe, Yogondak it iniki, Ao, mbakwi nogo nenegen wogonaka'lek mbo piige, Wulaga mbuuluk paga elege moono nogo, Inogobamini kwak a'nuk, tawe aganake nagagirak kwe, Yogondak nambi magaraga'lek napit nengge,

^19-20 Inayum lek me togwi nen kugi inooke ilik, Aap meek mendek inayum lek me we nugwi a? Eekwi me, Inoba aganggen aruwak nduk, Nandomba ineeruwak mbanak paga yippiige neenok, Inale'nggen noba pangga'lek mbo panugwi iige,

²¹ It aap inowak loonggo menggaarak nen Noone konenggo menggaarak neenu me, Aap moono iinok, noone lok togon yorage, Ee'netak en

²² Nobaak kinok togon nage, nobaak alom kalok ari, Eeriyak op kwe,

²³ Ala nen aaninggin ambi noba panege kero, nagabiti mbake, At mondok iya tiyanak lombok menggerak ayuk wuke, Eekirak me, Togop eerulik o.

²⁴ Niniki mbuti emas paga panggonak wonage, Ndi, mbuti emas abe mendek yoge logonet, Kat paga niniki nu'lek eerogo pangge o, yoge,

²⁵ Neenggi warak wonage me, niniki ale'nggen nggwok mbake, Eerit nage nogo paga Namendek ambik kuwak eerogo pakirak kenok, niniki tiyappake,

²⁶ Ndi, oonegen abinak eeke, tut abe kemeninuk lagi wage, Eeke nenegen kenok,

²⁷ Ti aret inalut eerikit o, yinuk, kote koonogo pege, Inayuk wuke logonet, nena wanduk yagak eeke, Ee'netak nen ti,

²⁸ At agi menggerak Ala nogo, mugurok nage lek mbo pege neenok, Maluk aret ee'netak me, nowak looninetak kwe, Togop eeriyak mbarulik o.

²⁹ It ineebi nombakwi nogo, Aaninggin inoba age kenok nale'nggen inombake, Maluk inoba age kenok, Kayik a! mbake,

³⁰ Kambuwak nduk, kugi pulunogo puurak ti, Maluk aret kagak pulunogo piige, Eeke logolik mban.

^31-32 Aap ugun-ugun yowaarogo mambiige, It aap nggiru wogwe iinok, Endekem nogo yega'lek ninom nogo yuwok nduk yorage, Eeke minggirak me, It an ninom wonogwe nogo nen yogo logonet, Ayup nen mbi ma'niraga'lek we ninom nogo yogoorak o, Yinuk, taamini nen yogo menggaarak mbakop? Lek aret o, yinuk, yogo menggaarak o.

³³ Aap inomaluk inikime kumaappatogo mengga kwak An nomaluk ninikime kumaappatinuk wonage,

³⁴ Aakumi apit inoone yogwe nogo nagabiti mbake, Nowe-nawot nen meek eerogo panugwi iinok, niniki lek age, Ee'netak en, Noone yaga'lek name mban puk logonetak kwe, togop eerulik o.

³⁵ An noone ari yi, Aap ambi konenuwak lak, Ao, mbake agarik o. An wone agan wagarak yi, abok abet aret me, At Omaawi Lombok Menggerak Ala nen mban Onggo yo'nege logowak o, yinuk, Nombo owak o! At maluk eekerak yo'nege nogo ti, Alom ndogop eekendak o, yinuk, Liiru liirogon mbanogo punuk wo'niruwak o.

³⁶ Liiru mbanogo wo'nege kenok, nuum paga piyaninuk nege, Nggare-nggare mendaarak kwak, nanobak paga yippatinuk nege,

³⁷ Nengga teerogon at owagam nanuk, Eerit nage nagagirak nogo mbinik-mbenak eerogo yoge, Ee'netak o.

³⁸ Nanggween nen an yo'nege logonet, Kat nonggop nduk eeppanggendak o, ari, Wen anggen wogo nen le yogwe,

³⁹ Yarak anggen onggo pega'lek logonet, lagap agan nege, Nake yabu eeko menggaarak nogo, iniki andi eerogo piige, Ee'netak nen

⁴⁰ Gandum obaane'me alok mban lagangge, Gandum kwak jelai obaane'me wola mban nik ari, Ee'netak o,” yinuk, at Ayup wone age yobonogo yoragagerak ti aret.