Ayup 28 - Ala Wone Peenok Peebi Mbanak

¹ Mbuti perak nogo ti, nggween kabunogo waganggo menggam wonage, Mbuti emas nogo woraako menggam wonage, Eeke menggerak o.

² Mbuti nggween me nen kabunogo waganggwi, Mbuti tembaga yugum enggela'me wonage me, Woraarogo enete mbeennage kenok waganggwi, Eeko menggaarak me,

³ Yugum ti mendek yumaak lombok wonage nogo, Yumaak lek eeruwak nduk eya eerogo pegak Nggween kabunit ogu nggween inikime lombok kwaarit wanggwi,

⁴ Aakumi wonogolik me o nda time nggween kabunit wanggwi, It nggween irimbaga nugu menggaarak nen it nggween abu'na wonogwe ineenggo'lek wonogwe, It aakumi lek iigak, keele paga puguk-pagak wambit nogwe, Eeko menggaarak o.

⁵ Nggween aakumi inambi magarage nogo Irimbaga wonage kagak, nggween abena ti, Kani eyak nen yugum yanggunogo nappit nage kwak, Togop aret eerogo pit nage menggerak me,

⁶ Yugum anggen enggela'me yugum enete mbogut mili kwak onggo nggwok mendek waganggwi, Yugum ameneno enggela'me mbuti emas yiluk-puluk waganggwi, Eeko menggaarak.

⁷ Waganggo menggam tu time nogwe nogo towe pen ware eenggo'lek wonage, Towe ya'ngge-ya'ngge enegen liippega'lek wonage,

⁸ Nggeewo anini warak nen o time iyok pit naga'lek wonage, Singa at noorak kwaarit tu ti paga naga'lek aret wonage, Eekwi kwe,

⁹ Aakumi nen perak, Yugum tumbu kagak yanggunit unggwogwe, Puut-puut miyanogo alom kin eeppugwi,

¹⁰ Yugum lunik eno pelenogo wumbit nogwe, Yi mendek ndi mendek onggo nggwok yugum inikime wonage abok aret inigen kogwe,

¹¹ Yi eneerime kunduk kwaarit unggwogo logonet, Nggween abena kumaarak wonage nogo kin eerogo nippit wogwe, Eeko menggaarak o.

¹² Togop eeko menggaarak kwe, Iniki warak nogo o nggeeme wonage me kwaakwi, Yi wone ndi wone yelok kaga nogo nggeeme wonage me ineenu ogwe, Eeriyak mbakop?

¹³ Iniki warak nogo ti, iya lombok me, Aakumi nen liippega'lek aret wonogwe, Aap ineenik wonogo menggam kwaaka'lek wonogwe, Eeko agaarik.

¹⁴ Yi laut abu'me lombok yenggenak nen ari logonet, Iniki warak alom an paga wonage lek o, ari, Yi laut irimbaga yenggenak nen ari logonet, Iniki warak alom an paga wonage lek mban, ari, Yogo menggaarak o.

¹⁵ Iniki warak nogo ti, mbuti emas abe paga kunggwi, Mbuti perak aaninggin wakkaanuk onggo pugwi,

¹⁶ Mbuti emas abu abe o Opit mendek nogo paga kunggwi, Yugum kere'li-kere'lo eerak onggo nggwok yebibit ilik, ye kibu-kibu a? ti paga kunggwi, Eeriyak meek o.

¹⁷ Mbuti emas paga ilik, pugagi abe paga a? Onggo ndak-ndak wakkagak iniki warak kunggwi, Inobaanggi-inobaangge eekak mbuti emas paga ogobakkigirik kunggwi,

¹⁸ Ye nogo inom, Yi yenggenak me yugum alok ko aago paga inom, Ti paga onggo ndak-ndak lek me onggo pugwi, Eeko logorak meek o. Iniki warak nogo ti iya lombok me, Yugum kundali iya aret kwe ti paga kunggwi,

¹⁹ Yugum onggo nggwok o Kuti mendek paga wakkagak kunggwi, Mbuti emas abu abe mendek paga kunggwi, Eeko logorak ti meek mban.

²⁰ Iniki warak nogo ti, o nggeeme wonage me kwaakwi, Yi wone ndi wone yelok kaga nogo ti, nggeeme wonage me ineenu ogwe, Eeriyak mbakop?

²¹ Yi mendek ndi mendek ineenik menggaarak nen Inigen kogwe iyo, kumaarak wonage, Yirowe ndirowe wiga agan nugwi nogo kunduk, Inigen kogwe iyo, kiraarak wonage, Eeke agaarik o.

²² Kambeegwaarak wonogo menggam wonogwe inom, Kambunuk nogo menggam wonogwe nogo inom, nen yogo logonet, Iniki warak nogo ndime wonage o, yinuk, At ambi yogak agan wogwe nogo mban ninaruk konenggoorak o, yinuk, Yogo menggaarak kwe,

^23-24 At Ala nen perak, Nggween alome nen nok, irip-irip enegen kage, Yi mendek ndi mendek mbogut abu'na menggaarak abok aret maloppiige, Eeke menggerak me, At lombok nen iniki warak mamunggo menggam tu eenu wonage, Wone abok yelok kaga wonage menggim liippege, Eeke menggerak o.

²⁵ At nen o wiya omaawi koonogo pege, Niyo alobogok lek alobogok warak logowak o, yinuk, koonogo pege,

²⁶ O mayu wage logorak koonogo pege, O kimbik eeke logonet, ngguurubu eeke logorak koonogo pege, Eeke nagagerik,

²⁷ Iniki warak ti, togop aret menggerak kagi, Yinuk, liippege, abut mbangge, Iniki warak togop aret logowak o, yinuk, mbake, Eeke nagagerik,

²⁸ Aakumi yorage logonet, Kiniki warak ti, kinogoba Ala kinagabiti mbakwi, Yi wone ndi wone yelok kaga nogo ti, maluk kenok ogole nen mbaganggwi, Eeriyak ti aret o, Yinuk, yereegerak o,” yoragagerak.