Ayup 29 - Ala Wone Peenok Peebi Mbanak

¹ Yorage nagagerik, Ayup nen wone ambinom kunik-kunik aret yorage logonet,

² “An ti, tut aa'nduk penenak paga wonagagirak nogo Ndak-ndak logokit lak, Ao, mbake agarik o. Ne ti eyom paga Ala nen an unde wo'nake,

³ At andi wuninik nenggaawak paga eya eerogo panege, O apit aagome nage neegak, naru eya eerogo panege, Eeke nagagerak o.

⁴ Tawe logonet eerit nage nagagirak nogo Ndak-ndak eeke logokit lak, Ao, mbake agarik o. Ne ti eyom paga Ala nimbirak kunik me name obeelom eerogo panege,

⁵ Omaawi Lombok Menggerak nimbirak aret wonage, Napuri nowagam ninggirik wonogwe,

⁶ Tu nage neegak, Naanggumi inelak amburu paga niyok pege a'lip kaga'narit nage, Eyo tayitun anggen yugum ndoonak paga aambirangge neegak, Niyo kwak amburu oone nggwa wangge, Eeke nagagerak.

⁷ Name nen o kota tu unggwogo menggam unggwi nage, Oore'nggam kwi'nage minggim nogome kwi'nage, Eeke neegak,

⁸ Aap tawe nen neego nagaatik, inakom tayo yogwe, It aap inanggok kenok mi'nogwe,

⁹ It nagawan-nagawan inoone nggobo agan nogwe, Ineenggi paga inambe nakkologwe,

¹⁰ Aap inoweewi inoone lek puk wonogwe, Inamili inalelan paga nabenak wonage kogwe, Eeko nogogwaarak.

^11-12 Aap inamendek lek tebenak wonogwe nogo nen, Yeenggwa niret o, yinuk, Inoone nggwok paga yogwe iinok inagap ndake, Wologwe-komologwe moono yeenggwaaraga'lek iinok, yeenggwaarage, Eeke nagagirak me, An nabok inaruk konembunuk, Wi! yogwe, Inigen pe'neenok, nendage tiyappanugwi, Eeko nogogwaarak o.

¹³ Aakumi kambuurak eeko logonet, inale'nggen noba panugwi, Kumi nanu nen an neenok inale'nggen nombakwi, Eeko nogogwaarak.

¹⁴ Obeelom eeppiinet nage nagagirak ti, nayum kwak yirikkolage, Aap inawone liirogon amburu mbangge nagagirak ti, nayum nggorek kwak, nabetagi kwak, yikkolage, Eeke nagagirak.

¹⁵ Inigen mbuk iinok, inigen kwak an aret age, Iniyok yilugu iinok, iniyok kwak an aret age,

¹⁶ Elege moono iinok, inogoba kwak an aret age, Aap nggiru ineebe neenggo'lek kwe, alom liippunuk, inawone mbangge,

¹⁷ Nggeewo anini warak nen at noorak eyak nggereninuk nage me, Ondogowak kalenogo punuk, ambe me ndinggwi kwak, Aap maluk eeka nogo inomaawi lek eerogo piige, Inabu'me tebembiinok wonogwe nogo ndininake, Eeke nagagirak o.

¹⁸ An mbake logonet, Mbini yi aa'nggi paga ambik menggi kwak, An yi tahun ndi tahun eeppunuk, nawi alom paga aret kangge,

¹⁹ Eyo omanggen niyoome yarak menggi kwak, nomanggen togop aret yarak wonage, Eyo eno'mbak nogo paga oonikiya miin anggen luurik menggi kwak, nagabolo ki eerogo panege,

²⁰ Nendage tiyanak ki mban wonage, Neegin agale ngget poorak neenggime wonage kwak, nomaawi itok aret wonage, Eeke logokit, Mbake nagagirak.

²¹ Ne ti eyom paga noone ari neegak, Aakumi nen inabolok lek logonet konenggwi, Inaruk wake neegak, inoone lek waganggwi,

²² Eeke neenok, inoone pi'naka'lek wonogwe, Eeko nogogwaarak. Niyo amburu puk-puk wangge menggi kwak, noone togop aret inoba kilirogo piige,

²³ Mayu wage kero tokkogo mengga kwak, noone ari neyo an to'nakwi, O kibi wonagaatik, o mayu wage kenok, nggween wup eerogo nengge menggi kwak, an noone ari neegak, it togop aret eekwi,

²⁴ Iniki piirik wonogwe me, an i'ndok nggi ari wonage neenok, iniki ket yanggo eerogo piige, Netenggen eya aago wonage neenok, it togon iniki teeluk ogwe, Eeko nogogurak.

²⁵ Ndogop eeko logonip o, yinuk, koonogo piige, An inowe logonet, inarum wonage, Ineegin warak inenggela'me inowe endagembogut kwak, An togop aret inenggela'me wonage, Aakumi iniki wakkologwe me, iniki eyak wappiiga kwak age, Eeke nagagirak o.